1. Чь тьштәки мәхсус һәйә бал мәрьва, чь кӧ бал һʹәйԝана тʹӧнә?

ХԜӘДЕ тьштәки мәхсус дайә мәрьва, чь кӧ бал һʹәйԝана тʹӧнә йә. Әԝ һәйә исаф. Хԝәде жь дәстпека әʹфьрандьна инсанәте исаф дайә мәрьва. Мәсәлә, чахе Адәм у Һеԝайе ԛануна Йаһоԝа тʹәрʹьбандьн, ԝана хԝә вәшарт у әԝ йәк дьдә кʹьфше ԝәки исафе әԝана дьчәрчьрандьн.

2. Чаԝа исафа мә мина компасе йә? (Бьньһерʹә шькле әʹԝльн.)

² Әԝ мәрьве кӧ исафа ԝи рʹьнд һинкьри нинә, мина ве гәмийе йә, кʹижан кӧ пе компаса хьраббуйи дьчә. Рʹеԝитийа пе компаса нәрʹаст, гәләк хоф ә. Ба у ава океане, дькарьн һеса гәмийе бьвьнә щики нәрʹаст. Ле компаса кӧ рʹаст дьхәбьтә дькарә али гәмиван бькә, сәва гәмийе алийе рʹастрʹа бьвә. Исафа мә жи мина компасе йә. Исаф дьле мәда ча рʹебәр ә, бь сайа кʹижани әм дькарьн рʹасти у нәрʹастийе һәвдәрхьн. У әԝ йәк али мә дькә рʹийа рʹастрʹа һәрʹьн. Ле сәва исафа мә рʹебәре баш бә, лазьм ә әԝ рʹаст һинкьри бә.

3. Чь дькарә бьԛәԝьмә һәрге исаф нәрʹаст һинкьри йә?

³ Һәрге исафа мә нәрʹаст һинкьри йә, әԝе нькарьбә мә бьгьрә йан жи пешда әʹлами мә бькә кӧ кьред хьраб нәкьн  (1 Тимтʹ. 4:1, 2). Әԝ исаф дькарә һәла һе жи мә һелан кә кӧ хьрабийе һʹәсаб кьн ча ԛәнщи (Иша. 5:20). Дәрһәԛа ве йәке Иса пешда шагьртед хԝәрʹа ӧса гот: «Ԝәхте жи бе, ԝәки кʹи кӧ ԝә бькӧжә жи, ԝе һʹәсаб кә кӧ әԝ Хԝәдерʹа ԛӧльх дькә» (Йуһʹн. 16:2). Бь рʹасти тьштед ӧса ԛәԝьмин, мәсәлә мәрьвед кӧ Стәйфан кӧштьн у ӧса жи һьнәкед мина ԝан, дьфькьрин кӧ бона Хԝәде ве йәке дькьн (Кʹар. Шанд. 6:8, 12; 7:54-60). Рʹасти жи чьԛас әʹщеб ә, кӧ фанатикед религийа пе зӧлмийа ӧса ча меркӧжи, ԛануна ԝи Хԝәдейи дьтʹәрьбиньн, кʹижан кӧ дьһʹәбиньн (Дәркʹ. 20:13). Әшкәрә йә, исафа ԝан рʹебәре гәләк хьраб ә!

4. Ча әм дькарьн тедәрхьн һәла исафа мә рʹаст дьхәбьтә йан на?

⁴ Ле ча әм дькарьн тедәрхьн һәла исафа мә рʹаст дьхәбьтә йан на? Ԛанун у принсипед жь Хәбәра Хԝәде керһати нә «бона һинкьрьне, леһьлатьне, рʹасткьрьне у ширәткьрьна жийина рʹастийеда» (2 Тимтʹ. 3:16). Бәле, әм гәрәке Кʹьтеба Пироз леколин бькьн, сәр бьфькьрьн, у әʹмьре хԝәда бьдьнә хәбате. Ӧса әме һин бьн мина Йаһоԝа бьфькьрьн, у исафа мә жи ида ԝе мәрʹа бьбә рʹебәре баш. Ԝәрә әм шеԝьр кьн кӧ чаԝа ԛанун у принсипед Йаһоԝа дькарьн али мә бькьн исафа хԝә һин кьн.

5, 6. Әм чь кʹаре дьстиньн жь ԛанунед Хԝәде?

⁵ Һәрге әм дьхԝазьн жь ԛанунед Хԝәде кʹаре бьстиньн, әм гәрәке ԝан ԛануна нә кӧ тʹәне бьхуньн у бьзаньбьн, ле әм гәрәке ԛайим һʹьз бькьн у ԛимәт кьн. Хәбәра Хԝәде дьбежә: «Хьрабийе бькәрьһьн [нәфьрʹәт кьн] у ԛәнщийе һʹәз бькьн» (Амс. 5:15). Ле ча әм дькарьн ве йәке бькьн? Йа пешьн, әм гәрәке мина Йаһоԝа сәр тьшта бьньһерʹьн. Бьфькьрьн сәр ве мәсәле: Бәʹса хәбәре һун шәв хьраб рʹадьзен, у һʹәкиме ԝә ԝәрʹа диетайе дьньвисә, дьбежә кӧ спортева мьжул бьн, у һьнә тьшт әʹмьре хԝәда бьгӧһезьн. Паше чахе ԝә һʹәму ширәтед ԝи данә хәбате, ԝә дит ԝәки проблема ԝә сафи бу! Фәʹмдари йә, һуне бона ԝе аликʹарийе жь ԝи һʹәкими гәләк рʹази бьн.

⁶ Әʹфьрандаре мә жи мәрʹа ԛанун данә, кʹижан кӧ дькарьн мә хԝәй кьн жь ахьрийа хьраб кӧ гӧнә тинә, у әʹмьре мә баш кьн. Бьфькьрьн кӧ әм чьԛас кʹаре дьстиньн гава гӧрʹа ԝан тʹәмийед Кʹьтеба Пироз дькьн, мәсәлә чахе хԝә дур дьгьрьн жь дәрәԝийе, фелбазийе, дьзийе, бенамусийе, зорбәтийе у сербазийе. (Бьхунә Мәтʹәлок 6:16-19; Әʹйан. 21:8) Гава әм дьвиньн кӧ әм чьԛас кʹәрәмед баш дьстиньн чахе гӧрʹа Йаһоԝа дькьн, дьле мә һьндава Йаһоԝа у ԛанунед ԝи бь рʹазибуне у һʹьзкьрьне тʹьжә дьбә.

7. Әме чь кʹаре бьстиньн һәрге сәрһатийед жь Кʹьтеба Пироз бьхуньн у сәр бьфькьрьн?

⁷ Нәлазьм ә әм ԛанунед Хԝәде бьтʹәрьбиньн у ахьрийа хьраб бьстиньн, у паше фәʹм кьн чь рʹаст ә чь хьраб ә. Әм дькарьн жь шашийед мәрьвед бәре һин бьн, сәрһатийед кʹижана Хәбәра Хԝәдеда ньвисар ьн. Мәтʹәлок 1:5-да те готьне: «Йе сәрԝахт бьбьһе һе занәбуна хԝә зедә кә». Бь рʹасти чахе әм сәрһатийед жь Кʹьтеба Пироз дьхуньн у сәр дьфькьрьн, бь ве йәке әм занәбун у һинкьрьна жь Хԝәде дьстиньн. Һинкьрьна Хԝәде лапә баш ә. Бәʹса хәбәре, бьфькьрьн кӧ Даԝьд Пʹадша чьԛас кӧл-дәрд кʹьшанд, гава гӧрʹа тʹәмийа Йаһоԝа нәкьр у тʹәви Бат-Шәбайе бенамуси кьр (2 Сам. 12:7-14). Чахе әм әве сәрһатийе дьхуньн у сәр дьфькьрьн, әм дькарьн пьрсе бьдьнә хԝә: «Даԝьд ча дькарьбу хԝә жь ахьрийа хьраб у еше хԝәй кьра, йа кӧ әԝи бона бенамусийа тʹәви Бат-Шәбайе станд?» Һәрге  әз рʹасти щерʹьбандьнәкә ӧса бьһатама, гәло мьне бькарьбуйа хԝә зәфт кьра у мина Усьв жь ве тʹәльке бьрʹәвийама? (Дәстп. 39:11-15). Һәрге әм бьфькьрьн кӧ гӧнә чь ахьрийе тинә, әме һе ԛайим хьрабийе нәфьрʹәт кьн.

8, 9. а) Исафа мә чьда али мә дькә? б) Чаԝа принсипед Йаһоԝа сәр исафа мә һʹӧкӧм дькьн?

⁸ Бәле, мәрʹа нә зор ә хԝә жь ԝан тьшта дур бьгьрьн, кʹижан кӧ бәр чʹәʹве Хԝәде рʹәш ьн. Ле һәнә тьштед ӧса, дәрһәԛа кʹижана Кʹьтеба Пирозда тʹәмийа конкрет тʹӧнә. Һьнге әм ча дькарьн тедәрхьн кӧ ԝе ча Хԝәде хԝәш бе? Ве дәрәщеда исафа пе Кʹьтеба Пироз һинкьри, дькарә али мә бькә сафикьрьна билани бькьн.

⁹ Йаһоԝа жь һʹьзкьрьне мәрʹа принсип данә, кʹижан кӧ рʹебәрийе исафа мә дькьн. Әԝ дьбежә: «Әз Йаһоԝа, Хԝәдайе тә мә, кʹижан кӧ тьштед ԛәнщ тә һин дькә у ве рʹерʹа тә дьбә, ль сәр кʹижани тӧ гәрәке һәрʹи» (Иша. 48:17, 18, ДТʹ). Чахе әм пе һʹьш-аԛьл у дьле хԝә сәр принсипед Хԝәде кʹур дьфькьрьн, әԝ йәк али мә дькә сафикьрьнед билани бькьн.

10. Принсип чь йә, у Иса ча принсип рʹьнд дьданә хәбате?

¹⁰ Принсип әԝ һәйә рʹастийа сәрәкә кӧ рʹебәрийе фькьред мә дькә, у али мә дькә сафикьрьнед рʹаст бькьн. Чахе әм принсипа заньн, әԝ йәк али мә дькә ньһерʹандьна Ԛанундар, демәк Йаһоԝа фәʹм кьн, у ԝан мәʹнийа, кӧ чьрʹа әԝи әԝ ԛанун данә мә. Иса ԝәʹде хьзмәтийа хԝә принсип дьданә хәбате, сәва шагьртед хԝә һин кә, ԝәки әԝана фәʹм кьн, кӧ фькьр у шьхӧл чь ахьрийе дькарьн биньн. Бәʹса хәбәре, әԝи гот кӧ һерс дькарә мерьв бәрбь зорбәтийе бьвә, ле тәме хьраб, демәк фькьред бенамуси мерьв бәрбь бенамусийе бьвьн (Мәт. 5:21, 22, 27, 28). Сәва кӧ исафа мә рʹаст бьхәбьтә, әм гәрәке бьһельн, ԝәки принсипед Хԝәде рʹебәрийе мә бькьн, у ӧса әме пе кьред хԝә шькьрийе бьдьнә Хԝәде (1 Корн. 10:31).

11. Ча исафа Мәсиһийа дькарә жь һәв щӧдә бә?

¹¹ Рʹаст ә исафа Мәсиһийа пе Кʹьтеба Пироз һинкьри йә, ле ньһерʹандьна һәр кәси сәр һьнә тьшта дькарә жь һәв щӧдә бә. Мәсәлә, дәрһәԛа ичʹкәвәхԝарьне. Кʹьтеба Пироз ичʹкәвәхԝарьне ԛәдәхә накә, ле дьбежә ԝәки хԝә дур бьгьрьн жь гәләк ичʹкәвәхԝарьне у сәрхԝәшибуне (Мәтʹлк. 20:1; 1 Тимтʹ. 3:8). Ле гәло әв те һʹәсабе, ԝәки Мәсиһийе кӧ ичʹке һьндьки вәдьхԝә, гәрәке хәма ԝи сәр тьштәки дьн нибә? На. Дьбәкә исаф ԝи начәрчьринә, ле әԝ ӧса жи гәрәке исафа мәрьвед дьн һьлдә һʹәсаб.

12. Чаԝа гьлийед жь Рʹомайи 14:21 мә һелан дькьн, ԝәки ԛәдьре исафа мәрьвед майин бьгьрьн?

¹² Паԝлос гот ԝәки Мәсиһи гәрәке исафа мәрьвед майин һьлдьнә һʹәсаб. Әԝи гот: «Ԛәнщ ә нә гошт бьхԝи, нә шәраве вәхԝи у нә жи тьштәки ӧса бьки, кӧ бьре тә бькʹәвә» (Рʹом. 14:21). Һәрге һун дьхԝазьн тьштәки бькьн у заньн изьна ԝә һәйә, ле фәʹм дькьн кӧ бь ве йәке хушк йан бьрак дькарә бьлькʹӧмә, гәло һуне хԝә бьгьрьн жь ве йәке? Бешьк, һуне хԝә бьгьрьн, ԝәки әԝ хушк йан бьра нәлькʹӧмә. Һьнә бьред мә пешийа кӧ бьһатана сәр рʹийа рʹаст, гәләк ичʹкә вәдьхԝарьн, ле ньһа тʹәрка ичʹке данә. Фәʹмдари йә әме тьштәки ӧса нәкьн, ԝәки бьбьнә мәʹни кӧ әԝ бьра диса вәгәрʹә сәр хәйсәте хԝәйи бәре (1 Корн. 6:9, 10). Һәрге әԝ бьра меванти бе мала мә, әме тʹӧ щар зоре ԝи нәкьн ԝәки  ичʹке вәхԝә, илаһи һәрге әԝи сафи кьрийә кӧ ида вәнәхԝә.

13. Чаԝа Тимотʹейо мәсәла баш һишт кӧ ԛәдьре исафа мәрьвед майин бьгьрьн?

¹³ Чахе Тимотʹейо щаһьл бу, әԝ ԛайил бу ԝәки ԝи сьнәт кьн. Рʹаст ә әԝи ԝе ешәкә чәтьн бькʹьшанда, ле йәкә әԝ ԛайил бу ве йәкерʹа, ԝәки Щьһу, кʹижанарʹа әԝ мьзгинийе бәла кә, нәлькʹӧмьн. Тимотʹейо жи мина Паԝлос нәдьхԝәст дьле кәсәки бешинә (Кʹар. Шанд. 16:3; 1 Корн. 9:19-23). Ле тӧ жи һазьр и, бона кʹара мәрьвед майин ԛӧрбана бьки?

14, 15. а) Чь те һʹәсабе гьһиштибун? б) Ча гьһиштибуна Мәсиһи һʹьзкьрьнева гьредайи йә?

¹⁴ Һʹәму Мәсиһи гәрәке сәр хԝә бьхәбьтьн ԝәки «һинбунед пешьнә сәр Мәсиһ алики бьһельн», у «бенә сәр һинбуна гьһишти» (Ибрн. 6:1). Ле әԝ йәк хԝәха найе стандьн. Әм гәрәке гьһиштибунеда тʹьме һе пешда һәрʹьн. Бона ве йәке, әм гәрәке занәбун у фәʹмкʹарийа хԝә һе зедә кьн. Ве йәкеда ԝе али мә бькә хԝәндьна Кʹьтеба Пирозә һәррʹожи (Зәб. 1:1-3). Ле ԝә хԝәрʹа нет данийә ԝәки һәр рʹож Кʹьтеба Пироз бьхуньн? Һәрге һун ӧса бькьн, һуне һе кʹур фәʹм кьн ԛанун у принсипед Йаһоԝа.

¹⁵ Ԛанунәкә лапә мәзьн бона Мәсиһийа әԝ һәйә ԛануна һʹьзкьрьне. Иса готә шагьртед хԝә: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹн. 13:35). Аԛуб сәр һʹьзкьрьне гот «ԛануна Пʹадшатийе» (Аԛуб 2:8). Ле Паԝлос гот: «Һʹьзкьрьн сәре Ԛануне дьгьрә» (Рʹом. 13:10). Әԝ гьлийед ԛәԝи дәрһәԛа һʹьзкьрьне лайиԛ ьн, чьмки Кʹьтеба Пироз дьбежә кӧ «Хԝәде һʹьзкьрьн ә» (1 Йуһʹн. 4:8). Һʹьзкьрьна Хԝәде бь кьред ԝи те кʹьфше. Йуһʹәнна ньвиси: «Бь ве йәке һʹьзкьрьна Хԝәде һьндава мәда хӧйа бу, гава кӧ әԝи Кӧрʹе хԝәйи Тайе Тʹәне шандә дьнйайе, ԝәки әм бь ԝи бьжин» (1 Йуһʹн. 4:9). Бәле, бь ве йәке Хԝәде һʹьзкьрьна хԝә избат кьр. Чахе әм һʹьзкьрьне һьндава Йаһоԝа, Кӧрʹе ԝи у һьндава хушк-бьра дьдьнә кʹьфше, ӧса жи һьндава мәрьвед дьн, әм избат дькьн кӧ әм Мәсиһийед гьһишти нә (Мәт. 22:37-39).

16. Чахе әм дьбьнә Мәсиһийед гьһишти, чьрʹа принсипед Хԝәде бона мә һе зәʹф ԛимәт дьбьн?

 ¹⁶ Чахе һун бьбьнә Мәсиһийед гьһишти, һуне фәʹм кьн ԝәки принсипед Хԝәде бона ԝә һе фәрз у ԛимәт ьн. Ԛанун бона дәрәщед конкрет ьн, ле принсип бона щурʹә-щурʹә дәрәща дькарьн бьдьнә хәбате. Мәсәлә, һәрге щаһьл фәʹм накә кӧ чьԛас хоф ә тʹәви мәрьвед нәбаш һәвалтийе бькә, де-бавед сәрԝахт ԝе синора ԝирʹа дайньн ԝәки ԝи хԝәй кьн (1 Корн. 15:33). Ле гава зарʹ дьбә гьһишти, һʹьш-аԛьле ԝи те гӧһастьне у әԝ ида дькарә принсипед Кʹьтеба Пироз фәʹм кә у һьлдә һʹәсаб. Ӧса әԝ ԝе сафикьрьнед билани бькә кӧ һәвалед рʹаст хԝәрʹа бьжберә. (Бьхунә 1 Корьнтʹи 13:11; 14:20.) Чахе әм дьфькьрьн сәр принсипед Хԝәде, исафа мә дьбә рʹебәре һе рʹаст у баш, кʹижан кӧ ль гора ньһерʹандьна Хԝәде йә.

17. Чьрʹа әм дькарьн бежьн, ԝәки бал мә һʹәму тьшт һәйә сәва сафикьрьнед билани бькьн?

¹⁷ Бал мә һʹәму тьшт һәйә чь кӧ лазьм ә сәва әм сафикьрьнед ӧса бькьн кӧ Йаһоԝа хԝәш тен. Ԛанун у принсипед жь Хәбәра Хԝәде, али мә дькьн «бона һʹәму кьрьнед ԛәнщ һазьр сәкьни» бьн (2 Тимтʹ. 3:16, 17). Принсипед жь Кʹьтеба Пироз дькарьн али мә бькьн кӧ әм тедәрхьн чь йә ԛьрара Йаһоԝа у әԝ чь дьфькьрә (Әфәс. 5:17). Хԝәрʹа бькьн хәйсәт ԝәки һʹәму һащәтед бона леколинкьрьне бьдьнә хәбате, мәсәлә «Индекса Әʹдәбийәта Бьрща Ԛәрәԝьлийе», «Рʹебәрийа Леколинкьрьне бона Шәʹдед Йаһоԝа», «Кʹьтебханәйа Бьрща Ԛәрәԝьлийе» (Ԝatchtoԝеr Library), «КʹЬТЕБХАНӘЙА ОНЛАЙН йа Бьрща Ԛәрәԝьлийе», у «JԜ Кʹьтебханә app» (JԜ Library app). Чахе әм әԝан һащәта бьдьнә хәбате, әме һе зәʹф кʹаре бьстиньн жь һинбуна хԝәйә шәхси у жь ԛӧльхкьрьна тʹәви малбәте.

18. Әме чь кʹаре бьстиньн һәрге ԛанун у принсипед Хԝәде бьдьнә хәбате?

¹⁸ Чахе әм ԛанун у принсипед Йаһоԝа тиньн сери, әʹмьре мә бь кʹәрәма у шабуне тʹьжә дьбә. Зәбур 119:97-100-да те готьне: «Һинкьрьна Тә чьԛаси әз һʹьз дькьм! Тʹәмамийа рʹоже әз сәр ԝе дьфькьрьм. Әʹмьред Тә мьн жь нәйара сәрԝахттьр дькьн, чьмки һәр тʹьм әԝ тʹәви мьн ьн. Әз жь һʹәму дәрсдаред хԝә билантьр бумә, чьмки фькьред мьн сәр тʹәмийед Тә нә. Жь каләмера аԛьлтьр бумә, чьмки хԝәй дькьм ԛәйдә-ԛанунед Тә». Һәрге әм хԝәрʹа ԝәʹдә башԛә дькьн сәва бьфькьрьн сәр ԛанун у принсипед Хԝәде, әме бь билани у фәʹмкʹарийе тьшта бькьн. У гава әм исафа хԝә пе ԛанун у принсипед Йаһоԝа һин кьн, әме «бьбьнә мәрьвед гьһишти, хут ԝәкә бәжьн-бала Мәсиһ» (Әфәс. 4:13).