Twazana ukuti antu aingi akwata mpiti kuno yakapepa yakatemwa sana ukulanzyanya nayo malyasi amuli Baibo. Lelo twacindika insambu zino cila muntu wakwata izya kuisoolwela ivizumilo, napya tusipatikizya antu ukuti tuyasimikile.

Lino tukulanzyanya na antu pa upefi tukaya “amutembo” nu “mucinzi” ku yantu wakwe vino Baibo yatunena. (1 Petulo 3:15, 16) Tukamanya ukuti antu yamwi yangakana ilandwe lino tukuyasimikila. (Mateo 10:14) Nomba tusimanya ndi cakuti antu yanguvwa ilandwe litu nanti foo suka sile lino twalanda nayo. Nupya twamanya ukuti ivikacitikila antu vikasenuka.

Insita imwi umuntu angaya umupamviwe lino twamutandalila uwanda umwi, lelo umuku uze aiza atemwa ukulanzyanya naswe. Nakapya, limwi antu yangaya ni ntazi, nanti vimwi vingayacitikila icakuti iyalondesya nu kuvwa ilandwe lya muli Baibo. Fwandi tukatandalila antu maila aingi.