1, 2. а) Кʹижан пьрсәкә лапә фәрз сәр һәр тьштирʹа йә? б) Чьԛас фәрз ә рʹьнд фәʹм бькьн әве пьрсе?

ИРО сәва гәләк мәрьва пʹәрә тьштәки лапи фәрз ә. Әԝана дьфькьрьн чаԝа дәԝләти бьн, һьнәк жи һәбука хԝәрʹа дьләрьзьн. Һәнә мәрьвед ӧса кӧ бона ԝан лапә фәрз ә малбәта ԝан, сьһʹәт-ԛәԝата ԝан, йан жи нет-мәрәмед ԝан.

² Ле һәйә пьрсәкә лапә фәрз кӧ сәр һәр тьштирʹа йә, әԝ һәйә пьрса пьштгьрийа сәрԝертийа Йаһоԝа. Һʹьш-аԛьле мә гәрәке тʹьме сәр ве йәке бә, кӧ чаԝа пьштгьрийа һʹӧкӧмәтийа Хԝәде бькьн. Ле һәнә тьшт кʹижан кӧ дькарьн һʹьш-аԛьле мә бьрʹәвиньн у әм бир кьн дәрһәԛа ве пьрсе. Бәʹса хәбәре, әм дькарьн бькʹәвьнә һәйрʹа шьхӧлед һәррʹожи. Йан жи чахе әм кӧл-дәрда дькʹьшиньн әв пьрса фәрз дькарә жь һʹьше мә дәре. Ле һәрге бона мә дьһа фәрз ә пьштгьрийа Йаһоԝа бькьн, әме чәтьнайада сәбьр кьн у һе незики Йаһоԝа бьн.

3. Шәйтʹан чь бӧхдан авитә сәрԝертийа Хԝәде?

³ Шәйтʹан дәрһәԛа изьна сәрԝертийа Йаһоԝа бӧхдан гьли кьр. Әԝи гот ԝәки йанчь Йаһоԝа сәрԝере хьраб ә  у әԝ тьштед баш жь мә вәдьшерә. Шәйтʹан ӧса жи гот ԝәки йанчь һәрге мәрьва хԝәха сәр хԝә сәрԝерти бькьрана, әԝана ԝе һе бәхтәԝар буна (Дәстп. 3:1-5). Әԝи ӧса жи гот, кӧ йанчь тʹӧ мәрьв бь дьл Хԝәдерʹа амьн нинә, у гава әԝ бькʹәвьнә тәнгасийа, ԝе Хԝәде чаԝа сәрԝере хԝә ԛәбул нәкьн (Иб. 2:4, 5). Ләма жи Йаһоԝа ԝәʹдә да, ԝәки гьшк пе чʹәʹве хԝә бьвиньн кӧ бей сәрԝертийа Хԝәде жийин гәләк чәтьн ә.

4. Чьрʹа пьрса дәрһәԛа сәрԝертийа Хԝәде гәрәке бе сафикьрьне?

⁴ Йаһоԝа занә, ԝәки чь кӧ Шәйтʹан гот һʹәму тьшт дәрәԝ ә. Ԝәки ӧса нә, чьрʹа Хԝәде ԝәʹдә да Шәйтʹан кӧ гьлийед хԝә избат кә? Чьмки щаба ве пьрсе һәр кәси дькʹәвә, ча мәрьва ӧса жи мьлйакʹәта. (Бьхунә Зәбур 83:18.) Адәм у Һеԝайе һʹӧкӧмәтийа Йаһоԝа бәр тьштәки һʹәсаб нәкьрьн, у паши ԝан жи һәбун кәсед ӧса кӧ мьԛабьли сәрԝертийа Хԝәде дәркʹәтьн. Ләма жи һьнәк дькарьн бькʹәвьнә шьке у баԝәр кьн кӧ Мире-щьна рʹаст ә. Сәва кӧ нав тʹәмамийа гәрдунеда әʹдьлайи һәбә, әв пьрс гәрәке бе сафикьрьне. У гава бе избаткьрьне ԝәки сәрԝертийа Йаһоԝа йе һәри баш ә, ԝи чахи ида гьшк ԝе бьжин бьн сәрԝертийа ԝийә ԛәнщда у тʹәмамийа гәрдунеда ԝе әʹдьлайи һәбә (Әфәс. 1:9, 10).

5. Ча әм дькарьн алийе сәрԝертийа Йаһоԝа бьгьрьн?

⁵ Зутьрәке ԝе бе избаткьрьне ԝәки сәрԝертийа Хԝәде рʹаст ә, ле сәрԝертийа Шәйтʹан у мәрьва ԝе бе һьлдане. Сәрԝертийа Хԝәде бь сайа Пʹадшатийе, ԝе нета хԝә бинә сери у мәрьвед амьн ԝе избат кьн кӧ мәрьв дькарә бь амьни пьштгьрийа сәрԝертийа Хԝәде бькә (Иша. 45:23, 24). Бешьк, һун дьхԝазьн нава ԝан мәрьвада бьн, ӧса нинә? Сәва әм амьнийа хԝә хԝәй кьн, лазьм ә әм фәʹм бькьн, ԝәки чьԛас фәрз ә пьштгьрийа сәрԝертийа Хԝәде бькьн.

6. Чьԛас фәрз ә ԝәки бе избаткьрьне кӧ тʹәне Йаһоԝа йә хԝәйиһʹӧкӧм?

⁶ Йа лапә фәрз әԝ ә, кӧ бе избаткьрьне ԝәки тʹәне Йаһоԝа йә хԝәйиһʹӧкӧм. Әԝ йәк дьһа фәрз ә, нә кӧ әʹмьр у бәхтәԝарийа мә. Ле гәло әԝ те һʹәсабе ԝәки Йаһоԝа мә һʹьз накә у әʹмьре мә бона ԝи ԛимәт нинә? Тʹӧ щар на! Ле әм жь кʹӧ заньн ве йәке?

7, 8. Әме чь кʹаре бьстиньн гава изьна сәрԝертийа Хԝәде бе избаткьрьне?

⁷ Йаһоԝа мәрьва ԛайим һʹьз дькә. Әԝ ӧса мә ԛимәт дькә кӧ Кӧрʹе хԝә ԛӧрбан кьр сәва әм жийина һʹәта-һʹәтайе бьстиньн (Йуһʹн. 3:16; 1 Йуһʹн. 4:9). Һәрге Йаһоԝа созед хԝә дәрһәԛа ахьрийе нәйнә сери, гьлийед Шәйтʹан ԝе рʹаст дәрен, кӧ йанчь Хԝәде тьштед баш жь мә вәдьшерә у кӧ әԝ сәрԝере хьраб ә. Һьн жи мәрьвед кӧ мьԛабьли Хԝәде нә, ԝе ԛәрфа созед Йаһоԝа бькьн бь ԝан гьлийа: «Кʹа әԝ созе һатьна ԝи? Бавед мә әʹмьре Хԝәде щи анин чун, ле һәр тьшт һе жь ԝәхте әʹфьрандьна дьнйайеда ӧса манә» (2 Пәт. 3:3, 4). Ле Йаһоԝа хԝәйе созед хԝә йә. Гава кӧ изьна сәрԝертийа ԝи бе избаткьрьне, ԝи чахи мәрьвед гӧһдар ԝе хьлаз бьн. (Бьхунә Ишайа 55:10, 11.) Бәле, сәрԝертийа Йаһоԝа сәр һʹиме һʹьзкьрьне йә. Ләма әм гәрәке тʹӧ щар дӧдьли нәбьн, кӧ әԝ ԝе тʹьме хьзмәткʹаред хԝәйи амьн һʹьз бькә у ԛимәт кә (Дәркʹ. 34:6).

⁸ Рʹаст ә пьрса лапә фәрз әԝ ә кӧ пьштгьрийа сәрԝертийа Йаһоԝа бькьн, ле әԝ найе һʹәсабе ԝәки әʹмьре мә бәр чʹәʹве Хԝәде ԛимәт нинә. Әм  гәрәке рʹаст бьньһерʹьн сәр ве пьрса фәрз у сәр әʹмьре хԝә, чьмки ӧса әме бькарьбьн бь тʹәмами пьштгьрийа сәрԝертийа Йаһоԝа бькьн.

9. Шәйтʹан чь шәрʹ авитә Ибо? (Бьньһерʹә шькле әʹԝльн.)

⁹ Әм гәрәке рʹаст фәʹм бькьн кӧ чьрʹа пьрса дәрһәԛа сәрԝертийа Йаһоԝа гәрәке бе сафикьрьне. Кʹьтеба Ибода әԝ йәк зәлал те кʹьфше. Ль ԝедәре әм педьһʹәсьн, ԝәки Шәйтʹан гот кӧ һәрге Ибо бькʹәвә тәнгасийед гьран у бьчәрчьрә, әԝ ԝе пьшта хԝә бьдә Хԝәде. У әԝи Хԝәдерʹа гот, ԝәки Ибо бьчәрчьринә. Йаһоԝа әԝ йәк нәкьр, ле изьн да Шәйтʹан кӧ әԝ хԝәха Ибо бьщерʹьбинә, у гот: «А вай һʹәчʹи тьштед ԝи йед һәнә, дь дәсте тәда нә». (Бьхунә Ибо 1:7-12.) Һьнә ԝәʹдә дәрбаз бу, у Ибо бәрдәстийед хԝә, һәбуна хԝә, у дәһ зарʹед хԝәйи дәлал ӧнда кьр. Шәйтʹан ӧса әԝ бәла ани сәре Ибо, кӧ бе кʹьфше йанчь хԝәха Хԝәде әԝ бәла ани сәре ԝи (Иб. 1:13-19). Паши ве йәке, Шәйтʹан Ибо нәхԝәш хьст бь нәхԝәшийа гәләк гьран (Иб. 2:7). Кӧла ԝи бәси ԝи нибу, жьна ԝи у се һәвалед ԝи йед кӧ һьндава ԝи һʹәлал нибун, бь гьлийед хԝә дьле ԝи һе зәʹф ешандьн (Иб. 2:9; 3:11; 16:2).

10. а) Ибо ча амьнийа хԝә Хԝәдерʹа избат кьр? б) Чьда Иборʹа ширәткьрьн лазьм бу?

¹⁰ Ахьрийа ве йәке чь бу? Чь кӧ Шәйтʹан шәрʹ авитә Ибо, дәрәԝ дәркʹәтьн. Ибо тәнгасийада пьшта хԝә нәда Хԝәде (Иб. 27:5). Ле ԝи ԝәʹдәйи һьнә фькьред нәрʹаст кʹәтьнә һʹьше Ибо. Әԝ гәләк кʹәтә һәйрʹа хԝә у һәԛийа хԝә. Әԝи һәла һе дәʹԝа жи дькьр кӧ гәрәке бьзаньбә чьрʹа ӧса һатә сәре ԝи (Иб. 7:20; 13:24). Һәрге әм хԝә дайньн дәԝса Ибо, дьбәкә әм бькарьбьн ԝи фәʹм кьн. Ле Хԝәде дит ԝәки Иборʹа ширәт лазьм ә, чьмки әԝ нәрʹаст дьфькьри. Ле гәло ча Йаһоԝа ԝи ширәт кьр?

11, 12. Йаһоԝа али Ибо кьр ԝәки чь фәʹм кә?

¹¹ Әв гьлийед кӧ Хԝәде Иборʹа гот, ньвисар ьн кʹьтеба Ибода сәре 38-41. Ле тʹӧ щики нәньвисар ә ԝәки Хԝәде Иборʹа мәʹнийа кӧл-дәрдед ԝи дьбежә. Һьн жи нета Йаһоԝа әԝ нибу кӧ хԝә һәԛ дәрхә у Иборʹа шьровәкә кӧ чьрʹа әԝ дьчәрчьрә. Дәԝсе Хԝәде али ԝи кьр, ԝәки әԝ фәʹм кә кӧ бәр Хԝәде әԝ чьԛас бьчʹук ә у кӧ тьштед дьһа фәрз һәнә нә кӧ проблемед ԝи. (Бьхунә Ибо 38:18-21.) Гьлийед Хԝәде али Ибо кьрьн ԝәки ньһерʹандьна хԝә рʹаст кә.

¹² Гәло әм дькарьн бежьн, ԝәки ширәткьрьна Йаһоԝа сәрт бу, чьмки Ибо һаԛас дәрд дит? На, Хԝәде ԛә сәрт  нибу у нә жи Ибо ӧса фькьри. Рʹаст ә әԝи кӧл-дәрдед гьран дит, ле ахьрийеда әԝи рʹазибуна хԝә да кʹьфше Хԝәдерʹа. Әԝи һәла һе жи гот: «Әз хԝә бьчʹук дьвиньм у дь хԝәли у тʹозеда тʹобә кьрьнеда мә!» (Иб. 42:1-6). Бәле, ширәткьрьна Йаһоԝа баш һʹӧкӧм бу сәр Ибо. Пешийа ԝе йәке, Әлиһу жи Ибо ширәт кьр, ԝәки әԝ рʹаст бьфькьрә (Иб. 32:5-10). Ибо ширәтед Йаһоԝа ԛәбул кьр, у Йаһоԝа дит кӧ Ибо фькьред хԝә гӧһаст. Паши ве йәке, Йаһоԝа мәрьвед дьнрʹа гот кӧ әԝ Ибо ԛәбул дькә, чьмки әԝ ԝәʹде кӧл-дәрда Хԝәдерʹа амьн ма (Иб. 42:7, 8).

13. Ширәткьрьна Йаһоԝа ԝе чьда кери Ибо бьһата паши тәнгасийед ԝи?

¹³ Чахе кӧл-дәрдед Ибо хьлаз бьбун жи, диса әԝ ширәтед Йаһоԝа кери ԝи дьһатьн. Йаһоԝа хьлазийа әʹмьре Ибо һе зедә кʹәрәм кьр у ԝәʹдә дәрбаз бу, диса «һʹәфт лаԝ у се ԛизед ԝи жи бун» (Иб. 42:12-14). Рʹаст ә Ибо әԝ зарʹед хԝә һʹьз дькьр, ле әԝи бира ԝан зарʹед хԝә жи дькьр йед кӧ жь дәсте Шәйтʹан һатьнә кӧштьн. Дьбәкә әԝи нә жи бир дькьр әԝ һʹәму чәтьнайед хԝә кӧ әԝи дит. Һәрге жи Ибо ахьрийеда мәʹнийа щәфе хԝә пеһʹәсийа, йәкә дьбәкә ԝирʹа бь тʹәмами фәʹмдари нибу кӧ чьрʹа Хԝәде һишт, ԝәки әԝ кӧл-дәрдед ӧса гьран бьвинә. Ле әԝ чь жи бьфькьрийа, йәкә әԝи ширәтед Хԝәде бира хԝәда хԝәй дькьр у сәр дьфькьри. У әԝе йәке ԝе али ԝи бькьра кӧ ньһерʹандьна рʹаст хԝәй кә у ӧса жи бәрдьлийе бьстинә (Зәб. 94:19).

14. Әм чь дькарьн һин бьн жь мәсәла Ибо?

¹⁴ Әм жи дькарьн ньһерʹандьна хԝә рʹаст кьн у бәрдьлийе бьстиньн һәрге сәр сәрһатийа Ибо бьфькьрьн. Йаһоԝа әԝ сәрһати хԝәй кьр «бона һинбуна мә . . . , ԝәки әм бь сәбьре у ԝан готьнед ньвисарада кӧ бине дьдьнә бәр мә» баԝәр бьн (Рʹом. 15:4, ИМ). Гәло әм чь дәрсе һин дьбьн жь сәрһатийа Ибо? Дәрса пешьн әԝ ә: Әм гәрәке ӧса нәкʹәвьнә һʹәйра тәнгасийед хԝә, кӧ пьрсәкә лапә фәрз бир кьн, демәк пьштгьрийа сәрԝертийа Йаһоԝа. Хенщи ве йәке, әм гәрәке бьшекьриньн ԝи ԛәдьри кӧ әм дькарьн пьштгьрийа сәрԝертийа Хԝәде бькьн, у мина Ибо ԝәʹде тәнгасийед гьранда жи жерʹа амьн бьминьн.

15. Чь кʹар ә һәрге әм тәнгасийада Хԝәдерʹа амьн дьминьн?

¹⁵ Сәрһатийа Ибо мә дьлгәрм дькә, чьмки дьдә кʹьфше кӧ амьнийа мә бадиһәԝа нинә. Һьн жи һәрге әм кӧл-дәрда дькʹьшиньн, әԝ найе һʹәсабе кӧ Йаһоԝа мә ԛәбул накә. Хенщи ве йәке, әм ԝәʹде  тәнгасийа дькарьн Йаһоԝарʹа нишан кьн, ԝәки әм пьштгьрийа һʹӧкӧмәтийа ԝи дькьн (Мәтʹлк. 27:11). Чахе әм сәбьр дькьн у ԛәԝи дьминьн, дьле Йаһоԝа ша дьбә, у һьн жи баԝәрийа мә бона ахьрийе һе ԛәԝи дьбә. (Бьхунә Рʹомайи 5:3-5.) Сәрһатийа Ибо избат дькә, ԝәки Йаһоԝа «чьԛаси исаф у рʹәʹм ә!» (Аԛуб 5:11). Бәле, әм гәрәке ԛә дӧдьли нәбьн кӧ Йаһоԝа ԝе һьн мә хәлат кә у һьн жи һʹәмушка йед кӧ пьштгьрийа сәрԝертийа ԝи дькьн. Занәбуна ве йәке ԝе али мә бькә «һәр тьштида бь думька дьреж сәбьр бькьн» у шабуна хԝә ӧнда нәкьн (Колс. 1:11).

16. Чьрʹа лазьм ә әм бир нәкьн кӧ чьԛас фәрз ә пьштгьрийа сәрԝертийа Йаһоԝа бькьн?

¹⁶ Бәле, дина мә гәрәке сәр ве йәке бә, кӧ пьштгьрийа сәрԝертийа Йаһоԝа бькьн. Ле ԝәʹде тәнгасийа һеса нинә һʹьш-аԛьле хԝә дайньн сәр ве йәке. Щара чәтьнайа бьчʹук дькарә мәрʹа гәләк мәзьн бе кʹьфше һәрге әм тʹьме дьфькьрьн сәр ве чәтьнайе. Ләма жи ԝәʹде чәтьнайа фәрз ә тʹьме биньн бира хԝә, кӧ чьԛас фәрз ә пьштгьрийа сәрԝертийа Хԝәде бькьн.

17. Һәрге әм тʹьме нава шьхӧле Йаһоԝада ньн, әԝ йәк чьда али мә дькә?

¹⁷ Һәрге әм тʹьме нава шьхӧле Йаһоԝада ньн, әԝ йәк ԝе али мә бькә ԝәки әм бир нәкьн пьрса лапә фәрз. Ԝәрә мәсәләке шеԝьр кьн. Хушкәкә мә наве кʹижане Рене йә, еша кʹроник дькʹьшанд, инсулте лехьстьбу, у һьн жи рәԛа ԝе һәбу. Һʹәта кӧ әԝ нәхԝәшханеда бу, әԝе шәʹдәти дьда хәбатчийа, нәхԝәша у ӧса жи ԝан йед кӧ дьһатьнә нәхԝәшхане. Щарәке чахе Рене диса кʹәтә нәхԝашхане сәр дӧ һʹәфтийа у нив, әԝе 80 сьһʹәта шәʹдәти да. Һәла һе бәр мьрьне жи Рене тʹӧ щар бир нәдькьр пьрса лапә фәрз, демәк пьштгьрийа сәрԝертийа Йаһоԝа. Әԝе тʹьме пьштгьрийа сәрԝертийа Йаһоԝа дькьр у әве йәке әʹдьлайи дьда ԝе.

18. Ча мәсәла хушкәке дьдә кʹьфше кӧ әм кʹаре дьстиньн, чахе пьштгьрийа сәрԝертийа Йаһоԝа дькьн?

¹⁸ Һәр рʹож әм рʹасти чәтьнайа тен, у ԝи чахи жи әм дькарьн пьштгьрийа һʹӧкӧмәтийа Йаһоԝа бькьн. Хушкәк бь наве Щенифер се рʹожа аеропортеда ма, чьмки ԝәʹде фьрине әглә бу. Йәк пәй йәке әԝ фьрин әглә дькьрьн. Щенифер тʹәне бу у вәстийа бу. Ԝи чахи әԝе һеса дькарьбу гӧнә хԝә хԝә бинә у бькʹәвә һәйрʹа хԝә. Ле әԝе Хԝәдерʹа дӧа дькьр, сәва мерхасийе бьдә ԝе, ԝәки ԝан мәрьварʹа мьзгинийе гьли кә йед кӧ һʹале ԝеда бун. Гәло ахьрийа ве йәке чь бу? Әԝе гәләкарʹа шәʹдәти да у гәләк әʹдәбйәт жи бәла кьр. Щенифер гьли дькә: «Мьн тʹәхмин дькьр ԝәки ве чәтьнайеда Йаһоԝа мьн кʹәрәм кьр у ԛәԝат да мьн сәва наве ԝи рʹумәт кьм». Бәле, һʹьш-аԛьле ԝе сәр ԛьрара Йаһоԝа бу.

19. Чьда щьмәʹта Хԝәде щӧдә дьбә жь динед ԛәлп?

¹⁹ Щьмәʹта Хԝәде бәреда пьштгьрийа сәрԝертийа Йаһоԝа дькә. У әв йәк ԝана щӧдә дькә жь динед ԛәлп. Ләма жи ԝәрә әм тʹьме алийе хԝәда һʹәму тьшти бькьн ԝәки бәрдәԝам кьн пьштгьрийа сәрԝертийа Йаһоԝа бькьн.

20. Һәрге әм пьштгьрийа сәрԝертийа Йаһоԝа дькьн, әм чьда дькарьн баԝәр бьн?

²⁰ Баԝәр бьн кӧ Йаһоԝа ԛимәт дькә ве йәке, кӧ һун пьштгьрийа сәрԝертийа ԝи дькьн у бь амьни ԝирʹа хьзмәт дькьн, һәла һе ԝи чахи жи гава рʹасти чәтьнайа тен (Зәб. 18:25). Готара дьнда әме шеԝьр кьн кӧ чьрʹа гәрәке пьштгьрийа сәрԝертийа Йаһоԝа бькьн у ча әм дькарьн әве йәке бькьн.