Skip to content

Uzye Baibo Ikalandapo Uli pa Kusoka?

Uzye Baibo Ikalandapo Uli pa Kusoka?

Vino Baibo yalandapo

Baibo ikasambilizya ukuti ukukanacefyako ukusoka kwipa sana uku muntu uwatasoka na kuli yano akuzanwa nayo. (Mapinda 29:22) Nanti icakuti insita zimwi ukusoka kukaya sile ningo, Baibo ikalanda ukuti yonsi yano yakatwalilila ukuya ni “cipyu” yatalapusuka. (Galatiya 5:19-21; Icipangano Cipya.) Muli Baibo mwaya ivisinte ivingazwa umuntu ukuta ukusoka.

  • Uzye ukusoka kwaipa lyonsi?

  • A lilaci lino ukusoka kukaipa?

  • Mungacita uli pakuti mutaasoka?

  • Malembelo akalanda pa kusoka

Uzye ukusoka kwaipa lyonsi?

Awe. Ukusoka kungaya sile ningo insita zimwi. Umonsi uwali ni cisinka Neemiya ‘wasosile wakwe cimwi’ lino uvwile ukuti ya kapepa yauze yamwi yakuyacuzya.—Neemiya 5:6.

Insita zimwi, Leza akasoka. Lino antu yakwe aliko mpiti yatamile icipangano ca kupepa sile aliwe nu kutandika ukupepa tuleza twaufi, ‘Yeova wayasokiile’ wakwe cimwi. (Yakapingula 2:13, 14) Nanti ciye vivyo ukusoka asi miyele yakwe Yeova Leza. Wene ukusoka kwakwe kukaya sile ningo insita zyonsi nupya asitwalilila ukusoka.

A lilaci lino ukusoka kukaipa?

Ukusoka kukaipa ndi cakuti kusikusila nanti kusi ningo, ilingi ukusoka kwa musango uwo kukacitika uku yantu atamalilika. Katulangilile:

  • Kaini ‘wasosile’ wakwe cimwi lino Leza wakanyile ukupokelela impolelwa yakwe. Kaini walesile ukusoka ukukula icakuti wakomile nu mutowakwe.—Utandiko 4:3-8.

  • Kasema Yona ‘wasosile’ wakwe cimwi lino Leza wayelile aina Ninive uluse. Leza walungike Yona, wamunenyile ukuti atakweti ‘insambu iyakusoka’ nu kuti walondekwanga ukuya nu luse uku yantu yaya alapiile.—Yona 3:10–4:1, 4, 11. *

Malyasi yaa yaili yakulangilila ukuti ndi cakuti ukusoka kutasizile nanti kutalinzile, “kusoka kwa muntu kusyafikilizya kulonda kwakwe Leza.”—Yakobo 1:20.

Mungacita uli pakuti mutaasoka?

  • Manyini ukuti ukutwalilila ukusoka uutonte. Yamwi yangelenganya ukuti ndi yasoka ala yalanga ukuti yaya ningo. Nomba ukulanda sile icisinka wensi asiita ukusoka ala wakwata utonte ukulu. “Umuntu wino atanga alesye umwenzo wakwe akoline nu musumba uwapomolwa ukwaula ilinga.” (Mapinda 25:28; 29:11) Nupya ndi cakuti twalesya ukusoka kwitu, tukalanga ukuti twakwata imiyele isuma nu mwenzo wa mano. (Mapinda 14:29) Baibo ikati: “Aasisoka zuwa wazipapo ukuluta kavulumula wa mpanzela.”—Mapinda 16:32.

  • Mwalesya ukusoka kwinu lino mutatala mwacita cimwi cino mulasyala mukulanguluka. Pa Masamu 37:8 pakalanda ukuti “Utacita icipyu, cefyako ukali. Utasakamala, ci cikaleta sile iviipe.” [NWT] Manyini ukuti ndi cakuti twasoka, pali vintu viili vino tungacita, kuli kuti tungasoololapo ukukanacita icipyu lino tutatala twacita “iviipe.” Wakwe vino ilembelo lyakwe Efeso 4:26 likalanda, likati: “Ndi mwasoka mutaleka kusoka kwinu kumutungulule ku kwifya.”

  • Ndi cakuti icilinga, fuminipo lino mutatala mwasoka sana. Baibo ikati: “Ukutandika ukuloolola umulandu ali kuleta mulamba. Fwandi, lesya ukuloolola lino kutacili kwatampa.” (Mapinda 17:14) Nanti icakuti cacindama ukupanga umutende zuwa, mwensi mweili mulinzile ukuteeka umwenzo lino mutatala mwatandika ukulanzyanya.

  •  Mulinzile ukumanya ivisinka. Pa Mapinda 19:11 pakati: “Amano ya muntu, ali yano yakamuteeka umwenzo.” Fwandi cingazipa ukukolonganika ivisinka vyonsi lino tutatala twasondwelela. Ndi tumvwa uku mbali zyonsi zyoili izya mulandu, cingatwazwa ukusoka ukulinge.—Yakobo 1:19.

  •  Mwapepa pakuti muye amutende. Ipepo lingamwazwa ukukwata “mutende uno kusi umuntu nanti wenga angaumanyikisya” uno Leza akatupeela. (Filipi 4:7) Ipepo ali nzila ikalamba ino Leza akatupeelelamo umupasi wa muzilo, ungatwazwa ukuya ni miyele ili wa mutende, ukuteeka umwenzo alino nu kuikaanya.—Luka 11:13; Galatiya 5:22, 23.

  • Mwasoolola ningo ivyuza. Tukalonda ukuya wa antu yano tukucina nayo. (Mapinda 13:20; 1 Kolinto 15:33) Pakuti ivintu vituzipile Baibo ikatucelula ukuti: “Utandana icuza na antu acipyu, utapita na antu aakasoka zuwa.” U mulandu ci? “Pano limwi ungambula imisango yao, nu kukowezya umi wako.”—Mapinda 22:24, 25.

^ pala. 14 Yona wazumile vino yamulungike nu kuta ukusoka, pano Leza wamuomvizye nu kukulemba ibuku lyonga ilya muli Baibo lino lyakwata izina lyakwe.