EENO, ihe omathimbo gamwe. Tala koshiholelwa shika. Deuteronomium 24:14, 15 ota ti: ‘Ino kotokela nakufutwa ohepele nomukweyi, ongele Omuisraeli omukweni nenge omukwiilongo. Ngele ito mu futu, ota kugile Omuwa onkugo, notashi ku ningile ondjo.’

Omukanda gumwe tagu popi kombinga yoshinima shoka, ogwa li gwa nyolwa methelemimvo etiheyali K.E.N. Ogwa li gwa adhika popepi naAshdod. Otagu popi kombinga yomulongi gweyana ngoka a ndopa okugandja iilya. Uuyelele mbuka owa li wa nyolwa koshikangwa tawu ti: ‘Konima sho omupiya gwoye a mana okupungula iilikolomwa konima yomasiku omashona ga ka pita, Shobay omwana gwaHoshayahu, okwe ya e ta kutha po ekumbatha lyomupiya gwoye. Ayehe mboka twa li tatu teya nayo iilya moshanga shomutenya, otaya ka gandja uumbangi kutya shoka nda popi oshoshili. Ngame kandi na ondjo moshipotha nando oshimwe. Ngele omupangeli ina gwanitha po oshinakugwanithwa she shokutokola kutya omupika gwoye na shunithilwe ekumbatha lye, ngoye shi ninga, omolwohenda. Ngele omupika gwoye ina shunithilwa ekumbatha lye, ino pumbwa okukala wa mwena.’

Omunandjokonona gwedhina Simon Schama okwa ti kutya omukanda nguka “otagu tu lombwele oshindji shi vulithe pwaashoka omupiya ha kala ti ipula nasho, uuna inaa galulilwa [ekumbatha lye]. Ogwa ti wo kutya omupiya okwa li e shi sha kombinga yoompango dhopaMbiimbeli, unene tuu ndhoka dhi li muLevitikus nomuDeuteronomium ndhoka itaadhi popile okuungaunga nayi noohepele.”