«РʹОЖ БАШ, чаԝани?»

Бешьк, һун гәләк щар сьлавед ԝи щурʹәйи дьдьнә мәрьва. Дьбәкә һун хенщи сьлава ӧса, дәсте хԝә жи дькьнә дәсте һәв, йан жи һәв һʹәмез дькьн. Бәле, щурʹә-щурʹә щийада мәрьв бь щурʹә-щурʹә сьлаве дьдьнә һәв, ле нета сьлаве һʹәму щийа жи йәкә. Һәрге әм сьлаве нәдьнә мәрьва, мәрьв ԝе бьфькьрьн ԝәки һʹьзкьрьна мә тʹӧнә йан жи әм бемәʹрифәт ьн.

Ле нә һʹәму мәрьварʹа хәйсәт ә кӧ сьлаве бьдьн. Һьнәк шәрм дькьн сьлаве бьдьнә мәрьва. Һьнәкарʹа жи чәтьн ә сьлаве бьдьнә мәрьвед жь мьләтед майин, һьнәк жи жь бо мәʹнийед дьн сьлаве надьн. Ле һәла һе сьлавәкә кьн жи дькарә сәр мәрьва гәләк ԛәԝи һʹӧкӧм бә.

Һәла пьрсе бьдьнә хԝә: «Гәло сьлав чь кʹаре тинә? У Хәбәра Хԝәде дәрһәԛа сьлаве чь мьн һин дькә?»

Чахе Пәтрусе шанди щьвата Мәсиһитида щара пешьн Мәсиһийе нә жь мьләте щьһу ԛәбул кьр, наве кʹижани Корʹнелйо бу, әԝи гот: «Хԝәде рʹасти жи фьрԛийе накә нава мьләта» (Кʹар. Шанд. 10:34). Паше, Пәтрус ньвиси кӧ Хԝәде «дьхԝазә ԝәки һʹәму жь гӧнәкьрьне вәгәрʹьн» (2 Пәт. 3:9). Дьбәкә әм дьфькьрьн ԝәки әԝ гьлийед Пәтрус бона ԝан мәрьва нә, йед кӧ тʹәзә тенә нава рʹастийе. Ле Пәтрус ӧса жи Мәсиһи ширәт кьрьн: «Ԛәдьре һʹәмуйа бьгьрьн, хушк-бьра һʹьз бькьн» (1 Пәт. 2:17). Жь ԝан гьлийа әм дьвиньн, ԝәки әм гәрәке һʹәму мәрьва сьлав кьн, фьрԛи тʹӧнә әԝана жь чь мьләти нә у жь кʹидәре нә. Ԝи щурʹәйи әм ԛәдьр у һʹьзкьрьне һьндава ԝанда дьдьнә кʹьфше.

Паԝлосе шанди хушк-бьред щьватерʹа гот: «Һәвдӧ ԛәбул кьн, чаԝа Мәсиһ әм ԛәбул кьрьн» (Рʹом. 15:7). Паԝлос гәләк хәм дькьр бона ԝан бьра, йед кӧ аликʹарийа мәзьн данә ԝи. Илаһи иро чьԛас хушк у бьра һʹәԝще ԛәԝикьрьне нә, чьмки Шәйтʹан мьԛабьли щьмәʹта Хԝәде дәрдькʹәвә (Колс. 4:11; Әʹйан. 12:12, 17).

Мәсәлед жь Кʹьтеба Пироз әшкәрә нишан дькьн, ԝәки сьлава мә нә кӧ тʹәне дьдә кʹьфше ԝәки әм мәрьва бь дьл ԛәбул дькьн, ле ӧса жи кʹарәкә мәзьн тинә.

Чахе Йаһоԝа сафи кьр, ԝәки Кӧрʹе хԝә дәрбази зьке Мәрйәме кә, әԝи мьлйакʹәте хԝә шандә бал ԝе, сәва жерʹа дәрһәԛа ве йәке әʹлам кә. Мьлйакʹәт гьлийед хԝә ӧса дәстпекьр: «Сьлав ль тә ԛизька кʹәрәм ле буйийе, Хӧдан тʹәви тә йә». Мәрйәм паши ԝан гьлийа «тʹәвиһәв бу», чьмки ньзаньбу мьлйакʹәт чьрʹа тʹәви ԝе хәбәр да. Мьлйакʹәт әв йәк дит у жерʹа гот: «Мәрйәм, нәтьрсә! Чьмки тә кʹәрәм жь Хԝәде станд». Әԝи жерʹа шьровәкьр, ԝәки ԛьрара Хԝәде һьндава ԝе әԝ ә, кӧ жь ԝе Мәсиһ бе буйине. Мәрйәм сәр ԝан гьлийа нә кӧ әʹщьз бу, ле бь дьл щаба ԝи ӧса да: «Әз щарийа Хӧдан ьм. Бьра анәгори готьна тә бона мьн бьбә» (Луԛа 1:26-38).

Бона мьлйакʹәт ԛәдьрәки мәзьн бу, ԝәки әʹламәтийа Йаһоԝа дәрбази Мәрйәме кә. Ле әԝ нәфькьри ԝәки бона ԝи беһӧрмәти йә кӧ тʹәви мәрьве гӧнәкʹар хәбәр дә. Дәԝсе, әԝи гьлийед хԝә бь сьлаве дәстпекьр. Әм чь дькарьн һин бьн жь ве йәке? Әм гәрәке һазьр бьн, ԝәки сьлаве бьдьнә һәвдӧ у ԝана бьшьдиньн. Щара әм дькарьн тʹәне бь чәнд гьлийа жи али мәрьва бькьн, ԝәки әԝана ԛәԝи бьн у хԝә тʹәхмин кьн кӧ әԝана жи пʹарәкә щьмәʹта Йаһоԝа нә.

Паԝлос нава Асйа Бьчʹук у Әԝропайеда гәләк хушк-бьра нас дькьр. Нәʹмед ԝида гәләк сьлавед  һʹәԝас һәнә. Жь Рʹомайи сәре 16 әм дьвиньн кӧ әԝи гәләк сьлав хушк-бьрарʹа дьшанд. Мәсәлә, әԝи гот кӧ бьра «хушка» Фойбе, «бь наве Хӧдан ԛәбул кьн, чаԝа ль щьмәʹта Хԝәде дькʹәвә у гава дьбә һʹәԝще тьштәки, дәсте хԝә дьрежи ԝе кьн». Әԝи ӧса жи сьлав Прьскилайе у Әкиларʹа шанд, у гот ԝәки «нә кӧ тʹәне әз жь ԝан рʹази мә, ле тʹәмамийа щьвинед жь нәщьһуйа жи». Әԝи ӧса жи Апенәторʹа сьлав шанд у сәр ԝи гот «дәлале мьн», у ӧса жи сьлав шанд Тьрифенайерʹа у Тьрифосайерʹа, «кʹижан бона наве Хӧдан дьхәбьтьн». Бәле, Паԝлос бь дьл у щан хушк-бьра сьлав дькьр (Рʹом. 16:1-16).

Бьдьнә бәр чʹәʹве хԝә, әԝ хушк-бьра чьԛас ша бун кӧ бира ԝида бун. Рʹасти жи ԝе һʹьзкьрьна ԝан һьндава Паԝлос у һьндава һәвдӧ гәләк ԛәԝи буйа! У чахе әԝ хушк-бьра дьбьһистьн әԝ сьлавед бь һʹьзкьрьн, бешьк әԝе йәке ԝе али ԝан бькьра баԝәрийеда ԛәԝи бьминьн. Бәле, чахе әм һәвдӧ сьлав дькьн, әм нишан дькьн ԝәки бона һәвдӧ хәм дькьн, у әв йәк мә һелан дькә һәвалтийа хԝә ортʹа һәвдӧ ԛәԝи кьн у мә дькә йәктийе.

Чахе Паԝлос гьһиштә Потийоле у паше гәрәке бьчуйа алийе Рʹоме, хушк-бьред ԝедәре һатьнә пешийа ԝи. Чахе Паԝлос әԝана дурва дитьн, әԝи «шькьри да Хԝәде у дьле ԝи шьдийа» (Кʹар. Шанд. 28:13-15). Щара дьбәкә әм тʹәне пе кʹәне хԝә сьлаве дьдьнә кәсәки, йан жи дәсте хԝә ԝанрʹа дьһәжиньн, ле һәла һе әԝ тьштед бьчʹук жи дькарьн мәрьва бьшьдиньн, илаһи мәрьве кӧ депресийеда йә йан жи мәʹдәкьри йә.

Аԛубрʹа лазьм бу ширәтәкә сәрт бьдә һьнә Мәсиһийа, чьмки ԝана һәвалти тʹәви ве дьнйайе дькьрьн, чь кӧ зийан дьда рʹӧһʹанийа ԝан (Аԛуб 4:4). Ле дина хԝә бьдьне кӧ әԝи нәʹма хԝә ча дәстпекьр:

«Жь Аԛубе хӧламе Хԝәде у Хӧдан Иса Мәсиһ: Сьлав ль ԝә һәр донздәһ әʹширед дьнйайеда бәлабуйи бә» (Аԛуб 1:1). Әԝ хушк-бьред кӧ әԝ нәʹма ԝи хԝәндьн, сьлава ԝида тʹәхмин кьрьн кӧ әԝана жи гьшк бәр Хԝәде йәк ьн, у жь бо ве йәке ԝанрʹа ԝе һеса буйа ширәта ԝи ԛәбул кьн. Бәле, сьлава бь мьлукти дькарә мәрьварʹа рʹе вәкә, ԝәки дәрһәԛа тьштед фәрз хәбәр дьн.

Ле сәва сьлав кʹаре бинә, лазьм ә бь дьл у һʹьзкьрьне бә. Әԝ йәк гәрәке тʹьме ӧса бә һәрге жи мәрьв навиньн (Мәт. 22:39). Хушкәкә мә жь Ирләнде щарәке чахе һатә щьвате, щьват ида дәстпедьбу. Гава әԝ ләзә-ләз кʹәтә оде, бьраки алийе ԝе ньһерʹи у бь бәшәра хԝәш жерʹа гот: «Рʹож баш. Әз ша мә тә бьвиньм». Әԝ хушк ләзә-ләз чу рʹуньшт.

Чәнд һʹәфти дәрбаз бун, әԝ незики ԝи бьрайи бу у гот, ԝәки һьнге малда проблемед ԝе һәбун у әԝ дьлтәнг бу. Әԝе ԝирʹа гьли кьр: «Ԝе еваре мьн ӧса хԝә хьраб тʹәхмин дькьр, ԝәки мьн нә жи дьхԝәст бемә щьвате. Ԝе рʹоже найе бира мьн сәр щьвате чь һатә готьне, хенщи сьлава тә. Дьле мьн зәʹф гәрм бу, кӧ ԝә әз ӧса ԛәбул кьрьм. Әз жь тә зәʹф рʹази мә».

Әԝ бьра һаш пе жи тʹӧнә бу, ԝәки әԝ сьлава ԝийә кьн ча ԛайим сәр ԝе һʹӧкӧм бьбу. Әԝ дьбежә: «Чахе әԝе мьнрʹа гот кӧ әԝ чәнд гьлийед мьн бона ԝе чьԛас фәрз бун, әз гәләк ша бум кӧ мьн әԝ сьлав кьрьбу у әз хԝәха жи дьлгәрм бум».

Сьлеман ньвиси: «Нане хԝә бавежә ԝәще аван; жь бәр кӧ тӧйе ль пей пьрʹр рʹожан ԝе бьбинә» (Ԝаиз 11:1). Чахе әм сьлаве дьдьнә мәрьва, илаһи хушк-бьра, у ԛимәта сьлаве заньн, әм шабуне дьстиньн у һьн хԝәрʹа һьн жи ԝанрʹа кʹаре тиньн. Ләма жи ԝәрә әм тʹӧ щар кʹара сьлаве пьшт гӧһе хԝәва нәвежьн.