Чахе зарʹ жь зьке дийа хwә дәрдькʹәвә, 60 дәqед пешьн гәләк фәрз ьн бона зарʹе. Гәло чьма? Чьмки чахе паши буйине, зарʹ щәм дийа хwә йә, әв йәк сәр wи гәләк баш һʹöкöм дькә. a

Гәло чь де һелан дькә, кö һьндава зарʹа хwәйә тʹәзәбуйи назьк бә? Зандар Женет Креншо дь журнала «Thе Journal of Pеrinatal Еducation» шьроwәдькә, кö һормона окситосине «паши зарʹбуйине һʹәстед де пешда тиньн, кö әw зарʹе һьлдә һәмеза хwә, мьqати wе бә, у ле тʹер кә». Диса һормонәк һәйә, чь кö wи чахи «али де дькә гöһ бьдә зарʹе» у бәр wи бә. Чьма әw öса фәрз ә?

Һәләqәтийа незик ортʹа де у зарʹа вьрни, һатийә сазкьрьне алийе Әʹфьрандаре мәда, демәк Йаһоwа Хwәде. b Даwьд Пʹадша пәсн дьда Хwәде, кö әwи әw жь зьке де дәрхьст у хwәй дькьр һʹәмеза дийа wида. Әwи дöа дькьр: «Жь буйьнева әз һатьмә спартьн ль тә, һе жь малзарʹокева, Хwәдайе мьн тö йи» (Зәбур 22:9, 10, ИМ).

ШЕWЬР КЬН: Һәрге Хwәде системәкә öса чәтьн әʹфьрандийә бь сайа чь жи де бь назьки мьqати зарʹа хwә дьбә, у һʹәwщед зарʹе һьлдьдә һʹәсаб, демәк бь логики йә кö Хwәде жи wе бона мә хәм бькә чьмки әм гьшк жи зарʹед Wи нә (Кʹаред Шандийа 17:29).

Иса Мәсиһ, йе кö жь һʹәмушка баштьр Әʹфьрандаре мә нас дькә, гьлийе öса гот: «Нә дö ч′ьвик бь дьравәки чарqöр′уше тенә фьротане? Ле йәк жи жь wан бейи ә′мьре Баве wә нак′әвә ә′рде. Ле чь ль wә дьк′әвә, һәр т′еләки п′ор′ед сәре wә жьмарти нә. Иди нәтьрсьн. Һун жь гәләк ч′ьвика qимәттьр ьн» (Мәтта 10:29-31).

Һьндьк мәрьв дина хwә дьдьнә чʹьвикед бьчʹук, у жь wана һе кем дьвиньн, кö ча әw чʹьвик дьмьрьн. Ле Баве мәйи әʹзмана, жь wана һәр йәке дьвинә! Бьдьнә һʹәсабе хwә, кö бона Хwәде, мәрьв чʹьвика qимәттьр ьн. Әw йәк чь мә һин дькә? Тö гәрәке дöдьли ниби у баwәр бьки, кö чʹәʹве Хwәде сәр тә йә. Һәйнәсәр әw бона тә хәм дькә!

Әw Рʹезед Кʹьтеба Пироз мә qәwи дькьн

• «Чʹәʹве Хöдан ль һәр дәра йә, Әw qәнщ у хьраба дьбинә» (МӘТʹӘЛОК 15:3).

• «Чʹәʹве Хöдан ль сәр рʹаста йә у гöһе Wи ль сәр һәwар-газийа wан ә» (ЗӘБУР 34:15).

• «Пе һʹöба Тә әзе әшq у ша бьм, чьмки сәр мәрʹьмийа мьнда Тә ньһерʹи у тәʹлитәнгийа мьн пе һʹәсийайи» (ЗӘБУР 31:7).

Гәло һәрге әме бьзаньбьн кö Хwәде бь һʹьзкьрьн бона һʹалхwәшийа мә хәм дькә у чʹәʹве wи сәр мә йә, әw йәк дькарә сәр жийина мә һʹöкöм кә? Бәле дькарә. Һанна c жь Инглистане дьбежә:

«Гәләк щар әз дьфькьрим, кö Йаһоwа мьн һʹьз накә у ләма жи щаба дöайед мьн надә, чьмки баwәрийа мьн кем ә. Мьнрʹа öса дьһатә кʹьфше, кö әз бона Хwәде тʹö тьшт ниньм у Әw бона мьн хәм накә, ләма жи әз темә щәзакьрьне у Хwәде пьшта хwә дьдә мьн».

Ньһа Һанна сәд сәләфи баwәр дькә кö Йаһоwа wе һʹьз дькә у бона wе хәм дькә. Гәло чь ньһерʹандьна wе öса гöһаст? Әw дьбежә: «Әw гöһастьнәкә мәзьн бу. Те бира мьн, гәләк сал пешда готарәк дәрһәqа qöрбанбуна Иса һатә хwәндьне, чь кö гәләк сәр мьн һʹöкöм кьр. Әве готаре али мьн кьр һʹьзкьрьна Йаһоwа тʹәхмин кьм. У чахе мьн щаба дöайед хwә дьстанд, чʹәʹве мьн тʹьжә һесьр дьбун, чьмки мьн фәʹм дькьр кö Йаһоwа чьqас мьн һʹьз дькә. Öса жи леколина Кʹьтеба Пироз у щьвате, һе зедә дәрһәqа Йаһоwа әз һʹин кьрьмә кö әw бона мә чь дькә. Ньһа әз зәлал дьвиньм пьштгьрийа Йаһоwа, һʹьзкьрьна wи һьндава мә һʹәмуйада у һазьрбуна wи, кö бона һәр кәси жь мә башqә хәм бькә».

Гьлийе Һанайе гәләк дьлгәрмийе дьдьн. Ле чаwа тö дькари баwәр би, кö Хwәде тә фәʹм дькә у һәстед тә жи һьлдьдә һʹәсаб? Готара дьн щаба wе пьрсе дьдә.