Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Novomba 2012

Jesus okwe tu tulila po oshiholelwa sheifupipiko

Jesus okwe tu tulila po oshiholelwa sheifupipiko

“Ngame onde mú pe oshiholelwa, opo mu ninge naanaa ngashika nde mú ningile.” — JOH. 13:15.

1, 2. Jesus okwa li a ningi shike ongulohi ye yahugunina kombanda yevi a longe aayapostoli ye oshiilongomwa shi iwetikile?

ONGULOHI yahugunina ye kombanda yevi, Jesus okwa li a hungila naayapostoli ye mondunda yopombanda megumbo limwe muJerusalem. Sho taya li uulalelo, Jesus okwa thikama e ti ihula onguwo ye yokombanda. Okwa kutha oshihanduke e te shi imanga mombunda. Opo nduno okwa li a tula omeya moshiyaha e ta tameke okuyoga oompadhi dhaalongwa ye e te dhi pyaanitha oshihanduke. Konima yaashono, okwa zala ishewe onguwo ye yokombanda. Omolwashike Jesus a li e na okulonga oshilonga shoka tashi pula eifupipiko? — Joh. 13:3-5.

2 Jesus okwe ya lombwele a ti: “Omu uvite ko tuu shoka nde shi mú ningile? . . . Ongame Omuwa nomuhongi gweni. Sho nda yogo ngashingeyi oompadhi dheni, nane wo omu na okuyogathana koompadhi. Oshoka ngame onde mú pe oshiholelwa, opo mu ninge naanaa ngashika nde mú ningile.” (Joh. 13:12-15) Sho Jesus a longo oshilonga shoka tashi pula eifupipiko, okwa li a hala okulonga aayapostoli ye oshiilongomwa shi iwetikile shoka a li a hala shi kalelele momadhiladhilo gawo noshi ya kwathele ya kale aluhe aaifupipiki.

3. (a) Jesus okwa li u ulike ngiini poompito mbali kutya eifupipiko olya simana? (b) Otatu ka kundathana shike moshitopolwa shika?

3 Sho Jesus a yogo oompadhi dhaayapostoli ye, hasho sha li oshikando shotango e ya longo yu uve ko kutya okukala aaifupipiki okwa simana. Manga shoka inaashi ningwa, aayapostoli ye oya li ye na ombepo yokulalakanena oondondo mokati kawo. Jesus okwa li e eta okanona puyo e ta ti: “Kehe ngoka ta taamba medhina lyandje okanona nkaka, oye ta taamba ndje; naangoka ta taamba ndje, ota taamba wo ngoka a tuma ndje. Oshoka ngoka gwomokati keni omudhinwa kwaayehe, oye mukuluntu.” (Luk. 9:46-48) Molwaashoka Jesus okwa li e shi kutya Aafarisayi oya li yi iwete ya simana ye vule aantu yalwe, okwe ke shi popya muukalele we a ti:  “Ngoka ti inenepeke, ota shonopekwa, naangoka ti ishonopeke, ota nenepekwa.” (Luk. 14:11) Osha yela kutya Jesus okwa hala aalanduli ye ya kale aaifupipiki, sha hala okutya, yi ishonopeka momitima, yo kaye na uuntsa neinenepeko. Opo tu vule oku mu holela natu konakoneni nawa oshiholelwa she sheifupipiko. Otatu ka taleni wo nkene eifupipiko hali etele uuwanawa ngoka te li ulike nosho wo yalwe.

“INANDI SHUNA MONIMA”

4. Ongiini Omwana gwaKalunga a li u ulike kutya omwiifupipiki manga inee ya kombanda yevi?

4 Jesus okwa li u ulike kutya ye omwiifupipiki omanga nokuli inee ya kombanda yevi. Omanga inaa ninga omuntu gwopanyama, Jesus okwa li a kala naHe megulu omimvo odhindjidhindji. Jesaja okwa popi kombinga yekwatathano lyopothingo ndyoka lya li pokati kOmwana naHe a ti: “OMUWA Omupangeliawike okwa longo ndje shoka ndi na okutya, opo ndi koleke mboka ya gundila po. Ongula kehe ota ladhipike ndje, opo ndi uve shoka ta nongeke ndje. OMUWA okwa thitulula omakutsi gandje. Ngame inandi mu tinda, inandi shuna monima.” (Jes. 50:4, 5) Omwana gwaKalunga okwa li u ulike iikala yeifupipiko nokwa li a gandja eitulomo lela kwaashoka Jehova a li e mu longo. Okwa li a halelela okwiilonga kuKalunga kashili. Jesus okwa li i ilongo sha lela moshiholelwa shaJehova sheifupipiko shokusila ohenda aantu aalunde.

5. Nonando Jesus oye omuyengeli omukuluntu, Mikael, okwa tula po oshiholelwa shashike sheifupipiko nosheishonopeko sho a li tu ungaunga nOndiaboli?

5 Haishitwa ayihe yomegulu ya li yi na iikala mbyoka ya fa yOmwana gwaKalunga, epona. Pashiholelwa, omuyengeli ngoka a ka ninga Satana Ondiaboli okwa li a kokeke iikala yokukala a hala esimano nosho wo yuuntsa, e ta tsu ondumbo naJehova noka li a nando a hala okwiilonga sha kuJehova. Ihe Jesus okwa li a gwanenwa kondondo ye ndjoka a li e na megulu, ye ka li wo a longitha nayi oonkondopangelo dhe. Nonando Jesus oye omuyengeli omukuluntu, Mikael, ina longitha nayi oonkondo dhe sho ya li taya ‘ludhikithathana nOndiaboli kutya olye e na okukutha po omudhimba gwaMoses.’ Pehala lyaashono, Jesus okwa li i ifupipike nokwi ishonopeke. Oshinima shoka okwa li e shi ethele nehalo ewanawa miikaha yaJehova, Omupanguli Omunene meshito alihe, oye u ungaunge nasho momukalo gwe nopethimbo lye. — Lesha Judas 9.

6. Jesus okwa li u ulike ngiini eifupipiko sho e ya kombanda yevi e li Mesiasa omuuvanekwa?

6 Miinima mbyoka Jesus a li i ilongo omanga inee ya kombanda yevi, omu na okukala mwa li mwa kwatelwa omahunganeko ngoka taga gandja uuyelele nkene onkalamwenyo ye ya li tayi ka kala kombanda yevi, e li Mesiasa. Nopwaahe na omalimbililo, omanga inee ya kombanda yevi okwa li e shi nale kutya ota ka mona iihuna. Ihe nonando ongaaka, Jesus okwa li a taamba ko oshinakugwanithwa shokuya kombanda yevi, nokudhipagwa e li Mesiasa omuuvanekwa. Omolwashike a li e shi ningi? Omuyapostoli Paulus okwa li a tsu omuthindo eifupipiko lyOmwana gwaKalunga epona, sho a nyola a ti: “Oye okwa li e na uukwatya waKalunga, ye ina dhiladhila nando olumwe, a kambadhale nokuhakana okukala a fa Kalunga. Ihe okwi ihula uukalunga e ta zala olupe lwomupika. Oye okwa ningi a fa omuntu nokwa holoka molupe lwomuntu.” — Fil. 2:6, 7.

JESUS “OKWI IFUPIPIKE” NAASHO A LI KOMBANDA YEVI

Ongiini oshiholelwa shaJesus sheifupipiko tashi vulu oku tu etela uuwanawa?

7, 8. Jesus okwa li u ulike ngiini eifupipiko pethimbo sho a li omunona nosho wo pethimbo lyuukalele we kombanda yevi?

7 Omuyapostoli Paulus okwa nyola a ti: ‘Sho Jesus a holoka molupe lwomuntu, okwi i ifupipike nokwe ende ondjila yevuliko sigo omeso lye lyokomuti gwomahepeko.’ (Fil. 2:7, 8 yelekanitha NW.) Jesus okwe tu tulila po oshiholelwa oshiwanawa sheifupipiko monkalamwenyo ye ayihe okuza kuunona we. Nonando okwa li a putudhwa kaavali inaaya gwanenena, Josef naMaria, Jesus okwa “kala ha vulika  kuyo” neifupipiko. (Luk. 2:51) Jesus okwa tulila po aagundjuka oshiholelwa oshiwanaweelela shokuvulika. Kalunga ota ka laleka nuuyamba aagundjuka mboka taya vulika kaavali yawo.

8 Sho Jesus e li omukuluntu, okwa li u ulike eifupipiko mokupititha komeho ehalo lyaKalunga monkalamwenyo ye, pehala lyokukala ta lalakanene iinima yopaumwene. (Joh. 4:34) Jesus okwa li ha longitha edhina lyaKalunga uuna e li muukalele. Okwa li a kwathele aantu mboka ye na omitima dhu uka ya mone ontseyo yashili yi na ko nasha nomaukwatya gaJehova noyi na ko nasha nelalakano ndyoka e nine aantu. Jesus okwa li wo ha kala metsokumwe naashoka ha longo aantu kombinga yaJehova. Moshiholelwa shegalikano shoka a gandja, Jesus okwa tumbula tango a ti: ‘Tate yetu, ngu u li megulu: Edhina lyoye nali yapulwe.’ (Mat. 6:9) Kungeyi, Jesus okwa li a lombwele aalanduli ye ya pitithe komeho okuyapulitha edhina lyaKalunga, oshinima shoka naye a li ha ningi. Pehulilo lyuukalele we kombanda yevi, Jesus okwa li a vulu okugalikana kuJehova ta ti: “Ongame onde ya [aayapostoli] tseyithile edhina lyoye notandi ka tsikila oku shi ninga.” (Joh. 17:26) Kakele kaashono, Jesus okwa li u ulike kutya kehe shoka a tompola muukalele we, okwa li e shi ningi omolwekwatho lyaKalunga. — Joh. 5:19.

9. Sakaria okwa hunganeka shike kombinga yaMesiasa, na Jesus okwa li a gwanitha ngiini ehunganeko ndyoka?

9 Sakaria okwa nyola oohapu dhopahunganeko kombinga yaMesiasa a ti: “Nyanyukweni, nyanyukweni, yantu yaSioni! Ligoleni kenyanyu, ne yomuJerusalem! Taleni, omukwaniilwa gweni ote ya kune! Ote ya nekandanga omusindani, ihe omuneifupipiko a londa okasino, okandoongilyona, ontana yokasino.” (Sak. 9:9) Oohapu ndhika odha li dha gwanithwa sho Jesus a yi muJerusalem manga oshituthi shOpaasa shomomumvo 33 inaashi thika. Opwa li engathithi lyaantu. Yamwe oya li ya yala oonguwo dhawo mondjila nayamwe iitayi yomilunga. Aantu oya li taya ligola notaya kaluka kenyanyu sho Jesus e ya muJerusalem. Nokuli naasho aantu ya li tayi igidha montaneho kutya ye Omukwaniilwa, okwa kala i ifupipika. — Mat. 21:4-11.

10. Jesus okwa li u ulike shike sho a vulika nehalo ewanawa sigo omeso?

 10 Sho Jesus Kristus a li kombanda yevi okwa kala omwiifupipiki nomuvuliki sigo omeso lye komuti gwomahepeko. Okwe shi ulika sha yela kutya aantu otaya vulu okukala aadhiginini kuJehova, kutya nduno oya makelwe shi thike peni. Jesus okwa aneke wo pomutenya iifundja yaSatana ngoka a ti kutya aantu ohaya longele owala Kalunga molwaashoka he ya ningile uuwanawa. (Job 1:9-11; 2:4) Kristus oku ulike wo kutya Jehova oye e na uuthemba wokupangela eshito alihe nonokutya omukalo gwe gwokupangela ogu li pauyuuki, sho a kala omudhiginini. Jehova okwa li a nyanyukwa shili sho a mono Omwana omwiifupipiki a kakatela uudhiginini we. — Lesha Omayeletumbulo 27:11.

11. Ekulilo lyaJesus Kristus olye etela aantu mboka yi itaala etegameno lini nalini?

11 Jesus okwa li wo a futu iikulila yaantu ayehe sho a alelwa komuti gwomahepeko. (Mat. 20:28) Omolwekuliloyambo ndyoka, Jehova ohe tu dhimine po oondjo dhetu metsokumwe niitegelelwa ye yuuyuuki, nomolwalyo otu na etegameno lyoku ka kala nomwenyo sigo aluhe. Paulus okwa nyola a ti: “Ngashika okuyona kwagumwe kwe etele aantu ayehe epangulo, osho tuu wo oshilonga shimwe shuuyuuki otashi mangulula aantu ayehe e taa pewa omwenyo.” (Rom. 5:18) Eso lyaJesus olya pala ondjila, opo Aakriste aagwayekwa ya ka kale nomwenyo sigo aluhe megulu nosho wo ‘oonzi dhilwe’ dhi ka kale nomwenyo sigo aluhe kombanda yevi. — Joh. 10:16; Rom. 8:16, 17.

‘MOMUTIMA ONDI ISHONOPEKA’

12. Jesus okwa li u ulike ngiini eifupipiko nuunambili mokuungaunga kwe naantu inaaya gwanenena?

12 Jesus oti ithana ayehe mboka ya ‘vulwa noya humbatekwa uudhigu’ ye ye kuye. Okwa ti: “Itsikeni ondjoko yandje, ne mu tseye ndje, oshoka ongame omunambili nomomutima ondi ishonopeka; notamu imonene evululuko.” (Mat. 11:28, 29) Eifupipiko nosho wo uunambili oya li yi inyengitha Jesus a kale omunahenda nokee na ontondo sho tu ungaunga naantu inaaya gwanenena. Okwa li e na ondjele mwaashoka a tegelela kaalongwa ye. Okwa li he ya pandula noku ya ladhipika. Ine ya ningitha ya kale ye wete ya fa inaaya pukuluka nenge kaaye na oshilonga. Jesus ka li ha gandagula yamwe nenge e ya thindile kongudhi. Pehala lyaashono, okwa li a shilipalekele aalongwa ye kutya ngele otaya hedha popepi naye nokutula miilonga elongo lye, otaye ki imonena oomwenyo dhawo evululuko, molwaashoka ondjoko ye kayi shi ondhigu nomutenge gwe omupu. Aantu yuukashikekookantu awuhe noyomapipi agehe oya li haya kala ya manguluka uuna ye li puye. — Mat. 11:30, yelakanitha NW.

Jesus okwa tula po oshiholelwa oshiwanawa shokukenukila yalwe

13. Ongiini Jesus a li a sile ohenda aantu mboka ya li taya mono iihuna?

13 Jesus okwa li ha kenukile aantu yomoshigwana shaIsraeli, molwaashoka oya li taya mono iihuna monkalamwenyo. Okwa li e na ko nasha noompumbwe dhawo. Sho a li popepi naJeriko, okwa adhele po aaposi yaali taya hehela,  Bartimeus namukwawo gulwe ngoka edhina lye inaali tumbulwa. Oya kala nokupula ekwatho kuJesus, ihe aantu oya li ye ya ganda ya geya noku ya lombwela ya mwene. Osha li oshipu kuJesus i ipwililike sho ta pulwa ekwatho kaaposi mboka. Ihe okwa li a pula ye etwe kuye. Okwa li e ya sile ohenda e ta tonatitha omeho gawo. Odhoshili kutya sho Jesus u ulike eifupipiko nokusila ohenda aantu aalunde, okwa li ta holele He, Jehova. — Mat. 20:29-34; Mark. 10:46-52.

‘NGOKA TI ISHONOPEKE OTA NENEPEKWA’

14. Omauwanawa geni ga monika notaga ka monika omolweifupipiko lyaJesus?

14 Aantu oyendji oya li ya mono enyanyu nosho wo uuwanawa owundji omolweifupipiko lyaJesus Kristus. Jehova okwa li a nyanyukwa okumona Omwana omuholike ta vulika nehalo ewanawa kuye. Aayapostoli naalongwa yaJesus oya li yi imonene evululuko puye, molwaashoka okwa li omunambili nokwi ishonopeka momutima. Iinima ngaashi oshiholelwa she, elongo lye nosho wo olupandu ndwoka a li e ya pe oya li ye yi inyengitha ya hume komeho pambepo. Aantu mboka ya li ya dhinika oya li ya mono uuwanawa meifupipiko lyaJesus, molwaashoka okwa li he ya kwathele, he ya longo noku ya tsa omukumo. Kakele kaashono, aantu ayehe mboka ya lenga ekuliloyambo lyaJesus, otaya ka mona uuwanawa tawu kalelele omolwalyo.

15. Uuwanawa washike Jesus a mona omolweifupipiko lye?

15 Mbela Jesus okwa mona ngaa uuwanawa washa omolweifupipiko lye? Eeno, molwaashoka okwa li a lombwele aalongwa ye a ti: ‘Ngoka ti ishonopeke, ota nenepekwa.’ (Mat. 23:12) Jesus okwa li a gwanithilwa oohapu ndhoka. Paulus okwa nyola a ti: “Kalunga okwe mu yele pombandambanda nokwe mu luku edhina enene li vule omadhina agehe, opo kehe shimwe megulu nokombanda yevi nomohi shi tse oongolo medhina lyaJesus. Nomokusimanekitha Kalunga He ayihe yi hokolole montaneho kutya Jesus Kristus oye Omuwa.” Jehova okwa li a yele Jesus omolweifupipiko lye nomolwaasho a kala omudhiginini sho a li kombanda yevi. Jehova okwa pe Omwana oonkondopangelo a pangele iishitwa ayihe okuza ngaa megulu sigo okombanda yevi. — Fil. 2:9-11.

JESUS ‘OTA KA LONDA ETEMBA A POPILE OSHILI NEIFUPIPIKO’

16. Oshike tashi ulike kutya Omwana gwaKalunga ota ka tsikila okuulika eifupipiko nomonakuyiwa?

16 Omwana gwaKalunga ota ka tsikila okuulika eifupipiko monakuyiwa. Omupisalomi okwa li a hunganeke nkene Jesus ta ka katukila onkantu aatondi ye okuza megulu, nokwe shi imbi a ti: “Esimano lyoye nali tane! Londa etemba lyiita, u popile oshili neifupipiko nuuyuuki.” (Eps. 45:5, OB-1954 [45:4, OB-1986]) Oshike ta ka ninga pehulilo lyElelo lyOomvula Eyuvi sho ‘ta ka sinda aapangeli nosho wo omapangelo noonkondo?’ Mbela ota ka kala ngaa natango omwiifupipiki? Eeno, molwaashoka ota ka “gandja [uukwaniilwa, NW] kuTate Kalunga.” — Lesha 1 Aakorinto 15:24-28.

17, 18. (a) Omolwashike sha simana kaapiya yaJehova ya landule oshiholelwa shaJesus sheifupipiko? (b) Oshike tatu ka kundathana moshitopolwa tashi landula?

17 Mbela tse otatu ka landula ngaa oshiholelwa shaJesus shokukala aaifupipiki? Otatu ka ningilwa shike sho Omukwaniilwa Jesus Kristus te ke ya okupangula aantu puArmagedon? Etompelo lye lyokulonda etemba lyiita olyo oku ka hupitha owala aaifupipiki naayuuki. Onkee ano, osha simanenena tu kokeke eifupipiko, opo tu vule oku ka hupithwa. Shimwe ishewe, ngaashi owala eifupipiko lyaJesus Kristus lya li lye mu etele uuwanawa nosho wo yalwe, natse ngele otu na eifupipiko otashi ka eta uuwanawa momikalo dhi ili nodhi ili.

18 Oshike tashi vulu oku tu kwathela tu landule oshiholelwa sheifupipiko shaJesus? Ongiini tatu vulu okukondja tu kale aaifupipiki, nonando ohapu kala omashongo? Omapulo ngaka otatu ke ga kundathana moshitopolwa tashi landula.