L-Ispirtu Qaddis—Jaħdem fil-Ħolqien!
L-Ispirtu Qaddis—Jaħdem fil-Ħolqien!
“Bil-kelma taʼ Ġeħova ntgħamlu s-smewwiet, u bl-ispirtu taʼ fommu l-armata kollha tagħhom.”—SALM 33:6.
1, 2. (a) L-għarfien tal-bniedem dwar is-smewwiet u l-art kif żdied matul iż-żmien? (b) Liema mistoqsija tirrikjedi tweġiba?
META Albert Einstein ippubblika t-teorija speċjali tiegħu tar-relattività fl-1905, hu u ħafna xjenzati oħrajn kienu jemmnu li l-univers kien jikkonsisti minn galassja waħda biss—it-Triq tal-Ħalib. Lanqas biss kellhom ħjiel kemm hu kbir l-univers! Issa huwa maħsub li fl-univers hemm ’il fuq minn 100 biljun galassja, u xi wħud jikkonsistu minn biljuni taʼ stilel. Hekk kif fuq l-art qed jintużaw teleskopji iktar sofistikati, jew jitpoġġew f’orbita madwarha, qed jiġu skoperti iżjed u iżjed galassji.
2 Bħalma kien limitat l-għarfien xjentifiku dwar is-smewwiet fl-1905, hekk ukoll kien limitat l-għarfien dwar l-art. Veru, in-nies li kienu jgħixu seklu ilu kienu jafu iktar minn dawk taʼ qabilhom. Madankollu, is-sbuħija u l-komplessità tal-ħajja u l-modi li bihom l-art issostni l-ħajja huma ħafna iktar mifhumin illum milli kienu dak iż-żmien. U aħna bla dubju se nitgħallmu ħafna iktar dwar l-art u s-smewwiet fis-snin li ġejjin. Iżda hu xieraq b’mod speċjali li nistaqsu, L-ewwel nett dan kollu kif sar? Nistgħu biss insiru nafu t-tweġiba għal din il-mistoqsija għax il-Ħallieq irrivelaha permezz tal-Iskrittura Mqaddsa.
Il-Miraklu tal-Ħolqien
3, 4. Alla kif ħalaq l-univers, u xogħlijietu kif jigglorifikawh?
3 Il-mod kif l-univers beda jeżisti hu spjegat fil-kliem li tiftaħ bih il-Bibbja: “Fil-bidu Alla ħalaq is-smewwiet u l-art.” (Ġen. 1:1) Ladarba ma kien jeżisti ebda materjal qabel, Ġeħova uża l-ispirtu qaddis tiegħu—il-forza attiva tiegħu kollha qawwa—biex joħloq is-smewwiet fiżiċi, l-art, u kulma hemm fl-univers. Bniedem tas-sengħa juża jdejh u l-għodod biex jagħmel l-affarijiet, iżda Alla jibgħat l-ispirtu qaddis tiegħu biex iwettaq ix-xogħlijiet kbar tiegħu.
4 B’mod figurattiv, l-Iskrittura tirreferi għall-ispirtu qaddis bħala s-“sabaʼ” t’Alla. (Lq. 11:20; Mt. 12:28) U “xogħol idejh”—dak li Ġeħova ħalaq permezz tal-ispirtu qaddis tiegħu—iġiblu glorja kbira. Is-salmista David kanta: “Is-smewwiet jiddikjaraw il-glorja t’Alla; u dwar xogħol idejh titkellem il-firxa tas-sema.” (Salm 19:1) Tabilħaqq, il-ħolqien fiżiku jagħti xhieda tal-qawwa tal-għaġeb li għandu l-ispirtu qaddis t’Alla. (Rum. 1:20) Dan kif jagħmlu?
Il-Qawwa bla Limitu t’Alla
5. Iddeskrivi l-qawwa kreattiva tal-ispirtu qaddis taʼ Ġeħova.
5 L-univers vast tagħna li lanqas biss nistgħu nimmaġinaw kemm hu kbir jagħti evidenza li l-qawwa u l-enerġija taʼ Ġeħova huma bla limitu. (Aqra Isaija 40:26.) Ix-xjenza moderna hi konxja li l-materja tistaʼ tinbidel f’enerġija u l-enerġija f’materja. Ix-xemx tagħna, li hi stilla, tipprovdi eżempju taʼ materja li saret enerġija. Kull sekonda, ix-xemx tbiddel madwar erbaʼ miljun tunnellata materja f’dawl tax-xemx u f’forom oħrajn taʼ enerġija radjanti. Il-frazzjoni żgħira taʼ din l-enerġija li tilħaqna hi biżżejjed biex issostni l-ħajja fuq l-art. Ovvjament, kien jeħtieġ qawwa u enerġija tremenda biex jinħalqu mhux biss ix-xemx iżda wkoll il-biljuni l-oħrajn taʼ stilel. Ġeħova għandu l-enerġija li kienet meħtieġa—u ħafna iktar.
6, 7. (a) Għala nistgħu ngħidu li Alla uża l-ispirtu qaddis tiegħu bl-ordni? (b) X’juri li l-univers ma ġiex b’kumbinazzjoni?
6 Aħna ninsabu mdawrin b’evidenza li Alla uża l-ispirtu qaddis tiegħu tassew bl-ordni. Sabiex nagħtu eżempju: Immaġina li għandek kaxxa kollha blalen taʼ kuluri differenti. Ċaqlaq il-kaxxa ’l hemm u ’l hawn ħalli l-blalen jitħawdu sew. Imbagħad itfagħhom mal-art kollha f’daqqa. Taħseb li l-blalen se jaqgħu mal-art skont il-kulur tagħhom—il-blalen il-blu għalihom, is-sofor għalihom, eċċetra? Dażgur li le! L-azzjonijiet bla kontroll dejjem ikollhom it-tendenza li jwasslu għal inqas, u mhux għal iktar, ordni. Dan il-fatt hu aċċettat bħala liġi fundamentali tan-natura. a
7 Madankollu, meta nerfgħu ħarsitna lejn is-sema u nifluh permezz taʼ teleskopji, x’naraw? Naraw sistema kbira u organizzata ferm taʼ galassji, stilel, u pjaneti, kollha jiċċaqalqu bi preċiżjoni kbira. Dan ma jistax ikun ir-riżultat taʼ xi kumbinazzjoni jew inċident kosmiku mhux pjanat u mhux kontrollat. Mela, għandna nistaqsu, Liema forza ġiet użata oriġinalment sabiex tipproduċi l-univers tagħna magħmul bl-ordni? Aħna l-bnedmin limitati fl-abbiltà tagħna li nidentifikaw din il-forza permezz taʼ osservazzjoni xjentifika u esperimentazzjoni biss. Madankollu, il-Bibbja identifikat din il-forza li hi l-iktar qawwija fl-univers bħala l-ispirtu qaddis t’Alla. Is-salmista kanta: “Bil-kelma taʼ Ġeħova ntgħamlu s-smewwiet, u bl-ispirtu taʼ fommu l-armata kollha tagħhom.” (Salm 33:6) U b’għajnejna nistgħu naraw biss parti żgħira ħafna minn din l-“armata” taʼ stilel hekk kif inħarsu lejn is-sema bil-lejl!
L-Ispirtu Qaddis u l-Art
8. Kemm tassew nafu dwar ix-xogħlijiet taʼ Ġeħova?
8 Dak li nifhmu fil-preżent dwar in-natura lanqas biss jibda meta jitqabbel maʼ dak kollu li hemm x’nitgħallmu. Rigward l-għarfien limitat tagħna dwar ix-xogħlijiet tal-ħolqien t’Alla, ir-raġel leali Ġob ikkonkluda: “Ara! Dawn m’humiex ħlief it-trufijiet taʼ triqatu, u kemm hu ftit dak li nisimgħu dwaru!” (Ġob 26:14) Sekli wara, is-Sultan Salamun, li kien josserva l-ħolqien taʼ Ġeħova bir-reqqa, iddikjara: “Kulma għamel [Alla] għamlu sabiħ u f’waqtu. Saħansitra poġġielhom f’qalbhom l-eternità, sabiex il-bnedmin qatt ma jsiru jafu mill-bidu sat-tmiem l-għemil li għamel l-Alla l-veru.”—Ekk. 3:11; 8:17.
9, 10. Alla liema forza uża meta ħalaq l-art, u x’kienu xi żviluppi matul l-ewwel tlett ijiem tal-ħolqien?
9 Madankollu, Ġeħova rrivela dettalji essenzjali dwar xogħlijietu. Pereżempju, l-Iskrittura tgħarrafna li l-ispirtu t’Alla kien attiv fuq l-art żmien twil ilu. (Aqra Ġenesi 1:2.) Dak iż-żmien, fid-dinja ma kien hemm ebda art niexfa, ebda dawl, u milli jidher ebda arja tajba li ssostni l-ħajja.
10 Il-Bibbja tkompli tiddeskrivi dak li għamel Alla matul il-jiem tal-ħolqien. Dawn mhumiex jiem taʼ 24 siegħa iżda epoki. Fl-ewwel jum tal-ħolqien, Ġeħova ġiegħel li d-dawl jibda jidher fuq wiċċ l-art. Dan il-proċess kellu jitlesta meta x-xemx u l-qamar iktar tard bdew jidhru sew mill-art. (Ġen. 1:3, 14) Fit-tieni jum, bdiet tiġi fformata l-atmosfera. (Ġen. 1:6) Imbagħad id-dinja kellha l-ilma, id-dawl, u l-arja, iżda kien għad ma kellhiex art niexfa. Kmieni fit-tielet jum tal-ħolqien, Ġeħova uża l-ispirtu qaddis tiegħu biex jipproduċi art niexfa, forsi billi uża l-forzi ġeoloġiċi qawwijin tiegħu biex feġġew il-kontinenti mill-baħar. (Ġen. 1:9) Fit-tielet jum u matul perijodi tal-ħolqien iktar tard kellu jkun hemm żviluppi meraviljużi oħrajn.
L-Ispirtu Qaddis u l-Ħlejjaq Ħajjin
11. Il-komplessità, is-simetrija, u s-sbuħija tal-ħlejjaq ħajjin taʼ xiex jagħtu evidenza?
11 L-ispirtu t’Alla pproduċa wkoll ħlejjaq ħajjin organizzati ferm. Mit-tielet jum sas-sitt jum tal-ħolqien, Alla ħalaq varjetà tal-għaġeb taʼ pjanti u annimali permezz tal-ispirtu qaddis tiegħu. (Ġen. 1:11, 20-25) B’hekk, il-ħlejjaq ħajjin jipprovdu eżempji bla għadd taʼ komplessità, simetrija, u sbuħija li jagħtu evidenza taʼ disinn tal-ogħla livell.
12. (a) Id-DNA jwettaq liema funzjoni? (b) X’għandna nitgħallmu mill-funzjoni kontinwa u li tirnexxi tad-DNA?
12 Ikkunsidra d-DNA (deoxyribonucleic acid), wieħed mill-mekkaniżmi kimiċi involuti f’li jgħaddu l-karatteristiki tal-organiżmi minn ġenerazzjoni għal oħra. Il-ħlejjaq ħajjin kollha fuq l-art—inkluż il-mikrobi, il-ħaxix, l-iljunfanti, il-balieni l-koħol, u l-bnedmin—jirriproduċu billi jużaw id-DNA. Għalkemm il-ħlejjaq tal-art huma differenti ferm minn xulxin, il-kodiċi li tikkontrolla ħafna mill-karatteristiki li jirtu hi tassew stabbli u sservi biex iżżomm id-distinzjoni bejn l-ispeċi differenti taʼ annimali matul iż-żminijiet. Skont l-iskop t’Alla Ġeħova, l-organiżmi differenti tal-art għalhekk ikomplu jwettqu l-funzjonijiet tagħhom fl-ekoloġija kumplessa tal-art. (Salm 139:16) Dan l-arranġament tassew effettiv u bl-ordni jipprovdi iktar evidenza li l-ħolqien hu xogħol is-“sabaʼ” t’Alla, jew l-ispirtu qaddis.
L-Iktar Ħolqien Importanti fuq l-Art
13. Alla kif ħalaq il-bniedem?
13 Wara li għaddew snin sħaħ li matulhom Alla kien ipproduċa numru bla għadd taʼ xogħlijiet bil-ħajja u bla ħajja, l-art ma baqgħetx bħalma kienet qabel—“bla forma u ma kien fiha xejn.” Iżda Ġeħova kien għadu ma waqafx juża l-ispirtu tiegħu għal skopijiet taʼ ħolqien. Hu kien se jipproduċi l-iktar ħolqien importanti fuq l-art. Lejn tmiem is-sitt jum tal-ħolqien, Alla ħalaq il-bniedem. Ġeħova kif għamel dan? Billi uża l-ispirtu qaddis tiegħu u l-elementi tal-art.—Ġen. 2:7.
14. Il-bnedmin b’liema mod importanti huma differenti mill-annimali?
14 Ġenesi 1:27 jgħid: “Alla ħalaq il-bniedem fix-xbieha tiegħu, fix-xbieha t’Alla ħalqu; raġel u mara ħalaqhom.” Il-fatt li aħna magħmulin fix-xbieha t’Alla jfisser li Ġeħova ħalaqna bl-abbiltà li nuru mħabba, neżerċitaw il-libertà tal-għażla, u saħansitra nistabbilixxu relazzjoni persunali mal-Ħallieq tagħna. Għalhekk, moħħna hu differenti ħafna minn dak tal-annimali. B’mod speċifiku, Ġeħova ddisinja l-moħħ tal-bniedem b’tali mod li nkunu nistgħu nkomplu nitgħallmu iktar bil-ferħ dwaru u dwar xogħlijietu għal dejjem.
15. Liema prospett tqiegħed quddiem Adam u Eva?
15 Fil-bidu tal-umanità, Alla ta l-art u l-meravilji kollha tagħha lil Adam u lil martu, Eva, biex jiskopruha u jgawduha. (Ġen. 1:28) Ġeħova pprovda ikel bl-abbundanza, kif ukoll ġenna tal-art bħala dar għalihom. Huma kellhom l-opportunità li jgħixu għal dejjem u jsiru l-ġenituri maħbubin taʼ biljuni taʼ dixxendenti perfetti. Madankollu, mhux hekk ġara.
Nirrikonoxxu l-Irwol tal-Ispirtu Qaddis
16. Liema tama għandna minkejja r-ribelljoni tal-ewwel bnedmin?
16 Minflok ma obdew bi gratitudni lill-Ħallieq tagħhom, Adam u Eva rribellaw b’mod egoist. Il-bnedmin imperfetti kollha huma dixxendenti tagħhom, u b’hekk kellhom ibatu. Iżda l-Bibbja tispjega kif Alla se jirranġa l-ħsara kollha kaġunata mill-ħajja midinba li għażlu l-ewwel ġenituri tagħna. L-Iskrittura turi wkoll li Ġeħova se jwettaq l-iskop oriġinali tiegħu. L-art se ssir ġenna mimlija b’nies hienja, f’saħħithom, u mberkin b’ħajja taʼ dejjem. (Ġen. 3:15) Sabiex inżommu l-fidi f’dan il-prospett li jqawwi l-qalb neħtieġu l-għajnuna tal-ispirtu qaddis t’Alla.
17. Liema tip taʼ rraġunar għandna nevitaw?
17 Għandna nitolbu lil Ġeħova għall-ispirtu qaddis. (Lq. 11:13) Jekk nagħmlu dan se nsaħħu l-konvinzjoni tagħna li l-ħolqien hu xogħol idejn Alla. Illum qed naraw mewġa taʼ propaganda ateistika u evoluzzjonista li hi msejsa fuq irraġunar żbaljat jew bla bażi. M’għandniex inħallu dan il-viżibilju taʼ rraġunar żbaljat jikkonfondina jew ibeżżagħna. Il-Kristjani kollha għandhom iħejju ruħhom biex jirreżistu din il-propaganda u l-pressjoni minn taʼ madwarhom li hi konnessa magħha.—Aqra Kolossin 2:8.
18. Meta wieħed jikkunsidra l-oriġini tal-univers u l-umanità, għala ma jkunx għaqli li jelimina l-fatt li hemm Ħallieq intelliġenti?
18 Il-fidi fil-Bibbja u f’Alla nnifsu żgur li se tissaħħaħ jekk nagħmlu eżami onest tal-evidenza li tappoġġa l-ħolqien. Meta jirriflettu dwar l-oriġini tal-univers u tal-umanità, ħafna nies iħossu li mhuwiex raġunevoli li wieħed jemmen li fil-ħolqien tal-univers kienet involuta xi forza partikulari, ħlief dawk il-forzi li tistaʼ tingħata prova xjentifika tagħhom. Iżda kieku kellna niddiskutu l-kwistjoni minn dan il-lat ma nkunux qed niżnu l-evidenza kollha b’mod imparzjali. Iktar minn hekk, inkunu qed ninjoraw l-eżistenza ovvja tal-affarijiet “bla għadd” fil-ħolqien li għandhom skop u li huma fl-ordni. (Ġob 9:10; Salm 104:25) Bħala Kristjani, aħna ċerti li l-forza attiva involuta fil-ħolqien kienet l-ispirtu qaddis taħt it-tmexxija intelliġenti taʼ Ġeħova.
L-Ispirtu Qaddis u l-Fidi Tagħna f’Alla
19. X’jipprovdi evidenza persunali tal-eżistenza t’Alla u tal-ħidma tal-ispirtu tiegħu?
19 M’għandniex għalfejn inkunu nafu kollox dwar il-ħolqien sabiex ikollna fidi f’Alla kif ukoll imħabba u riverenza profonda lejh. Bħal ħbiberija maʼ xi ħadd, il-fidi f’Ġeħova hi bbażata fuq iktar minn sempliċi fatti. Sewwasew bħalma relazzjoni bejn il-ħbieb tikber hekk kif isiru jafu lil xulxin aħjar, il-fidi tagħna f’Alla tikber meta nitgħallmu iktar dwaru. Tabilħaqq, l-eżistenza nfisha tiegħu tagħmel impatt fuqna meta hu jwieġeb talbna u ninnotaw l-effetti tajbin li jiġu meta napplikaw il-prinċipji tiegħu f’ħajjitna. Aħna nersqu dejjem eqreb lejn Ġeħova hekk kif naraw iż-żieda fl-evidenza li hu qed jiggwida l-passi tagħna, jipproteġina, ibierek l-isforzi tagħna fis-servizz tiegħu, u jipprovdilna l-affarijiet li neħtieġu. Dan kollu jikkonferma b’mod qawwi l-eżistenza t’Alla u tal-ħidma tal-ispirtu qaddis tiegħu.
20. (a) Alla għala ħalaq l-univers u l-bniedem? (b) X’se jirriżulta jekk inkomplu nsegwu t-tmexxija tal-ispirtu qaddis t’Alla?
20 Il-Bibbja hija eżempju li jispikka taʼ kif Ġeħova juża l-forza attiva tiegħu għax il-kittieba tagħha “tkellmu minn Alla skond kif tmexxew mill-ispirtu qaddis.” (2 Pt. 1:21) Studju bir-reqqa tal-Iskrittura jistaʼ jibnilna l-fidi f’Alla bħala l-wieħed li ħalaq l-affarijiet kollha. (Riv. 4:11) Ġeħova sar il-Ħallieq biex juri l-kwalità tal-imħabba tiegħu li tiġbidna lejh. (1 Ġw. 4:8) Ejja, mela, nagħmlu l-almu tagħna biex ngħinu lil oħrajn jitgħallmu dwar il-Missier u l-Ħabib tagħna li jħobbna u li qiegħed fis-sema. Fil-każ tagħna, jekk inkomplu nkunu mmexxijin mill-ispirtu t’Alla, se jkollna l-privileġġ li nitgħallmu dwaru għal dejjem. (Gal. 5:16, 25) Jalla lkoll kemm aħna nkomplu nitgħallmu dwar Ġeħova u dwar ix-xogħlijiet kbar tiegħu u nuru fil-ħajja tagħna l-imħabba bla qies li wera hu meta uża l-ispirtu qaddis tiegħu biex joħloq is-smewwiet, l-art, u l-umanità.
[Nota taʼ taħt]
a Ara paġni 24 u 25 tal-ktieb Is There a Creator Who Cares About You?
Tistaʼ Tispjega?
• L-eżistenza tas-smewwiet u l-art x’tgħallimna dwar il-mod kif Alla juża l-ispirtu qaddis?
• Liema opportunitajiet għandna minħabba li aħna magħmulin fix-xbieha t’Alla?
• Għala għandna bżonn neżaminaw l-evidenza tal-ħolqien?
• Ir-relazzjoni tagħna maʼ Ġeħova b’liema modi tistaʼ tikber?
[Mistoqsijiet taʼ Studju]
[Stampa f’paġna 7]
L-ordni li naraw fl-univers x’tgħallimna dwar il-ħolqien?
[Sors]
Stilel: Anglo-Australian Observatory/David Malin Images
[Stampi f’paġna 8]
Id-DNA b’liema mod tinsab f’dawn l-affarijiet kollha?
[Stampa f’paġna 10]
Int preparat biex tiddefendi l-fidi tiegħek?