Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 5 2016

Olusilu lwaEla

David okwa kondjitha Goliat — Mbela osha ningwa ngaa shili?

David okwa kondjitha Goliat — Mbela osha ningwa ngaa shili?

Aantu yamwe ohayi ipula ngele ehokololo lyaDavid naGoliat olyoshili ngaa nenge omahokololo gowala. Mbela nangoye osho wa li to ipula sho wa li to lesha oshitopolwa sha zi ko? Ngele osho, tala komapulo gatatu taga landula.

1 | Mbela omuntu ota vulu ngaa okukala shili e na uule woometa 2.9?

Ombiimbeli oya ti kutya Goliat okwa li “gwomuthika gwoometa ndatu konyala.” (1 Samuel 17:4) Omatoloko galwe gOmbiimbeli ogu ulike kutya Goliat okwa li e na uule woometa 2.9. Yalwe ohaye shi pataneke kutya Goliat ka li nando e na uule wu thike mpoka, ihe tala kwaashika tashi landula: Pethimbo lyonale, omuntu ngono a li omule e vule ayehe okwa li e na uule woometa 2.7. Mbela odhoshili kutya Goliat ka li ta vulu okukala e na uule woosendimeta 15 nenge omule e vulithe po? Okwa li gwomezimo lyAarefaim, aalumentu mboka ye na uule inaawu monika nando onale. Aaegipiti mboka ya li ko omimvo 800 dha ka pita, oya li aakwiita aatilithi ya kala moshitopolwa shaKaanana ye na oometa 2.4 lwaampono. Molwaashono Goliat okwa li omuleeleka inaashi monika nale aantu kaya li taya vulu oku shi itaala.

2 | Mbela David okwa li omuntu gwolela?

Opu na ethimbo limwe aakonakoni ya li taya kambadhala okutala ko ehokololo lyomukwaniilwa David kaali shi lyoshili, ihe inaye shi pondola. Aalafululi yiikulunima oya li yi itsu emanya lyonale lya nyolwa oohapu ndhoka dha tolokwa tadhi ti kutya “egumbo lyaDavid.” Natango, Jesus Kristus okwa popi kutya David omuntu gwolela. (Mateus 12:3; 22:43-45) Opu na uuyelele wopaali mboka tawu ulike kutya Jesus ngoka e li Mesiasa okwa za mezimo lyomukwaniilwa David. (Mateus 1:6-16; Lukas 3:23-31) Osha yela kutya David okwa li omuntu gwolela.

3 | Mbela iiningwanima mbyoka ya popiwa mehokololo ndino oya ningilwa shili pomahala mpono?

Ombiimbeli oya ti kutya olugodhi olwa ningilwa molusilu lwaEla. Osha popiwa sha yela kutya Aafilisti oya li ya yunga ontanda kiikulundundu pokati kaSoko naAseka. Aaisraeli oya li handiyaka yesilu lya taalelathana niikulundundu. Mbela ndino olya li ehala lyolela?

Gumwe ngoka a li a talele po oshitopolwa shoka okwa ti: “Omuwiliki gwetu ngoka kaa li omulongelikalunga okwe tu fala kolusilu lwaEla. Otwe ende mondjila ndjoka yu uka kondungu yondundu. Sho twa tala molusilu, okwa ti natu leshe 1 Samuel 17:1-3. Opo ihe oku ulike handiyaka yesilu e ta ti: ‘Kolumoho lwoye oku na omakulukuma gaSoko.’ Okwa tanauka e ta ti: ‘Handiyaka yokolulyo lwoye oku na omakulukuma gaAseka. Aafilisti oya li ya yungu ontanda pokati kaSoko naAseka lwopiikulundundu mbyoka mwa taalela. Onkene otashi vulika twa thikameni mpoka Aaisraeli ya li ya yunga ontanda.’ Opo ihe otwa kuluka ko tu uka mesilu, otwa taaguluka okapompolonga hoka olundji haka kala ka kukuta, noka li ku udha omamanya. Kanda li po poshiningwanima, ihe David onda fa owala ndi mu wete sho ta toola uumanya utano wa thethenga, moka a kutha kamwe hoka a dhipagitha nako Goliat.” Omutalelipo ngoka naye okwa li a kumwa, ngaashi yalwe oyendji ya li ya kuminwa noonkondo uuyelele wu shi okwiinekelwa mboka wa popiwa mOmbiimbeli.

Kapu na etompelo lyolela lyokukala twa limbililwa oshili yehokololo ndika lyopandjokonona. Otali popi aantu yolela nomahala golela. Shoka sha simana, ehokololo ndika oli li mOohapu dhaKalunga dha nwethwa mo, onkee olya za kuKalunga omunashili ngoka “ihaa fundju.” — Titus 1:2; 2 Timoteus 3:16