Bini Spiritwali fid-“Dar tal-Ġebel”
Bini Spiritwali fid-“Dar tal-Ġebel”
L-isem taʼ dan il-pajjiż Afrikan ifisser “Dar tal-Ġebel.” Huwa pajjiż magħruf sew għall-Victoria Falls u għall-varjetà t’annimali u pjanti li fih. Madankollu, dan fih ukoll l-akbar bini antik li qatt sar mill-bniedem ’l isfel mid-deżert Saħara. Fih ukoll wita art tal-granit li tgħaddi minn ġo nofsu. Il-klima moderata f’dik il-medda art toħloq veduta mżewqa t’art fertili mimlija siġar u ħaxix. Dan il-pajjiż huwa Żimbabwe, li fih joqogħdu madwar 12-il miljun ruħ.
GĦALA jissejjaħ Dar tal-Ġebel? Fl-1867, Adam Renders, kaċċatur u esploratur, wasal ħdejn strutturi kbar tal-ġebel li kienu mifruxin f’medda t’art taʼ iktar minn 7,285 kilometru kwadru. Hu kien qed jivvjaġġa fin-nofsinhar taʼ l-Afrika, fejn id-djar ġeneralment kienu magħmulin mit-tajn, pilastri, u soqfa tal-ħaxix. Imbagħad wasal ħdejn il-fdalijiet tal-ġebel taʼ belt kbira, li llum tissejjaħ Great Zimbabwe.
Dawn il-fdalijiet qegħdin eżatt fin-nofsinhar taʼ post li llum huwa magħruf bħala Masvingo. Xi wħud mill-ħitan huma għoljin iktar minn disaʼ metri, u huma magħmulin mill-granit mingħajr tajn bejn ġebla u oħra. Fost dawn il-fdalijiet hemm torri, li ġej għat-tond u li jidjieq hekk kif jitlaʼ ’l fuq. Dan għandu għoli taʼ madwar 11-il metru u l-bażi tonda tiegħu hija wiesgħa sitt metri. L-iskop speċifiku taʼ dan it-torri għadu mhux magħruf. Il-fdalijiet imorru lura sat-tmien seklu E.K., imma hemm evidenza li dan il-post kien abitat min-nies mijiet taʼ snin qabel dan.
Fl-1980, il-pajjiż li dak iż-żmien kien magħruf bħala r-Rodeżja ħa l-indipendenza tiegħu mill-Britannja u ngħata l-isem taʼ Żimbabwe. In-nies li joqogħdu f’dan il-pajjiż jinkludu żewġ gruppi etniċi—ix-Shona, li jifformaw l-akbar parti mill-popolazzjoni, u l-grupp l-ieħor li jismu Ndebele. In-nies jilqgħu lil dak li jkun, kif spiss jinnotaw ix-Xhieda taʼ Ġeħova fix-xogħol taʼ l-ippridkar tagħhom minn dar għal dar. Xi drabi anki qabel ma jsiru jafu min qed iżurhom, mat-taħbita fuq il-bieb ġieli tismaʼ min jgħidlek “Idħol ġewwa” u “Jekk jogħġbok poġġi bil-qiegħda.” Ħafna min-nies taʼ Żimbabwe għandhom rispett profond lejn il-Bibbja u ħafna drabi jinsistu biex waqt diskussjonijiet Skritturali, it-tfal joqogħdu bil-qiegħda u jisimgħu.
Jiġi Offrut Messaġġ Inkuraġġanti u taʼ Faraġ
L-“AIDS” u n-“nixfa” huma żewġ kelmiet li jintużaw spiss fl-aħbarijiet meta jissemma Żimbabwe. Il-firxa taʼ l-AIDS kellha effett serju fuq il-popolazzjoni u fuq l-ekonomija tal-pajjiżi ’l isfel mid-deżert tas-Saħara fl-Afrika. Hawnhekk, ir-raġunijiet għala ħafna nies jidħlu l-isptar ikollhom x’jaqsmu maʼ l-HIV. Din il-marda qerdet il-ħajja tal-familja taʼ ħafna nies.
Sabiex jgħinu lin-nies f’Żimbabwe, ix-Xhieda taʼ Ġeħova jinsabu beżlin jiddikjaraw li l-aħjar mod taʼ ħajja huwa wieħed gwidat mil-livelli t’Alla kif murijin fil-Bibbja. Per eżempju, il-Kelma t’Alla tgħallem li l-għotja mingħand Alla taʼ l-intimità sesswali għandha titgawda biss fiż-żwieġ, li l-omosesswalità m’hijiex aċċettata minn Alla, u li t-trasfużjonijiet tad-demm u l-użu tad-droga huma projbiti mil-liġi taʼ Ġeħova. (Atti 15:28, 29; Rumani 1:24-27; 1 Korintin 7:2-5; 2 Korintin 7:1) Ix-Xhieda jxerrdu wkoll messaġġ taʼ tama li hija bbażata fis-sod, li jgħid li fil-futur qarib, is-Saltna t’Alla se tneħħi l-mard kollu.—Isaija 33:24.
Jingħataw Provvisti t’Għajnuna
In-nixfa ħalliet effetti koroh fuq Żimbabwe matul dawn l-aħħar għaxar snin. Annimali salvaġġi spiċċaw biex mietu minħabba l-ġuħ u l-għatx. L-imrieħel mietu bil-mijiet t’eluf. In-nirien ħarbtu kilometri sħaħ taʼ foresti li mis-siġar tagħhom jittieħed l-injam. Ħafna tfal u xjuħ mietu minħabba l-malnutrizzjoni. Saħansitra l-livelli tax-xmara kbira Zambezi tant tbaxxew li l-impjanti tagħha li jiġġeneraw l-elettriku permezz taʼ l-ilma kważi waqfu jiffunzjonaw.
Minħabba din il-ħsara kbira, ix-Xhieda taʼ Ġeħova ħatru tmien kumitati għall-għajnuna f’diversi partijiet tal-pajjiż. Indokraturi li jivvjaġġaw żaru lill-kongregazzjonijiet biex jaraw xi bżonnijiet kien hemm. L-informazzjoni mbagħad ngħatat lil wieħed mill-kumitati għall-għajnuna. Wieħed indokratur li jivvjaġġa rrapporta: “Matul dawn l-aħħar ħames snin, aħna qassamna iktar minn elf tunnellata taʼ qamħirrum, għaxar tunnellati taʼ ħut imnixxef, u l-istess kwantità taʼ ful ħelu. L-aħwa spiritwali tagħna pproċessaw żewġ tunnellati taʼ mufushwa [ħaxix imnixxef]. Aħna qassamna wkoll kwantitajiet kbar taʼ ħwejjeġ li ngħataw bħala donazzjoni kif ukoll fondi li kienu meħtieġa.” Indokratur li jivvjaġġa ieħor qal: “Meta nirrifletti dwar id-diffikultajiet li għaddejna minnhom biex niksbu l-permessi meħtieġa minn Żimbabwe u mill-Afrika t’Isfel biex inġibu dawn il-provvisti u dwar in-nuqqas li dejjem kien hemm għall-fuel li kellna bżonn biex nittrasportaw l-affarijiet li tant kien hemm bżonn, nistaʼ biss nikkonkludi li s-suċċess tagħna jagħti iktar evidenza taʼ Mattew 6:32.
l-assiguranza taʼ Ġesù li Missierna tas-sema jaf li għandna bżonn dawn l-affarijiet kollha.”—L-indokraturi li jivvjaġġaw kif ikampaw meta jkunu qed jaħdmu fi nħawi milqutin min-nixfa? Xi wħud iġorru l-ikel għalihom infushom u għall-familji li joqogħdu għandhom. Wieħed minnhom irrapporta li xi aħwa Kristjani nisa kienu qed jitkellmu bejniethom dwar jekk għandhomx jieqfu jippridkaw għal dakinhar sabiex ikunu jistgħu jmorru fil-kju ħalli jistennew il-provvisti t’għajnuna li kellhom jaslu mingħand il-gvern. Huma ddeċidew li jafdaw f’Ġeħova billi jiffokaw fuq l-attività taʼ l-ippridkar u jaraw kif kienu se jmorru l-affarijiet. L-ebda għajnuna mingħand il-gvern ma waslet dakinhar.
L-għada kien pjanat li ssir laqgħa Kristjana u dawn l-aħwa nisa riedu jieħdu deċiżjoni għal darba oħra. Kienu huma se jattendu l-laqgħa, jew kienu se jmorru jistennew il-wasla tal-provvisti t’għajnuna? Huma poġġew il-prijoritajiet tajbin u attendew il-laqgħa Kristjana fis-Sala tas-Saltna. (Mattew 6:33) Waqt li kienu qed ikantaw l-għanja taʼ l-għeluq, huma semgħu trakk riesaq. Il-provvisti kienu waslu eżatt hemmhekk, permezz taʼ ħuthom spiritwali fil-kumitat għall-għajnuna! Ix-Xhieda leali li attendew dik il-laqgħa esperjenzaw ferħ u gratitudni tassew kbar.
L-Imħabba Tibni
L-għemejjel taʼ mħabba lejn dawk li m’humiex parti mill-kongregazzjoni Kristjana fetħu l-bibien biex tingħata xiehda tajba. Indokratur li jivvjaġġa fl-inħawi taʼ Masvingo, flimkien maʼ xi Xhieda lokali oħrajn, kien qed jieħu sehem fix-xogħol taʼ l-ippridkar. Hu nnota tifla li kienet mixħuta fl-art maʼ ġenb it-triq. Ix-Xhieda ntebħu li din it-tifla kienet marida ħafna, għax lanqas biss setgħet titkellem sew u leħinha kien jirtogħod. Isem it-tifla kien Hamunyari, li bix-Shona jfisser “Ma Jmissekx Tistħi?” L-aħwa saru jafu li t-tifla kienet ġiet abbandunata mill-membri tal-knisja tagħha li kienu sejrin għal funzjoni reliġjuża fil-muntanji. Ix-Xhieda taw l-assistenza tagħhom kollha mħabba lit-tifla, u ħaduha f’raħal fil-qrib.
F’dak ir-raħal, xi nies kienu jafu min kienet Hamunyari, u għalhekk talbu lil xi qraba tagħha biex jiġu għaliha. Dwar ix-Xhieda, in-nies tar-raħal qalu: “Din hija r-reliġjon vera. Din hija l-imħabba li l-Kristjani jridu juru.” (Ġwanni 13:35) Qabel telqu, l-aħwa taw lil Hamunyari l-fuljett Tixtieq Tkun Taf Iżjed dwar il-Bibbja? *
Il-ġimgħa taʼ wara, l-indokratur li jivvjaġġa kien qed jaqdi fl-inħawi tal-kongregazzjoni fejn kienet toqgħod Hamunyari. Hu xtaq ikun jaf jekk Hamunyari waslitx id-dar qawwija u sħiħa. Il-membri kollha tal-familja ferħu ħafna x’ħin raw lill-indokratur u lill-aħwa lokali. Il-ġenituri tagħha qalu: “Intom tipprattikaw ir-reliġjon vera. Intom salvajtu l-ħajja tat-tifla tagħna, li tħalliet biex tmut fit-triq.” Huma kienu staqsew lill-membri tal-knisja tagħha: “Ma jmisskomx tistħu, bħalma jfisser isem Hamunyari, li ħallejtuha kważi mejta?” Ix-Xhieda bdew diskussjoni Biblika mal-familja taʼ Hamunyari dwar il-Bibbja u ħallewlhom xi letteratura bbażata fuq il-Bibbja. Il-familja stiednet lill-aħwa biex imorru lura u jikkonduċu studju tal-Bibbja magħhom. Xi membri tal-familja li kienu jopponu lix-Xhieda bidlu l-ħarsa tagħhom. Wieħed minnhom, ir-raġel t’oħt Hamunyari, li kien mexxej taʼ knisja f’dawk l-inħawi, aċċetta studju tal-Bibbja.
Jinbnew Djar taʼ Qima
Żmien ilu, poeta ispirat kiteb: “Alla, . . . ruħi bil-għatx għalik, . . . bħal art niexfa, maħruqa, bla ilma.” (Salm 63:2 [63:1, NW]) Kemm hu veru dan dwar ħafna nies f’Żimbabwe! Fiżikament huma jissaportu n-nixfa, imma spiritwalment huma għatxana għal Alla u t-tjieba tiegħu. Dan tistaʼ tarah mir-riżultati tal-ministeru Kristjan tax-Xhieda taʼ Ġeħova. Meta Żimbabwe kiseb l-indipendenza fl-1980, madwar 10,000 Xhud kienu jaqdu f’476 kongregazzjoni. Issa, xi 27 sena wara, l-għadd taʼ Xhieda attivi huwa tliet darbiet iżjed u l-għadd tal-kongregazzjonijiet kważi rdoppja.
Ftit biss minn dawn il-kongregazzjonijiet kellhom il-post tagħhom fejn jiltaqgħu għall-qima. F’Jannar taʼ l-2001, mit-800 kongregazzjoni li hemm Żimbabwe, 98 biss kellhom dar taʼ qima—Sala tas-Saltna—fejn jiltaqgħu. Ħafna mill-kongregazzjonijiet kienu jagħmlu l-laqgħat tagħhom taħt is-siġar jew f’għerejjex sempliċi li kienu magħmulin mill-pilastri, b’ħitan miksijin bit-tajn u b’soqfa mgħottijin bil-ħaxix.
B’riżultat tad-donazzjonijiet ġenerużi u x-xogħol volontarju ħabrieki mill-fratellanza Kristjana tagħhom madwar id-dinja, ix-Xhieda f’Żimbabwe bdew programm li jagħmilha possibbli għal iktar kongregazzjonijiet li jiksbu Swali tas-Saltna sempliċi imma dinjitużi. Ħafna Xhieda minn pajjiżi oħrajn li għandhom snajjaʼ fil-bini għamlu arranġamenti biex ikunu jistgħu jmorru Żimbabwe u jaħdmu flimkien mal-volontieri lokali. Wieħed mix-Xhieda lokali kiteb: “Aħna nirringrazzjaw sinċerament lill-aħwa rġiel u nisa kollha mill-ħafna pajjiżi differenti li ġew Żimbabwe biex jgħinu fil-bini tas-Swali tas-Saltna sbieħ. U nirringrazzjaw lill-kumplament taʼ l-aħwa kollha tal-kontribuzzjonijiet tagħkom għall-fond għas-Swali tas-Saltna li permezz tiegħu jsir dan ix-xogħol.”
Fin-naħa tal-lvant tal-pajjiż, l-aħwa damu 50 sena jiltaqgħu taħt siġra kbira tal-baobab. Meta lill-anzjani Kristjani ntqalilhom li kienet se tinbena dar taʼ veru għall-qima, minn taʼ l-inqas wieħed minnhom ma setax iżomm lura d-dmugħ. F’kongregazzjoni fil-qrib, wieħed anzjan li kellu 91 sena qal: “Ilni żmien twil nitlob lil Ġeħova bil-ħrara biex isseħħ xi ħaġa bħal din!”
Saru ħafna kummenti dwar kemm ix-xogħol taʼ dan il-bini mill-isbaħ qed jitlesta malajr. Wieħed li ra x-xogħol qal: “Intom in-nies qegħdin tibnu bi nhar, imma bilfors li Alla qed jibni bil-lejl!” L-unità u l-ferħ tal-ħaddiema jiġi notat ukoll. Sa llum, iktar minn 350 Sala tas-Saltna tlestew fil-pajjiż. Dan jagħmilha possibbli biex 534 kongregazzjoni jiltaqgħu fi Swali tas-Saltna mibnijin fis-sod bil-briks.
F’Żimbabwe qed ikompli jsir bini spiritwali u vitali. Hekk kif naħsbu dwar dak li twettaq s’issa, aħna nitqanqlu biex nirringrazzjaw lil Ġeħova, il-wieħed li jagħti barkiet bħal dawn. Iva, “jekk il-Mulej ma jibnix id-dar, għalxejn jitħabtu l-bennejja.”—Salm 127:1.
[Nota taʼ taħt]
^ par. 16 Pubblikat mix-Xhieda taʼ Ġeħova.
[Mappep f’paġna 9]
(Għall-formazzjoni sħiħa tat-test, ara pubblikazzjoni)
ŻIMBABWE
ĦARARE
Masvingo
Great Zimbabwe
[Stampa f’paġna 9]
Il-fdalijiet tat-torri
[Stampa f’paġna 12]
Sala tas-Saltna ġdida, Kongregazzjoni taʼ Concession
[Stampa f’paġna 12]
Membri tal-Kongregazzjoni taʼ Lyndale barra s-Sala tas-Saltna ġdida tagħhom
[Sorsi tal-Istampa f’paġna 9]
Fdalijiet bit-taraġ: ©Chris van der Merwe/AAI Fotostock/age fotostock; ritratt tat-torri: ©Ingrid van den Berg/AAI Fotostock/age fotostock