Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 5 2016

 OMBIIMBELI OHAYI LUNDULULA ONKALAMWENYO YAANTU

Onda li omuhahu nondi hole elongithonkondo

Onda li omuhahu nondi hole elongithonkondo
  • OMUMVO A VALWA: 1974

  • OSHILONGO MOKA A VALELWA: MEKSIKO

  • ONDJOKONONA: OMUGUNDJUKA GWOMIMVO OMULONGA NASHA NGOKA E HOLE ELONGITHONKONDO NOKUKONDJA MOMAPANDAANDA

ONAKUZIWA YANDJE:

Onda valelwa moCiudad Mante, oshitopolwa oshiwanawa shomoshilando Tamaulipas, Meksiko. Olundji aakalimo yamo ohaya gandja noye na ombili. Ihe shinikitha oluhodhi, molwaashoka omwa li mu udha omiyonena, osha li sha nika oshiponga noonkondo okukala mo.

Otwa valwa aamati yane, ngaye omutiyali kevalo. Aavali yandje oya shashitha ndje mongeleka yaKatoolika, nokonima yethimbo onda li handi kutha ombinga molwiimbo lwegongalo. Onda li nda hala okukala nda hokiwa kuKalunga, molwaashoka onda li nda tila noonkondo okupangulwa noku ka pya sigo aluhe moheli.

Sho ndi na oomvula ntano tate okwe tu thigi po. Shoka osha li sha nikitha ndje oluhodhi olunene nosha thigi ndje kaandi na iitya nomatumbulo. Kanda li ndi uvite ko kutya omolwashike e tu thigi po, oshoka otwa li tu mu hole unene. Meme okwa li ha ka longa uule woowili odhindji, opo e tu sile oshimpwiyu.

Omolwonkalo mono nda li, onde etha po osikola e tandi tameke okweendathana nuunona uukuluntu kungame. Oya longo ndje okutukana, okuhila omakaya, okuyaka nokukondja noongonyo. Molwaashono onda li ndi hole okupangela yalwe, ondi ilongo uudhano woongonyo, ompindi, onkandeka nosho wo okulongitha iilwitho. Onda kala ndi hole elongithonkondo sho ndi na omimvo omulongo nasha. Olundji onda li handi kutha ombinga momalugodhi gokukondja noondjembo, niikando oyindji onda li handi thigwa metente lyombinzi mepandaanda te hala okusa. Osha li hashi nikitha meme oluhodhi uuna ta adha ndje monkalo ya fa mpoka. Oha kutha ndje po meendelelo e ta fala ndje koshipangelo.

Sho nda li ndi na omimvo 16, omugundjuka gumwe, Jorge, ngoka a li kuume kandje sho twa li aanona, okwe tu talele po maandjetu. Okwe tu lombwele kutya ye Onzapo yaJehova nokwa hala okukundathana natse etumwalaka lya simana. Okwa tameke oku tu lombwela kombinga yaashoka i itaala, ta longitha Ombiimbeli. Inandi yi lesha nando onale, nonda li nda nyanyukwa okwiilonga kombinga yedhina lyaKalunga nelalakano lye. Jorge okwa pula a konakone Ombiimbeli natse, notwe shi taamba ko.

NKENE OMBIIMBELI YA LUNDULULA ONKALAMWENYO YANDJE:

Onda li nda pepelelwa sho ndi ilonga oshili kutya oheli kayi shi elongo lyopaMbiimbeli. (Episalomi 146:4; Omuuvithi 9:5) Sho nde shi tseya, inandi kala we ndi na uumbanda wokutila Kalunga, molwaashono nda tila oku  ka pya moheli. Pehala lyaashono onda tameke oku mu tala ko e li Tate omunahole ngoka a halela oyana uuwanawa.

Sho nda tsikile nekonakonombiimbeli lyandje, onda mono kutya onda pumbwa okuninga omalunduluko monkalamwenyo yandje. Onda li nda pumbwa okukokeka uukwatya weifupipiko nokweetha po elongithonkondo. Omayele ngoka taga adhika mAakorinto yotango 15:33 oga kwathela ndje. Otaga ti kutya eendathano ewinayi “otali yonagula omikalo omiwanawa.” (NW) Onda li nda mono kutya ngele onda hala okulundulula onkalamwenyo yandje, onda pumbwa okweetha po okweendathana naantu mboka ye na enwethomo ewinayi. Onkeene onde etha po ookuume kandje yonale e tandi tameke okweendathana nookuume mboka yomegongalo lyashili lyopaKriste. Aantu mboka oye etha po omaukwatya gawo omawinayi. Inaye shi ninga taya longitha oongonyo nenge oonkondo, ihe omakotampango gOmbiimbeli.

Omayele galwe ga guma ndje, oongoka taga adhika mAaroma 12:17-19. Otaga ti: ‘Inamu mu shunithila uuwinayi. Ne yene kombinga yeni ningeni ashihe tamu shi vulu, mu kale nombili naantu ayehe. Inamu shunithila omuntu uuwinayi, oshoka enyolo otali ti kutya egeelo olyandje, ongame mwene tandi ka geela, Omuwa osho ta ti.’ Onde shi zimine kutya Jehova ota ka hulitha po okwaanuuyuuki momukalo gwe nopethimbo lye. Onde ende tandi etha po elongithonkondo kashonanakashona.

Itandi ka dhimbwa nando shoka sha li sha ningwa po ongulohi yimwe manga nda li tandi shuna kegumbo. Ongundu yaagundjuka aalongi yomuyonena moka nda li nale oya ponokele ndje, nomuwiliki gwawo okwa dhenge ndje kombunda, e ti igidha ta ti “Igamena mwene!” Pethimbo opo tuu mpono, onda galikana paufupi kuJehova, tandi mu pula a kwathele ndje ndi idhidhdimikile eponokelo ndyoka. Nonando onda li ndu uvite lela nda hala oku ya shunithila uuwinayi, pehala lyoku shi ninga, onde shi pondola okuza po puyo. Esiku lya landula onda tsakanene nomuwiliki gwongundu ndjoka. Onda kwatwa kongeyo nonda li nda hala oku mu shunithila uuwinayi, ihe onda galikana ishewe momwenyo kuJehova a kwathele ndje ndi ipangele. Onda li nda kumwa sho omugundjuka ngoka e ya kungame e ta ti: “Dhimina ndje po sho nde ku hindile ongulohi. Uushili owo kutya onda hala okukala nde ku fa. Onda hala okukonakona Ombiimbeli.” Onda li nda nyanyukwa sho nda li nda pangele ongeyo yandje. Onda pandula sho naye a hala okukonakona Ombiimbeli.

Shiyemateka, yaandjetu kaya li ya tsikile nokukonakona Ombiimbeli pethimbo ndyoka. Ihe onda ningi etokolo lya kwata miiti ndi tsikile okukonakona nokaandi ethe omuntu nenge sha shi imbe ndje oku shi ninga. Onda li ndi shi kutya okweendathana aluhe noshigwana shaKalunga otaku ka aludha iilalo yandje yopamadhiladhilo notaku kaleke ndje muukwanegumbo mboka nda pumbwa. Onda tsikile okuninga ehumokomeho, nomo 1991 onda ninginithwa ndi li Onzapo yaJehova.

NKENE OMBIIMBELI YA LUNDULULA ONKALAMWENYO YANDJE:

Onda li omuhahu, ndi hole okupangela yalwe nondi hole elongithonkondo. Ihe Oohapu dhaKalunga odha lundulula lelalela onkalamwenyo yandje. Ngashingeyi ohandi tseyithile kehe gumwe ngoka e na ohokwe okupulakena etumwalaka lyombili okuza mOmbiimbeli. Onda li nda mono uuthembahenda wokukala omulongi gwethimbo lyu udha uule womimvo 23.

Onda li nda longo iilonga yokwiiyamba uule wethimbo moshitayimbelewa shOonzapo dhaJehova moMeksiko. Onda tsakanene mo naClaudia, omugundjuka ependa, notwa yi naye mondjokana mo 1999. Onda li nda pandula Jehova sho a pe ndje kuume kopandjokana omudhiginini.

Otwa li twa longo pamwe megongalo lyElaka lyOkuudhika moMeksiko, tatu kwathele oombolo dhi ilonge kombinga yaJehova. Konima yethimbo, otwa li twa pulwa tu tembukile koBelize, tu ka longe aantu yako etumwalaka lyOmbiimbeli. Nonando katwa li twi indumbile iinima yopamaliko monkalamwenyo yetu, otwa li tu na ashihe shoka twa pumbwa, opo tu kale twa nyanyukwa. Onkalamwenyo yetu itatu ke yi lundulula niinima yilwe.

Konima yethimbo meme okwa tamekulula ekonakonombiimbeli lye e ta ninginithwa. Omumwamememati omukuluntu, omukulukadhi gwe noyana nayo ngashingeyi oye li Oonzapo dhaJehova. Yamwe yomookuume kandje yonale mboka nda li nda tseyithile etumwalaka lyUukwaniilwa ngashingeyi otaya longele wo Jehova.

Shinikitha oluhodhi, yaandjetu yamwe oya sa, molwaashoka inaya lundulula iikala yawo yokulongitha oonkondo. Ando onda landulile iikala yawo, otashi vulika ando nangame nda sa nale. Onda pandula sho Jehova a hilile ndje kuye nokaalongeli ye, mboka ya longa ndje neidhidhimiko nonombili okutula miilonga omakotampango gOmbiimbeli monkalamwenyo yandje.