Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 5 2016

 IITOPOLWA YI IKOLELELA KOSHIPALANYOLO SHOKOMBANDA | OPENI TO VULU OKWAADHA EHEKELEKO?

Ehekeleko pethimbo lyuudhigu

Ehekeleko pethimbo lyuudhigu

Omaupyakadhi ohaga adha aantu momikalo dhi ili nodhi ili. Itatu vulu okupopya omaupyakadhi agehe, ihe natu tale nawa kiiholewa ine mbyoka twa kundathana metetekelo. Ndhindhilika nkene aantu mboka ya li ya taalela omaupyakadhi ga yoolokathana ya li ya mona ehekeleko lyashili okuza kuKalunga.

UUNA WA KANITHA IILONGA

“Ondi ilongo okutaamba ko iilonga kehe, notwa kambadhala okushunitha pevi iifutomwa yetu.” — Jonathan

Seth * ota ti: “Ngame nomukulukadhi gwandje otwa li twa kanitha iilonga yetu pethimbo limwe. Otwa kala uule woomvula mbali hatu hupu mwaashoka hatu pewa kaakwanezimo nomiilonga yopakathimbo. Oshilanduliko, omukulukadhi gwandje, Priscilla, okwa kwatwa kepolimano, na ngame onda kala ndu uvite kaandi na oshilonga.

“Otwe shi pondola ngiini? Priscilla okwa kala aluhe hi dhimbulukitha oohapu dhaJesus ndhoka dhi li muMateus 6:34. Okwa ti kutya katu na okukala tu na oshimpwiyu nesiku lyangula, oshoka esiku kehe otali isile lyo lyene oshimpwiyu. Omagalikano ge taga zi komutima oge mu kwathele a pule komeho. Monkalo yandje, Episalomi 55:22 olya kwathela ndje. Nangame onda fala uudhigu wandje kuJehova, ngaashi omupisalomi a li a ningi nonda mono kutya okwa kwathela ndje. Nonando ngashingeyi ondi na iilonga, otwa kaleke onkalamwenyo yetu inaayi kitakana, tayi tsu kumwe nomayele gaJesus ngoka taga adhika muMateus 6:20-22. Komeho gaayihe, otwa hedha popepi naJehova notu na ekwatathano lyopothingo.”

Jonathan okwa ti: “Onda li nda tila kutya onkalo otayi ka kala ngiini sho okangeshefa ketu ka mbangolota. Molwaashono uuhupilo owa li tawu nyangwanyangwa, oomvula 20 ndhoka twa kala tatu longo nuudhigini eihepeko lyowala. Ngame nomukulukadhi gwandje otwa tameke hatu nyenyeta kombinga yiimaliwa. Katwa li nokuli hatu landa nokakalata kombaanga, molwaashono otwa li tu shi kutya kaku na sha.

“Ihe Oohapu dhaKalunga nombepo ye ondjapuki oye tu kwathela tu ninge omatokolo ge li mondjila. Ondi ilongo okutaamba ko iilonga kehe, notwa kambadhala okushunitha pevi iifutomwa yetu. Tu li Oonzapo dhaJehova, otwa yambidhidhwa wo kooitaali ooyakwetu. Oye tu nkondopaleke noye tu kwathele pethimbo twa li muudhigu wa kwata miiti.”

 UUNA ONDJOKANA YA TEKA

Raquel okwa ti: “Sho omusamane gwandje a thigi ndje po ombaadhilila, onda li ndi uvite nayi noonkondo. Onda li nda gwililwa po koluhodhi olunene. Ihe onda hedha popepi naKalunga, nokwa hekeleke ndje. Ombili yaKalunga oya gamene omutima gwandje sho nda kala handi mu galikana esiku kehe. Onda li ndi wete a pupaleka omutima gwandje ngoka gwa li gwa dhengwa pevi.

“Onda pandula wo Oohapu dhe, Ombiimbeli, sho dha kwathela ndje kaandi kale ndi uvite nayi nokukala ihaandi kwatele onkone. Onda taamba ko nomutima aguhe oohapu dhomuyapostoli Paulus ndhoka dhi li mAaroma 12:21, tadhi ti: ‘Inamu sindwa kuuwinayi, ihe sindeni uuwinayi nuuwanawa.’

“Opu na ‘ethimbo lyokukanitha.’ . . . Ngashingeyi ohandi dhiladhila iinima mbyoka tayi tungu ndje pehala lyaambyoka tayi teya ndje omukumo.” — Raquel

“Kuume kandje gumwe okwa kwathela ndje ndi mone kutya onda pumbwa okupula komeho. Oku ulukile ndje Omuuvithi 3:6 e ta lombwele ndje nombili ta ti kutya opu na “ethimbo lyokukanitha.” Oga li omayele ga kwata miiti, ihe ogo nda li nda pumbwa. Ngashingeyi ohandi dhiladhila iinima mbyoka tayi tungu ndje pehala lyaambyoka tayi teya ndje omukumo.”

Elizabeth okwa ti: “Ngele ondjokana ya teka, omuntu oho kala wa pumbwa eyambidhidho. Onda li ndi na kuume kopothingo ngoka a li ha yambidhidha ndje esiku nesiku. Okwa li ha lili pamwe nangame, ha tsu ndje omukumo noha ningitha ndje ndi kale ndi uvite ndi holike, pehala lyokukala ndi wete ndi tondike. Onda li nda tompwa lela kutya Jehova okwe mu longitha a aludhe iilalo yandje yopamaiyuvo.”

UUNA TO EHAMA NENGE WA KULUPA

“Uuna nda galikana kuKalunga, ohandi kala ndi uvite ombepo ye ya nkondopaleka ndje.” — Luis

Luis ngoka a popiwa moshitopolwa shotango shomiitopolwa mbika ya pambathana, oku na uuvu womutima wa kwata miiti. Uuvu mboka owaale wu mu faalele nokuli iikando iyali. Ngashingeyi oha kala uule woowili 16 mesiku keshina lyokufudhitha. Okwa ti: “Ohandi galikana kuJehova aluhe. Uuna nda mana okugalikana, ohandi kala ndi uvite ombepo ye ya nkondopaleka ndje. Egalikano ohali tsu ndje omukumo ndi pule komeho, molwaashono ondi na eitaalo muJehova nondi shi kutya ota vulu okukwatha ndje.”

Petra ngoka e na omimvo 80 nasha okwa ti: “Onda hala okuninga oshindji, ihe itandi vulu. Okutala sho kaandi na we oonkondo kashi shi oshipu. Ohandi kala ndi uvite nda vulwa, nonkalamwenyo yandje oyi ikolelela owala komiti. Olundji ohandi dhiladhila kunkene Jesus a li a pula He a pitike onkalo ondhigu yi pite po ngele otashi wapa. Jehova okwa li e mu nkondopaleke, noha nkondopaleke ndje wo. Egalikano ohali panga ndje esiku  kehe. Ohandi kala ndi uvite nawa uuna nda popi naKalunga megalikano.” — Mateus 26:39.

Julian, ngoka a li a kwatwa komukithi hagu kukutike oontumba dholutu, hagu ithanwa multiple sclerosis uule womimvo 30, okwa li u uvite ngaashi Luis naPetra. Okwa ti: “Sho nda kwatwa komukithi ngoka onda thigi po iilonga yomombelewa e tandi yi kokatemba. Onda li ndi wete onkalamwenyo yandje yaa na oshilonga, molwaashono onda li he silwa oshimpwiyu ethimbo kehe. Okupewa ohaku hwepopaleke onkalo, na Jehova oha gwanitha ehunganeko lye lyoku tu nkondopaleka methimbo lyuudhigu. Ngaashi omuyapostoli Paulus, otandi vulu okutya: ‘Ngame otandi vulu shaa shoka, oshoka Kristus ota koleke ndje.’” — Aafilippi 4:13.

UUNA WA SILWA

Antonio okwa ti: “Sho tate a si a pumwa kohauto, petameko kanda li tandi vulu oku shi itaala. Osha li tashi monika lela kaashi li pauyuuki, molwaashono okwa li ti iyendele owala kolupadhi. Ihe nonando ongawo, kanda li ndi na sho te vulu okuninga po. Okwa li mokoma uule womasiku gatano manga inaa sa. Onda kala tandi ikelele okulila sho ndi li pumeme, ihe sho nda kala ongame awike onda tameke okulila. Onda kala tandi ipula kutya ‘omolwashike? Omolwashike?’

“Pethimbo ndyoka lyuudhigu, onda kala tandi pula Jehova a kwathele ndje ndi pangele omaiyuvo gandje nondi kale ndi na ombili. Kashonanakashona onde ende tandi ngungumana. Onda dhimbulukwa kutya Ombiimbeli oya popya kutya ‘iiningwanima inaayi tegelelwa’ (NW) otayi vulu okwaadha kehe gumwe. Molwaashono Kalunga iha fundju, onda li nda tompwa kutya otandi ka mona tate konima ye yumuko.” — Omuuvithi 9:11; Johannes 11:25; Titus 1:2.

“Nonando okamwanamati ketu oka sila moshiponga shondhila, ohatu dhimbulukwa natango iinima iiwanawa mbyoka twa kala hatu nyanyukilwa pamwe.” — Robert

Robert ngoka a popiwa moshitopolwa sha tetekele, naye okwa li monkalo ya faathana. Okwa ti: “Ngame nomukulukadhi gwandje, otwa mono ombili yopamadhiladhilo ndjoka ya popiwa maAafilippi 4:6, 7. Otwe yi mono sho twa kala hatu galikana kuJehova. Ombili ndjoka oye tu kwathele tu popye twa manguluka nomutoolinkunda gumwe kombinga yetegameno lyetu lyeyumuko. Nonando okamwanamati ketu oka sila moshiponga shondhila, ohatu dhimbulukwa natango iinima iiwanawa mbyoka twa kala hatu nyanyukilwa pamwe. Ohatu kambadhala tu gandje eitulomo kuyo.

“Sho Oonzapo oonkwetu dhe tu lombwele kutya odhe tu mona kotiivi tatu popi kombinga yeitaalo lyetu twa ngungumana, otwe dhi lombwele kutya otwe shi ningi omolwomagalikano geni. Ondi itaala kutya Jehova okwe tu yambidhidha okupitila momatumwalaka gawo gehekeleko.”

Ngaashi iiholelwa ya tetekele tayi shi ulike, Kalunga ota vulu okugandja ehekeleko kwaamboka ya taalelwa komaupyakadhi ge vule oonkondo dhawo. Ongiini kombinga yoye? Kashi na mbudhi kutya owa taalelwa kuupyakadhi wu thike peni monkalamwenyo, opu na ngoka ta vulu oku ku kwathela pethimbo lyuudhigu. * Omolwashike itoo kongo ekwatho kuJehova? Oye “Kalunga, ngoka kuye haku zi ekwatho alihe.” — 2 Aakorinto 1:3

^ okat. 5 Omadhina gayamwe moshileshwa shika oga lundululwa.

^ okat. 23 Ngele owa hala okuhedha popepi naKalunga nokumona ehekeleko kuye, kwatathana nOonzapo dhaJehova moshitopolwa sheni nenge wu nyolele koshitayimbelewa shoka shi li popepi nangoye.