Skip to content

IVINGAAZWA ULUPWA

Vino Mungacita Pakuti Mutasoka Sana

Vino Mungacita Pakuti Mutasoka Sana

Lino ya winu yalanda nanti ukucita cimwi icamusosya, mwezya ukuifisa ukuti imusoka. Lyene lino ya winu yalola ukuti pali cimwi icaticiluwana nupya yatandika ukumuzya mauzyo. Nupya cico calenga mwasoka na sana. Mungacita uli ndi cakuti ivya musango uwo vyacitika?

  • Vino mulinzile ukumanya

  • Vino mungacita

Vino mulinzile ukumanya

  • Ukusoka sana kungonona umi winu. Aakalondelezya yazana ukuti ukusoka sana kukalenga BP ukukulilako, ulwale wa ku mwenzo, ukusakamikwa alino ni vyakulya kukanaseya zuwa. Ukusoka kwalemenkana nu ulwale wa kukanalala utulo, ukusakamikwa sana, ulwale wa pa nkanda alino na situloko. Baibo ikatunena ukuti: “Utacita cipyu . . . , citange cikwavwe nanti cimwi.”—Masamu 37:8.

  • Ukutwalilila ukusoka nako kwene ukwipe. Ndi cakuti mwatwalilila ukusoka cingaya kwati ulwale ukonona umukasi. Mungatandika sile ukulola iviipe muli yauze. Nupya ukucita vivyo kungalenga citalile yauze ukwikala namwe ni cupo cinu cingononeka.

Vino mungacita

  • Mwalola ivisuma muli ya winu. Elenganyini pa vintu vitatu vino mwatemwa pali ya winu. Insita yuze lino mulasoka pali vino ya winu iyacita, mukiusye pa vintu vivyo vitatu vino imwelenganyapo. Ukucita vivyo kungamwazwa ukulesya ukusoka.

    Cisinte ca muli Baibo: “Mulinzile mwataizya.”—Kolose 3:15.

  •  Mwaya ni miyele ya kwelela. Cakutandikilako, mwalola ivintu wakwe vino ya winu yakavilola. Cico cilamwazwa ukulayuvwa wakwe vino ya winu yakayuvwa wakwe vino Baibo ikaama ukuti “kuvwilana ulanda kuli kumwi.” (1 Petulo 3:8) Lyene muyuzye mweineco muti, ‘Uzye icati cilenga insoke i cikulu sana icakuti ntange neleele?’

    Cisinte ca muli Baibo: “Cacindama . . . kusuula imilandu.”—Mapinda 19:11.

  •  Mwalanda vino mukuyuvwa cikuuku cikuuku pakuti mutasosya ya winu. Mwatandika ni zwi lyakuti “nka” alino mulanda vino mukulonda ukulanda. Ukucila ukulanda ati, “Musindangulukilako pano musituma nu kunena kuno muli,” cingazipa ukulanda ati, “Nkasakamala sana ndi cakuti kwafita ala ntamanyile ndi cakuti muli sile ningo kuno muli.” Ukulanda amazwi inu umu ufuuke kungamwazwa ukucefyako ukusoka.

    Cisinte ca muli Baibo: “Mvwango zinu zilinzile kuya zisuma nupya zyakuzanzya antu.”—Kolose 4:6.

  •  Mwaumvwikisya lino ya winu yakulanda. Lino mwalondolola vino mukuyuvwa, lekini ya winu yalande ukwaula ukuyapumvyanya. Lino yamala ukulanda mungezya ukulandako vino iyalanda pakuti musininkizye ngu muvwikisya vino iyalanda. Ukwikako mano lino umwi akuvwanga kungamwazwa sana ukulesya ukusoka.

    Cisinte ca muli Baibo: “Muntu wensi alinzile kuuvwa zuwa, lelo atekele kulanda.”—Yakobo 1:19.