Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Novomba 2012

 Iinima mbyoka ya ningwa mondjokonona yOonzapo dhaJehova

‘Onkundana ndjoka yu uvu oya li ya dhenga mbanda kaaku na we’

‘Onkundana ndjoka yu uvu oya li ya dhenga mbanda kaaku na we’

ESIKU limwe sho omumwatate George Naish a mono ondumba yopaala dhi na uule woometa 18 muKanada, moshitopolwa shaSaskatchewan, mondoolopa yaSaskatoon pomangandjiina giinima mbyoka ya li hayi longithwa mIita yoTango yUuyuni okwa pula a ti: ‘Oopala adhihe ndhono odhashike?’ Okwa lombwelwa kutya odha li dha tungithwa oshungo yokukonga omakuthikuthi goradio pethimbo lyIita yoTango yUuyuni. Omumwatate Naish okwa hokolola a ti: “Mungame omwe ya edhiladhilo kutya otatu vulu okulongitha oopala ndhoka tu tunge ooshungo dhooradio, nosho sha li shi ende ngawo tu ye po nedhiladhilo lyokukala tu na ositaasi yoradio, opo iilonga yetu yokuuvitha yu uvike mombepo.” Konima yomvula yimwe, mo 1924 opwa li pwa totwa oradio yokutseyitha iinima yopalongelokalunga moKanada yedhina CHUC. Oyo oradio yotango ndjoka kwa li haku popiwa iinima yopalongelokalunga.

(1) Ositaasi moEdmonton, shi li muAlberta (2) Omumwatate tu ungaunga nomashina gokutuma omawi mombepo moToronto, shi li mOntario

Osha li ondunge ombwanawa okugandja uunzapo okupitila moradio, molwaashoka Kanada oshilongo oshinene, shi na uunene wu thike penenevi lyaEuropa. Omumwameme Florence Johnson ngoka a li ha longo koradio muSaskatoon, okwa ti: “Olupandu nalu ye koradio yetu, molwaashoka oya thikitha oshili kaantu oyendji mboka twa li itaatu vulu okupopya nayo paumwene. Molwaashoka oradio oya li oshinima oshipeepeeka, aantu oya li ya hala okuuva kehe shimwe shoka tashi popiwa ko.” Okuthika mo 1926, Aakonakoni yOmbiimbeli (hayi ithanwa Oonzapo dhaJehova kunena) oya li ye na oositaasi dhoradio dhopaumwene miilando ine yomuKanada. *

Ositaasi yaCHUC mondoolopa yaSaskatoon, yi li moSaskatchewan

Oshike sha li hashi uvika kooradio ndhono? Okwa li haku kala ongundu yaaimbi yomegongalo lyomoshitopolwa tayi hiki iihikomwa, nokwiimba omaimbilo gi ili nogi ili. Aamwatate oya li wo haya gandja iipopiwa nokuninga oonkundathana dhopaMbiimbeli. Omumwameme Amy Jones ngoka a li ha kutha ombinga moonkundathana okwa ti: “Ngele ndi li muukalele e to popi edhina lyandje, omathimbo gamwe omunegumbo ohayi mo ta ti kutya ‘ohandi ku uvu naanaa to popi koradio.’”

“Katwa li hatu vulu okuyamukula oongodhi adhihe ndhoka tadhi dhengelwa mosasiona, molwaashoka aapulakeni oya li haya dhenge ohukula paka po”

Aakonakoni yOmbiimbeli moshitopolwa Nova Scotia, moondolopa yaHalifax, oya li ya toto po opolohalama yokoradio ompe, hoka aapulakeni ya li haya dhengele nokupula omapulo ga pamba Ombiimbeli. Omumwatate gumwe okwa nyola a ti: “Aantu oya li ye hole shili okupulakena kopolohalama ndjika. Katwa li hatu vulu okuyamukula oongodhi adhihe ndhoka tadhi dhengwa, molwaashoka aapulakeni oya li haya dhenge ohukula paka po.”

 Aantu yamwe oya li ya taamba ko etumwalaka lyAakonakoni yOmbiimbeli, ihe yamwe inaye li taamba ko, ngaashi owala aantu yopethimbo lyomuyapostoli Paulus. (Iil. 17:1-5) Aantu oya li ya hokwa shoka yu uvu. Pashiholelwa, sho omulumentu gwedhina Hector Marshall u uvu Aakonakoni yOmbiimbeli taya popi embo Studies in the Scriptures koradio, okwa li a mbestele omambo ngoka, embo lyo-1 sigo eti-6. Konima yethimbo okwa nyola a ti: “Onda li nda dhiladhila kutya omambo ngoka otaga ka kwathela ndje ndi kale handi longo osikola yOsoondaha.” Ihe sho Hector a mana owala okulesha Embo lyo-1, okwa li a tokola a thige po ongeleka yawo. Okwa kala omuuvithi omulaadhi, nokwa kala ta longele Jehova nuudhiginini sigo omeso lye mo 1998. Omukuluntu gumwe gwetangakwiita lyaKanada J. A. MacDonald ngoka ha kala moshitopolwa shaNova Scotia, shi li muuzilo waKanada, sho u uvu moradio oshipopiwa “Uukwaniilwa owo owala tawu ke etela aantu epepelelo,” okwa li a lombwele omumwatate gumwe gwomoshitopolwa a ti: “Aantu yokontuntu yaCape Breton ohela oyu uva etumwalaka ewanawa kaaku na we ndyoka inaali uvika mo nale moshitopolwa shika.”

Ihe etumwalaka ndyoka olya li lya geyitha aasita. Aakatoolika yamwe moHalifax oya li ya popi kutya otaya ka hanagula po nokuli oositaasi dhooradio ndhoka hadhi pitike Aakonakoni yOmbiimbeli ya ningile ko oopolohalama dhawo. Mo 1928 aawiliki yomalongelokalunga oya li ya hwahwameke epangelo li indike Aakonakoni yOmbiimbeli kaayu uvithe we moradio. Ohaluka epangelo olya tseyitha kutya itali ka gandja oolisinisa oompe koositaasi dhooradio dhAakonakoni yOmbiimbeli dhi tsikile nokutuma omawi mombepo. Ihe opo aamwatate naamwameme yu ulike kutya shoka ya li taya ningilwa kashi li pauyuki, oya li ya andjaganeke okafo ke na epulo tali ti, Olye ano mwene gwewangandjo? Ihe nonando ongaaka, epangelo olya tindi okuningulula oolisinisa dhAakonakoni yOmbiimbeli kaaya kale we hayu uvitha mombepo.

Mbela shika osha li sha tyololokitha okangundu okashona kaapiya yaJehova mboka ya li muKanada? Omumwameme Isabel Wainwright okwa ti: “Petameko, aatondi yetu oya li ya fa ye shi pondola shili. Ihe onda li ndi shi kutya andola Jehova okwa li a hala tu tsikile nokugandja uunzapo moradio, ando ina pitika epangelo li tu keelele. Onkee ano, otwa li tu na okulundulula omukalo gwetu gwokuuvitha onkundana ombwanawa yUukwaniilwa, tatu shi ningi momukalo gulwe gwa dhenga mbanda.” Pehala lyokukala yi inekela unene mokugandja uunzapo moradio, Aakonakoni yOmbiimbeli moKanada oya tameke okukala tayu uvithile aantu momagumbo. Momukokomoko gwethimbo, oradio oya li ya kwathele lela mokwaandjaganeka ‘etumwalaka ndyoka inaali uvika nando onale’ mondjokonona yOonzapo dhaJehova moKanada.

^ okat. 4 Aamwatate moKanada oya li wo haya futu ooradio dhilwe dhi tume mombepo etumwalaka lyOmbiimbeli.