बॅबिलोनमध्ये बंदिवासात असताना, इस्राएलांच्या विश्‍वासाची अनेकदा परीक्षा झाली. शद्रख, मेशख आणि अबेद्‌नगो यांना धगधगत्या भट्टीत टाकलं गेलं पण देवानं त्यांना जिवंत बाहेर आणलं. पुढे, मेदी आणि पर्शियन लोकांनी बॅबिलोनचा पाडाव केल्यानंतर, दानीएलाला सिंहांच्या गुहेत टाकलं गेलं. परंतु सिंहांची तोंडं बंद करून देवानं त्याचंही रक्षण केलं.

अखेरीस, पर्शियन राजा कोरेश यानं इस्राएलांना मोकळं केलं. बॅबिलोनला कैदी म्हणून नेल्यानंतर केवळ ७० वर्षांनी ते आपल्या मायदेशी परतले. जेरूसलेमला परत आल्यावर त्यांनी प्रथम ज्या गोष्टी केल्या त्यातली एक म्हणजे, यहोवाचं मंदिर बांधायची सुरवात. परंतु लवकरच शत्रूंनी त्यांचं काम थांबवलं. त्यामुळे, जेरूसलेमला परतल्यावर सुमारे २२ वर्षांनी त्यांनी एकदाचं मंदिर पूर्ण केलं.

त्यापुढे, मंदिर सुशोभित करण्यासाठी एज्रानं जेरूसलेमला केलेल्या प्रवासाबद्दल आपण शिकतो. ही गोष्ट, मंदिर बांधून झाल्यावर जवळपास ४७ वर्षांनी घडली. मग, एज्राच्या प्रवासानंतर १३ वर्षांनी, जेरूसलेमच्या मोडलेल्या वेशीची पुनर्बांधणी करायला नहेम्यानं मदत केली. भाग ५ मध्ये येथपर्यंतच्या १५२ वर्षांचा इतिहास आहे.