Һәрге кöл-дәрд у тәнгаси жь Хwәде ниньн, ле чьма бьрчибун, кʹәсиббун, шәрʹ, нәхwашийед һʹал у хәзәб пешда тен? Хәбәра Хwәде се мәʹнийед сәрәкә әʹйан дькә, кö чьма инсанәт кʹәтийа wи һʹали:

1. Хwәһʹьзи, Тьмайи у Нәфрʹәткьрьн. «Дәм дьбә кö сәрwәрийа зьламәки, ль сәр йәки дьн, бь хәсара wи йә» (Wаиз 8:9). Гәләк щар әм бона гöнәкʹари, хwәһʹьзи у зöлмийа мәрьвед дьн дьчәрчьрьн.

2. Wәхт у Qәwьмандьн. Мәрьв тʹьме дьчәрчьрьн чьмки Кʹьтеба Пироз дьбежә, wәки «wәхт у дöһәм пергинийа вана һʹәмуйан дькьн» (Wаиз 9:11). Демәк тьштед хьраб ләма тен сәре мәрийа, чьмки әwана дькʹәвьнә щи у wәʹдәки нәбаш, йан жи фәсал ниньн у хwә шаш дькьн.

3. Сәрwере Зöлм йе Дьнйайе. Кʹьтеба Пироз рʹьнд зәлал дькә мәʹнийа тәнгасийа мәрийа. Әw дьбежә: «Т′әмамийа дьнйайе бьн һ′öкöме Йе Хьрабда йә» (1 Йуһʹәнна 5:19). «Йе Хьраб» әw һәйә Шәйтʹане Мире-щьна, йане әʹфьрине рʹöһʹанийә qәwи, йе кö сәре-серида мәләке Хwәде бу, ле әwи «хwә рʹастийе нәгьртийә» (Йуһʹәнна 8:44). Мәләкед дьн жи тʹәви Шәйтʹан бунә йәк у мьqабьли Хwәде рʹабун, сәва кö хwәстьнед хwәйә нәрʹаст биньн сери. Öса әwана бунә щьн (Дәстпебун 6:1-5). Жь wи wәʹдәйи дәстпебуйи, Шәйтʹан у щьнед wи, гәләк ль сәр ве дьнйайе һʹöкöм дькьн у зöлмийе пешда тиньн. Ньһа әw йәк зәлал те кʹьфше. Шәйтʹан диса жи пʹьр һʹәрс ә у т′әмамийа дьне дьхальфинә, ләма жи «wәй ль ә′рде» (Әʹйанти 12:9, 12). Бь рʹасти жи Шәйтʹан сәрwерәки зöлмкʹар ә. Wи хwәш те чахе мәрьв дьчәрчьрьн. Демәк Шәйтʹан ә сәбәбе тәнгасийед мә, нә кö Хwәде.

ШЕWЬР КЬН: Тʹәне мәрьве бехwәде, у йе гәләк хьраб wе мәрьвед баш бьдә чәрчьрандьне. Ле Кʹьтеба Пироз дьбежә: «Хwәде һ′ьзкьрьн ә» (1 Йуһʹәнна 4:8). Ләма жи әм сәд сәләфи дькарьн бежьн, wәки набә «кö Хwәде хәрабийе бькә у Йе кö һеза wи тʹера һәр тьшти дькә, нәһәqийе пек бинә!» (Ибо 34:10).

Дьбәкә тö дьфькьри: «Хwәдайе Һьмзор wе һʹәта кʹәнге бьһелә кö Шәйтʹан сәрwертийе бькә?» Чаwа мә дит, Хwәде зöлмийе нәфрʹәт дькә, у дьле wи гәләк бона мә дьшәwьтә чахе әw дәрд-кöлед мә дьвинә. Хенщи wе йәке, Хәбәра wи мә һелан дькә: «Һ′әму хәмед хwә бавежьнә сәр wи, чьмки әw бона wә хәм дькә» (1 Пәтрус 5:7). Хwәде мә һʹьз дькә у әw һьмзорʹ ә, ләма жи әwе зутьрәке һʹәму тәнгаси у нәһәqийа бьдә һьлдане. Жь кʹәрәма хwә дина хwә бьдьнә готара дьн. a