“Kalunga ketu, otatu ku hambelele e tatu tanga edhina lyoye lya simana.” — 1 ONDJAL. 29:13.

OMAIMBILO: 80, 50

1, 2. Jehova oha longitha ngiini iiniwe ye e tu kwathele?

JEHOVA oye Kalunga ngoka ha gandja. Kehe shimwe tu na, osha za kuye. Jehova oye mwene gwiingoli niisiliveli ayihe nosho wo oonzo dhopaunshitwe dhokombanda yevi. Oha longitha iinima mbyoka, e tu pe shoka twa pumbwa, opo tu kale nomwenyo. (Eps. 104:13-15; Hag. 2:8) MOmbiimbeli omu na omahokololo ogendji, taga popi nkene Jehova a li a longitha oonzo dhe pashikumithalonga, opo a pe aantu ye shoka ya pumbwa.

2 Uule womimvo 40, Jehova okwa li a pe oshigwana shaIsraeli omanna nomeya, sho sha li mombuga. (Eks. 16:35) Kungawo, okwa li e ya “gwanithile oompumbwe dhawo adhihe.” (Neh. 9:20, 21) Okupitila momuhunganeki Elisa, Jehova okwa li a longo oshikumithalonga, sho i indjipalitha uugadhi womuselekadhi ngoka a li omudhiginini. Omagano ngoka omuselekadhi a pewa kuKalunga, oge mu kwathele a vule okufuta oongunga dhe adhihe, nokonima okwa kala e na iimaliwa ye mu gwanena noyanamati. (2 Aak. 4:1-7) Kekwatho lyaJehova, Jesus okwa li wo a pe aantu iikulya niimaliwa mbyoka ya li ya pumbwa, pashikumithalonga. — Mat. 15:35-38; 17:27.

3. Oshike tatu ka kundathana moshitopolwa shika?

 3 Jehova ota vulu okulongitha kehe shoka a hogolola, a kwathele iishitwa ye. Nonando ongawo, okwa tegelela aapiya ye ya longithe iiniwe yawo, opo ya ambidhidhe iilonga mbyoka tayi longwa mehangano lye. (Eks. 36:3-7; lesha Omayeletumbulo 3:9.) Omolwashike Jehova a tegelela tu longithe iinima yetu yongushu miilonga ye? Aapiya aadhiginini yonale, oya li haya ambidhidha ngiini iilonga yaJehova pashimaliwa? Ehangano lyaJehova ohali longitha ngiini omayambidhidho gopashimaliwa ngoka haga gandjwa kunena? Omayamukulo komapulo ngoka, otatu ke ga kundathana moshitopolwa shika.

OMOLWASHIKE HATU PE JEHOVA?

4. Uuna tatu ambidhidha iilonga yaJehova, kungawo otatu mu ulukile shike?

4 Ohatu pe Jehova, molwaashono otu mu hole notwe mu pandula. Uuna tatu dhiladhila kwaashihe shoka e tu ningila, ihatu kala tu na iitya nomatumbulo. Omukwaniilwa David okwa li a popi shoka sha li sha pumbiwa, opo ku tungwe otempeli. Okwa popi kutya iinima ayihe tu na, oya za kuJehova nonokutya shoka tatu pe Jehova osha za mwaashoka e tu pa nale. — Lesha 1 Ondjalulo 29:11-14.

5. Omanyolo oge shi ulika ngiini kutya okugandja nehalo ewanawa, oku li oshitopolwa sha simanenena shelongelokalunga lyashili?

5 Okugandja oku li wo omukalo ngoka tagu ulike kutya otatu longele Jehova. Memoniko, omuyapostoli Johannes okwa li u uvu aapiya yaJehova yomegulu, tayi igidha taya ti: “Omuwa, Kalunga ketu! Owa gwana okusimanekwa omolweadhimo, esimano noonkondo, oshoka ongoye wa shiti iinima ayihe, nokehalo lyoye oyi li po noyi na omwenyo!” (Eh. 4:11) Odhoshili kutya Jehova okwa gwana okutumbalekwa nokusimanekwa, moku mu pa shoka oshiwanawa tu na. Mbela ito tsu kumwe nasho? Okupitila muMoses, Jehova okwa li a lombwele oshigwana shaIsraeli shi holoke koshipala she piituthi itatu yokomumvo. Molwaashono shoka osha li oshitopolwa shawo shokulongela Kalunga, Aaisraeli oya li haye ‘etele Jehova omagano.’ (Deut. 16:16) Sha faathana kunena, okugandja nehalo ewanawa nokwaambidhidha iilonga yomuuyuni awuhe yehangano lyaJehova, oku li oshitopolwa sha simanenena shokulongela Kalunga.

6. Omolwashike okugandja ku li oshinima oshiwanawa kutse? (Tala kethano lyopetameko.)

6 Okugandja oku li oshinima oshiwanawa kutse. Oshi li nawa, uuna tatu gandja pehala lyokukala owala tatu taamba. (Lesha Omayeletumbulo 29:21.) Dhiladhila owala kokanona ka pa aavali yako omagano, ngoka ka landa nokashonanima hoka ye ka pa. Odhoshili kutya aavali oye na okukala ya pandula omagano ngoka! Dhiladhila wo komumati nenge omukadhona ngoka tashi vulika ta kokola ondjila noku li pamwe naavali ye, ihe ohe ya ambidhidha niifutomwa yomegumbo. Nonando otashi vulika aavali yokanona kaya li ya tegelela ke shi ninge, otashi vulika ya taambe ko omagano ngoka, molwaashono oye shi kutya ogwo omukalo gwokuulika kutya oka pandula ashihe shoka aavali yako ye ka ningila. Sha faathana, Jehova oku shi kutya okugandja iinima yetu yongushu, oku li oshinima oshiwanawa kutse.

OKUGANDJA KWOPETHIMBO LYONALE

7, 8. Aapiya yaJehova yopethimbo lyOmbiimbeli oya tula po oshiholelwa shini shokwaambidhidha (a) iilonga yontumba kondandalunde? (b) iilonga yakwalukehe?

7 Okugandja iiniwe yetu kuJehova oku li oshinima sha simana shoka sha popiwa mOmbiimbeli. Poompito dhimwe, aapiya yaJehova oya li haya ambidhidha iilonga yontumba kondandalunde. Pashiholelwa, Moses okwa li a lombwele aantu ya gandje omayambidhidho gokutungitha etsalihangano. Omukwaniilwa David naye okwa li a ningi faathana shi na ko nasha nokutunga otempeli. (Eks. 35:5; 1 Ondjal. 29:5-9) Pethimbo lyomukwaniilwa Joas, aayambi oya li ya longitha iimaliwa ayihe mbyoka ya gandjwa meopaleko lyotempeli. (2 Aak. 12:4, 5) Sho aamwatate yomegongalo  lyopaKriste lyonale, ya li ya lombwelwa kutya muJudea omu na ondjala, oya “tokola kutya kehe gumwe gwomuyo na gandje iikwatha ngaashi ta vulu, opo yi tuminwe aamwayina meitaalo mbeyaka ya kala muJudea.” — Iil. 11:27-30.

8 Poompito dhilwe, aapiya yaJehova oya li haya gandja omayambidhidho gopashimaliwa kwaamboka haya kwatele komeho iilonga yaJehova. Pethimbo lyOmpango yaMoses, Aalevi kaya li haya mono uuthiga wawo ngaashi omazimo galwe. Pehala lyaashono, Aaisraeli oye ya pe iitimulongo ayihe, opo ya vule okugandja eitulomo kiilonga yawo yoketsalihangano. (Num. 18:21) Sha faathana, Jesus naayapostoli ye, oya li ya mono uuwanawa mwaashoka sha gandjwa kaakiintu “mboka ya li ya longitha omaliko gawo e taa yakula Jesus naalongwa ye.” — Luk. 8:1-3.

9. Iinima yini aantu ya li haya gandja pethimbo lyonale?

9 Odhoshili kutya omayambidhidho ngoka oga li ga yoolokathana. Sho Aaisraeli ya li taya ambidhidha iilonga yokutunga etsalihangano mombuga, otashi vulika ya li ya gandja sha miiniwe yawo mbyoka ya zi nayo kuEgipiti. (Eks. 3:21, 22; 35:22-24) Omimvo 2 000 nasha dha ka pita, Aakriste yamwe oya landitha po omapya nomagumbo gawo, iimaliwa e taye yi eta kaayapostoli. Konima yaashono, aayapostoli oya topolele mboka ye na ompumbwe, iimaliwa mbyoka. (Iil. 4:34, 35) Yalwe oya li haya pungula oshimaliwa, opo ya kale nokwaambidhidha iilonga yetu. (1 Kor. 16:2) Onkee ano, aantu ayehe kutya nduno aayamba nenge oohepele, oya li ya vulu okugandja sha. — Luk. 21:1-4.

OKUGANDJA KWOPETHIMBO LYETU

10, 11. (a) Ongiini tatu vulu okuholela aapiya yaJehova yopethimbo lyOmbiimbeli, mboka ya li ya gandja nehalo ewanawa? (b) Owu uvite ngiini sho wu na uuthembahenda wokwaambidhidha iilonga yUukwaniilwa?

10 Ohashi vulika tu pulwe tu gandje omayambidhidho kunena, omolwiinima yontumba kondandalunde. Pashiholelwa, mbela opu na omalongekidho taga ningwa, opo egongalo lyeni li tungilwe Oshinyanga shUukwaniilwa? Mbela Oshinyanga shUukwaniilwa sheni otashi opalekululwa? Otashi vulika tu shi kutya opu na ompumbwe yoshimaliwa kombinga yokwoopalekulula oshitayimbelewa shetu, ehala lyoshigongi shoshitopolwa nenge okukwathela aamwatate mboka ya dhengwa koshiponga shopaunshitwe. Ohatu gandja wo omayambidhidho ga kwathele mboka haya longo koombelewa dhetu oonene nosho wo kiitayimbelewa yetu muuyuni awuhe. Omayambidhidho getu ohaga longithwa natango okukwathela aatumwa, aakokolindjila yi ikalekelwa naatonatelishikandjo. Kapu na omalimbililo kutya egongalo lyeni nalyo olya ninga okatokolitho, opo li kale hali ambidhidha pashimaliwa iilonga yomuuyuni awuhe yokutunga Iinyanga yiigongi nIinyanga yUukwaniilwa, iinima mbyoka hayi etele aamwatate uuwanawa kongonga yevi alihe.

11 Atuheni otatu vulu okwaambidhidha iilonga yaJehova mbyoka tayi longwa momasiku ngaka gahugunina. Olundji kapu na omuntu ha mono omayambidhidho ngoka hatu gandja. Ohatu ga tula mokaketha komayambidhidho pOshinyanga shUukwaniilwa nenge tu ga tume nepandja lyetu lyokointaneta, jw.org. Otashi vulika tu kale tu wete omayambidhidho getu omashona, noitaga ti sha. Uushili owo kutya omayambidhidho getu ogendji, ohaga zi owala mokashonanima hoka haka gandjwa koyendji, ihe haamwaashoka oshindji hashi gandjwa koohandimwe. Aamwatate kutya nduno oomboka ye na iiniwe iishona, oya fa Aakriste yomuMakedonia, mboka nayo ya li ye li ‘moluhepo olunene,’ ihe oya li ya halelela okugandja, noye shi ningi nehalo ewanawa. — 2 Kor. 8:1-4.

12. Ehangano ohali kambadhala ngiini okulongitha nawa omayambidhidho?

12 Olutuwiliki ohalu galikana, lu kale oludhiginini nolu kale lu na oondunge dhankene lu na okulongitha iimaliwa yehangano. (Mat. 24:45) Iimaliwa mbyoka haya mono, ohaye yi unganeke nawa nohaye yi longitha nawa. (Luk. 14:28)  Pethimbo lyOmbiimbeli, aayakuli mboka ya li haya tonatele iimaliwa, oya li haya shilipaleke kutya oya longithwa owala miilonga yaJehova. Pashiholelwa, Esra okwa li a shuna kuJerusalem nomayambidhidho ngoka a li a pewa komukwaniilwa gwaPersia, ngaashi oshingoli, oshisiliveli nosho wo iinima yilwe yi na ongushu yi vulithe N$ 1 300 000 000.00. Esra okwa li a tala ko iinima mbika yi li omayambo ngoka ga pewa Jehova, nokwa li a gandja omalombwelo gankene yi na okuhumbatwa mondjila ya nika oshiponga, ndjoka ya li taye ende. (Esra 8:24- 34) Omuyapostoli Paulus okwa li a gongele iimaliwa, opo a kwathele aamwahe yomuJudea mboka ya li mompumbwe. Okwa li a katuka oonkatu, opo a shilipaleke kutya mboka taya fala iimaliwa oye na “okuninga shoka shu uka, hakoshipala shOmuwa awike, ihe nokoshipala shaantu wo.” (Lesha 2 Aakorinto 8:18-21.) Ehangano kunena ohali longitha omayambidhidho ngoka gopashimaliwa nuukeka, ngaashi Ezra naPaulus ya li ya ningi.

13. Otu na okutala ko ngiini omalunduluko ngoka opo ga ningwa mehangano?

13 Uukwanegumbo otashi vulika wu ninge omalunduluko gankene wu na okukwata nawa iimaliwa yawo, opo wu yande iifutomwa oyindji. Otashi vulika wo wu pupaleke onkalamwenyo yawo, opo wu longe oshindji miilonga yaJehova. Shoka osha faathana nehangano lyaJehova. Omimvo opo dha zi ko, opwa kala nokuningwa iinima oyindji tayi nyanyudha. Omathimbo gamwe, iinima mbyoka oya ningitha pu longithwe oshimaliwa oshindji shi vulithe shoka tashi ya mo. Onkee ano, ehangano olya kongo po omikalo dhankene tali vulu okushunitha pevi iifutomwa nokupupaleka iilonga, opo li vule okuninga ngaashi tali vulu nomayambidhidho ngoka ga gandjwa.

OMAUWANAWA NGOKA HAGA ZI MOMAYAMBIDHIDHO GOYE

Omayambidhidho goye ohaga kwathele miilonga yomuuyuni awuhe (Tala okatendo 14-16)

14-16. (a) Iinima yimwe yini tayi gwanithwa nomayambidhidho goye ngoka wa gandja? (b) Omomikalo dhini wa mona mo uuwanawa momasiloshimpwiyu ngoka?

14 Aapiya yaJehova mboka ye mu longela ethimbo nuule, oya ti kutya inaya mona nale ehangano tali gandja iikulya yopambepo oyindji ngaashi kunena. Shoka itashi kumitha tuu! Omimvo opo dha zi ko, otwa mono sho pwa ndulukwa epandja lyetu lyokointaneta, jw.org nosho wo opolohalama yotiivii JW. Opwa nyanyangidhwa wo Ombiimbeli yo-New World Translation of the Holy Scriptures momalaka ogendji noonkondo. Mo 2014 nomo 2015, puupale wumwe uunenenene miilando 14 muuyuni awuhe, opwa li pwa ningilwa oshigongi shopaigwana shomasiku gatatu, shoka sha li shi na oshipalanyolo: “Kongeni tango Uukwaniilwa waKalunga!” Mboka ya li po, oya li ya nyanyukwa shambishi megumbo mwa tselwa.

15 Oyendji oya li yu ulike kutya oya pandula komauwanawa ga dhenga mbanda, ngoka ya pewa  kehangano lyaJehova. Pashiholelwa, shi na ko nasha nopolohalama yotiivii JW, aaihokani yamwe mboka haya longele moshilongo shi li menenevi Asia, oya nyola ya ti: “Ohatu longele moshilando oshishona. Shoka oshe tu ningitha omathimbo gamwe tu kale tu uvite twa yoololwa ko notu dhimbwe oshinakugwanithwa shoka twa pewa miilonga yaJehova. Ihe nziya sho twa tala oopolohalama dhi ili nodhi ili dhotiivii JW, oshe tu kwathele tu dhimbulukwe kutya otu li oshitopolwa shuumwayinathana wopaigwana. Aamwatate naamwameme yomoshitopolwa oya nyanyukilwa shili opolohalama yotiivii JW. Olundji ohatu yu uvu taya ti kutya konima ngele ya tala oopolohalama dhokomwedhi, ohaya kala yu uvite ye li popepi niilyo yOlutuwiliki. Ngashingeyi oyu uvite uuntsa nuunambano shi vulithe nale, sho ye li oshitopolwa shehangano lyaKalunga.”

16 Muuyuni awuhe, konyala Iinyanga yUukwaniilwa 2 500, oyi ipyakidhilwa nokutungwa nenge nokwoopalekululwa. Konima sho aamwatate naamwameme yamwe ya tameke okulongitha Iinyanga yUukwaniilwa yawo iipe, iilyo yimwe yomegongalo li li moHonduras, oya nyola ya ti: “Otwa nyanyukwa shili sho tu li oshitopolwa shuukwanegumbo waJehova naasho tatu nyanyukilwa uumwayinathana womuuyuni awuhe, oshoka iinima mbyoka oye tu kwathela tu mone Oshinyanga shUukwaniilwa momudhingoloko gwetu, ngaashi twa kala noku shi dhiladhila ethimbo ele.” Oyendji oyu ulike olupandu lwa faathana, konima sho ya pewa Ombiimbeli niileshomwa mbyoka ya tolokwa melaka lyawo. Mboka ya dhengwa kiiponga yopaunshitwe nayo oyu ulike olupandu lwawo, konima sho ya kwathelwa kaamwatate naamwameme. Omanga yamwe, ya pandula, sho ya mono iizemo iiwanawa mokuuvithila aantu mboka haya kala miilando iinene nosho wo mokugandja uunzapo womontaneho.

17. Omukalo moka ehangano hali longo kunena, otagu ulike ngiini kutya otali ambidhidhwa kuJehova?

17 Aantu mboka ihaaya longele Jehova, ihaye shi uvu ko nkene hashi wapa kutse okulonga iilonga ayihe mbyoka tatu longitha owala omayambidhidho gopashimaliwa gehalo ewanawa. Omukuluntu gumwe gwomehangano limwe enene, okwa li e endithwa mo mehala lyetu lyokunyanyangidha. Okwa li a kumwa okutseya kutya iilonga ayihe mbyoka, oya gwanithwa kaantu tayi iyamba nokomayambidhidho gehalo ewanawa, ihe kaku shi kiimaliwa ya za mokulanditha nenge momikalo dhilwe. Okwa ti kutya itatu vulu nando okugwanitha po iilonga mbyoka kutse yene. Otatu tsu kumwe naye lela! Otu shi shi kutya iilonga mbyoka otayi vulu owala okulongwa kekwatho lyaJehova, ngoka te yi ambidhidha. — Job 42:2.

OMAYAMBEKO NGOKA HATU MONO, UUNA TATU GANDJA KUJEHOVA

18. (a) Omayambeko geni hatu mono, uuna tatu ambidhidha Uukwaniilwa? (b) Ongiini tatu vulu okudheula aanona yetu naamboka aape ya kuthe ombinga miilonga mbyoka?

18 Jehova ohe tu pe oompito tu ambidhidhe iilonga ye kunena. Okwe tu shilipaleka kutya otatu ka mona omayambeko, ngele otatu ambidhidha Uukwaniilwa. (Mal. 3:10) Jehova oku uvaneka kutya ngoka ha gandja ota ka kutithwa. (Lesha Omayeletumbulo 11:24, 25.) Okugandja ohaku tu nyanyudha wo, oshoka Ombiimbeli otayi ti: “Okugandja oku na elago ku vule okutaamba.” (Iil. 20:35) Okupitila moohapu dhetu nomiilonga yetu, otu na uuthembahenda wokudheula aanona yetu naamboka aape ya ninge sha faathana, opo ya vule okunyanyukilwa omayambeko ogendji.

19. Oshitopolwa shika oshe ku tsa ngiini omukumo?

19 Kehe shimwe tu na, osha za kuJehova. Uuna tatu mu pe sha, otatu ulike kutya otu mu hole notwa pandula ashihe shoka e tu ningila. (1 Ondjal. 29:17) Sho Aaisraeli ya li taya tungu otempeli, “oya gandja nehalo kOmuwa noya li yu uvite elago unene, sho ya gandja.” (1 Ondjal. 29:9) Sha faathana, natse natu tsikile okukala twa nyanyukwa notu uvite ombili, sho tatu pe Jehova shoka e tu pa.