1, 2. Чьда гәрәке щәм мә шьк тʹӧнә бә? (Бьньһерʹә шькле әʹԝльн.)

ГОТАРА пешийа веда, мә шеԝьр кьр кӧ Мире-щьна шәрʹ авитә Йаһоԝа, кӧ йанчь әԝ сәрԝере хьраб ә. Жь гьлийед Шәйтʹан һатә кʹьфше те бежи изьна Йаһоԝа тʹӧнә кӧ һʹӧкӧмтийе бькә у кӧ инсанәт ԝе һе бәхтәԝар буйа һәрге хԝәха сәр хԝә сәрԝерти бькьра. Гәло гьлийед ԝи рʹаст ьн? Бәʹса хәбәре, бьдьнә бәр чʹәʹве хԝә кӧ мәрьв хԝәха сәр хԝә сәрԝерти бькьрана у һʹәта-һʹәтайе бьжитана. Гәло әԝана ԝе бей сәрԝертийа Хԝәде бәхтәԝар бьжитана? Ле һуне бәхтәԝар буна һәрге ԝә һʹәта-һʹәтайе бьжита у хԝә сәре хԝә буна?

² Щаба ԝан пьрса һун хԝәха гәрәке бьдьн. У һәр кәс жь мә гәрәке кʹур бьфькьрә сәр ван пьрса. Гава әм кʹур бьфькьрьн, шьк ԝе щәм мә тʹӧнә бә, кӧ Йаһоԝа сәрԝере рʹаст ә у һʹӧкӧмәтийа ԝи һәри баш ә. Ләма жи әԝ һежа йә кӧ әм бь дьл у щан пьштгьрийа сәрԝертийа ԝи бькьн. Кʹьтеба Пироз мәрʹа избаткьрьна дьдә кӧ әԝ йәк бешьк рʹаст ә. Ләма жи ԝәрә әм ньһа чәнд тьшта шеԝьр кьн, кʹижан кӧ избат дькьн, ԝәки тʹәне Йаһоԝа йә хԝәйиһʹӧкӧме тʹәмамийа гәрдуне.

3. Чьрʹа тʹәне Йаһоԝа йә бь ԛануни хԝәйиһʹӧкӧм?

³ Тʹәне Йаһоԝа йә бь ԛануни хԝәйиһʹӧкӧме дьнйайе, чьмки әԝ Хԝәдейе һьмзор у Әʹфьрандаре һәр тьшти йә  (1 Дир. 29:11; Кʹар. Шанд. 4:24). Әʹйанти сәре 4:11-да те гьликьрьне дәрһәԛа хәԝн-хәйаләке. Ве хәԝн-хәйаледа, сәр әʹзмана 144 000 кӧ тʹәви Мәсиһ ԝе пʹадшатийе бькьн, гьлийед ӧса дьбежьн: «Йа Хӧдан Хԝәдейе мә, тӧ һежа йи кӧ рʹумәт, һӧрмәте у ԛәԝате бьстини. Чьмки тә һәр тьшт әʹфьрандьн у бь хԝәстьна тә әԝ әʹфьрин у һәнә». Бәле, Йаһоԝа һәр тьшт әʹфьрандьн, у ләма бь тʹәмами тʹәне изьна ԝи һәйә ча сәр әʹрде, ӧса жи сәр әʹзмана сәр һʹәмуйа сәрԝертийе бькә.

4. Рʹаст ә азайа мәрьва һәйә бьжартьна бькьн, ле чьрʹа нәрʹаст ә кӧ мьԛабьли сәрԝертийа Хԝәде дәрен?

⁴ Шәйтʹан тʹӧ тьшт нәәʹфьрандийә, ләма жи изьна ԝи тʹӧнә сәрԝертийе дьнйайе бькә. Ле әԝ у мәрьвед пешьн хԝәрʹази бун, ләма әԝана мьԛабьли сәрԝертийа Йаһоԝа рʹабун (Йерәм. 10:23). Рʹаст ә азайа ԝан һәбу бьжберьн кӧ гӧрʹа Хԝәдеда бьн йан на, ле гәло әԝ бьжартьн рʹаст бу? На. Азайа бьжартьне мәрьварʹа изьне дьдә кӧ хԝәха бьжартьна у сафикьрьна бькьн, ле әԝ найе һʹәсабе ԝәки гәрәке мьԛабьли Әʹфьрандаре хԝә дәрен, кʹижан кӧ әʹмьр дайә ԝан. Демәк, кʹе кӧ мьԛабьли Хԝәде дәрте, әԝ азайа хԝә нәрʹаст дьдә хәбате. Бь рʹастийе һʹәму мәрьв гәрәке бьн сәрԝертийа Йаһоԝада бьн.

5. Чьрʹа әм дькарьн дӧдьли нәбьн кӧ сафикьрьнед Хԝәде тʹьме һәԛ ьн?

⁵ Диса мәʹни һәйә кӧ чьрʹа тʹәне изьна Йаһоԝа һәйә сәрԝертийе бькә. Йаһоԝа бь һәԛийе сәрԝертийе дькә. Йаһоԝа дьбежә: «Әз Йаһоԝа мә, әз бь һʹьзкьрьне, һәԛийе у рʹастийе мә һьндава әʹрде, чьмки әԝ йәк дьле мьн хԝәш те» (Йерәм. 9:24, ДТʹ). Йаһоԝа занә чь һәԛ у рʹаст ә, у жерʹа нәлазьм ә ԛанунед кӧ мәрьв хԝәха чекьрьнә. Йаһоԝа хԝәха ԛануна датинә, у әԝи ль гора һәԛийа хԝә мәрьварʹа ԛанун дайә. «Рʹасти у һәԛи әԝ бьнгәһед тʹәхте . . . [ԝи] нә». Ләма жи һʹәму ԛанун, принсип у сафикьрьнед ԝи рʹаст ьн (Зәб. 89:14; 119:128). Шәйтʹан гот кӧ йанчь Йаһоԝа Һʹӧкӧмдаре һәԛ нинә, ле хԝәха Шәйтʹан һәԛийе у рʹастийе нькарә бинә сәр дьнйайе.

6. Диса жь бо кʹижан мәʹники тʹәне изьна Йаһоԝа һәйә сәрԝертийе дьнйайе бькә?

⁶ Диса мәʹник һәйә кӧ чьрʹа тʹәне изьна Йаһоԝа һәйә сәрԝертийе бькә. Занәбун у биланийа ԝи һәйә, кӧ чаԝа сәрԝертийе гәрдуне бькә. Дина хԝә бьдьн, кӧ Хԝәде ԛәԝат да Кӧрʹе хԝә, ԝәки нәхԝәшийед ӧса ԛәнщ кә, кʹижан кӧ һʹәким нькарьн ԛәнщ кьн (Мәт. 4:23, 24; Марԛ. 5:25-29). Бона мә әԝ кʹәрәм ә, ле бона Йаһоԝа әԝ тьштәк нинә. Әԝ занә кӧ бәдәна мә ча чекьри йә у ча дьхәбьтә, у дькарә һәр нәхԝәши у зийане ԛәнщ кә. Әԝ ӧса жи дькарә мьрийа рʹакә у тʹәшԛәлед тʹәбийәте жи бьдә һьлдане.

7. Чьрʹа дьнйа бьн һʹӧкӧме Шәйтʹанда нькарә әʹдьлайе бинә?

⁷ Дьнйа бьн һʹӧкӧме Шәйтʹанда тʹӧ щар нькарә әʹдьлайе бинә нава мьләта, нә жи нава ԝәлата. Тʹәне Йаһоԝа дькарә әʹдьлайе бинә сәр дьнйайе, чьмки билани у сәрԝахтийа ԝи һәйә (Иша. 2:3, 4; 54:13). Гава әм кʹур бьфькьрьн сәр занәбун у биланийа Йаһоԝа, әме жи мина Паԝлос бьхԝазьн бежьн: «Чьԛаси кʹур ьн дәԝләмәндти, сәрԝахти у занәбуна Хԝәде! Ԛьраред ԝи чьԛаси жь һʹьш-аԛьла дур ьн у кәс сәрәдәрийе жь рʹийед ԝи накә!» (Рʹом. 11:33)

8. Чь ԝә хԝәш те ве йәкеда кӧ Йаһоԝа ча сәрԝертийе дькә?

⁸ Бәле, Кʹьтеба Пироз зәлал әʹйан дькә, ԝәки тʹәне изьна Йаһоԝа һәйә һʹӧкӧмтийе бькә. Ле ԝедәре ӧса жи те готьне кӧ чьрʹа әԝ сәрԝере һәри баш ә.  Мәʹник әԝ ә кӧ әԝ бь һʹьзкьрьне сәрԝертийе дькә. Чахе әм дьфькьрьн кӧ әԝ ча сәрԝертийе дькә, әм ԝи һе ԛайим һʹьз дькьн. Әԝ ә Хԝәдейе «рʹәʹм у кʹәрәме, сәбьр-ськʹане, бь һʹӧб у амьнийеда хьнейо» (Дәркʹ. 34:6). Хԝәде һьндава хьзмәткʹаред хԝә бь ԛәдьр ә. Әԝ занә мәрʹа чь лазьм ә у һе баш мә хԝәй дькә, нә кӧ әм хԝәха. Мире-щьна гот кӧ йанчь Йаһоԝа жь хьзмәткʹаред хԝә тьштед баш вәдьшерә. Ле әԝ дәрәԝа мәзьн ә! Нә Хԝәде бона мә Кӧрʹе хԝәйи дәлал ԛӧрбан кьр, сәва ахьрийеда әм һʹәта-һʹәтайе бьжин! (Бьхунә Зәбур 84:11; Рʹомайи 8:32.)

9. Әм жь кʹӧ заньн кӧ Хԝәде бона һәр кәси башԛә-башԛә хәм дькә?

⁹ Рʹаст ә Йаһоԝа тʹәмамийа щьмәʹта хԝә һʹьз дькә, ле әԝ ӧса жи бона һәр мәрьвәки башԛә-башԛә хәм дькә. Биньн бира хԝә сәрһатике кӧ бәре ԛәԝьми. Нава се ԛьрʹнада, Йаһоԝа бь сайа һʹакьма рʹебәри щьмәʹта хԝә дькьр, у али ԝан дькьр ԝәки шәрʹада дьжмьнед хԝә алт кьн. Ԝи ԝәʹде һәвкʹәтида, Йаһоԝа дина хԝә дьда сәр һәр мәрьвәки. Йәк жь ԝан Рʹутʹ бу, йа кӧ Исраели нибу, ле гәләк тьшт ԛӧрбан кьр ԝәки бьбә хьзмәткʹаре Йаһоԝа. Йаһоԝа сәва ве йәке ле кʹәрәм кьр, у әԝе мерәки баш станд у кӧрʹ жерʹа бу. Һьн жи кӧрʹе ԝе бу пʹара ве рʹькʹьнйате, жь кʹижани гәрәке Мәсиһ бьһата. Хенщи ве йәке, сәрһатийа ԝе Кʹьтеба Пирозда һатә ньвисаре. Бьдьнә бәр чʹәʹве хԝә, кӧ чахе әԝ жь мьрьне рʹабә у әԝан тьшта пебьһʹәсә, ԝе чьԛас ша бә кӧ Йаһоԝа ча ле кʹәрәм кьрийә! (Рʹутʹ 4:13; Мәт. 1:5, 16)

10. Йаһоԝа чь щурʹәйи сәрԝертийе дькә?

¹⁰ Йаһоԝа сәрԝере сәрт нинә у әԝ нә жи зоре кәсәки дькә кӧ гӧрʹа ԝида бә. Сәрԝертийа ԝи азайе тинә у мәрьва бәхтәԝар дькә (2 Корн. 3:17). Даԝьд дәрһәԛа Йаһоԝа ӧса гот: «Бьльндайи у мәзьнайи ль бәр ԝи нә; ԛӧдрәт у кʹефхԝәши ль щиһе кӧ әԝ ле рʹудьне нә» (1 Дир. 16:7, 27). Зәбурбеж Әйтʹан жи гот: «Хԝәзи ль ԝе щьмәʹте, кӧ занә дәнг һьлдә щәжьнерʹа. Хӧдано, әԝ бь рʹонайа рʹуйе Тә дьмәшьн. Тʹәмамийа рʹоже бь наве Тә ша дьбьн у бь азадийа Тә бьльнд дьбьн» (Зәб. 89:15, 16).

11. Чьрʹа әм дькарьн дӧдьли нәбьн кӧ сәрԝертийа Йаһоԝа һәри баш ә?

¹¹ Һәрге әм кʹур бьфькьрьн кӧ Йаһоԝа чьԛас ԛәнщ ә, әме дӧдьли нәбьн кӧ сәрԝертийа ԝи һәри баш ә. У әме жи мина зәбурбеж бьн, кʹижани кӧ Хԝәдерʹа гот: «Рʹаст рʹожәкә һʹәԝша Тәда, жь һʹәзар рʹожед дәрәкә четьр ә» (Зәб. 84:10). Йаһоԝа мә әʹфьранд у ләма әԝ занә чь бь рʹастийе мә бәхтәԝар у ша дькә. У әԝ һе зәʹф тьшта дьдә мә, нә кӧ чьԛас мәрʹа лазьм ә. Чь кӧ Йаһоԝа жь мә дәʹԝа дькә, тʹьме бона кʹара мә йә у шабуне мәрʹа тинә. Һәрге жи әм жь хԝә тьштәки кем дькьн сәва кӧ гӧрʹа ԝи бькьн, һьнге жи әм шабуне дьстиньн. (Бьхунә Ишайа 48:17.)

12. Бәре әʹԝльн чьрʹа әм дьхԝазьн пьштгьрийа сәрԝертийа Йаһоԝа бькьн?

¹² Кʹьтеба Пироз дьбежә кӧ паши Һʹәзарсалийа Пʹадшатийа Мәсиһ, һьнә мәрьв ԝе мьԛабьли сәрԝертийа Йаһоԝа рʹабьн (Әʹйан. 20:7, 8). Ле ԝе чь бьбә мәʹни кӧ әԝана ӧса бькьн? Мире-щьн ԝе жь зьндане бе бәрʹдане у бьхԝазә инсанәте бьхальфинә. Бешьк, ча һәр гав, әԝе диса жи бьхԝазә мәрьва бьдә баԝәркьрьне кӧ йанчь әԝана дькарьн гӧрʹа Хԝәде нәкьн у һʹәта-һʹәтайе бьжин. Ле әԝ йәк дәрәԝ у ԛәлп ә. Йәкә пьрс пешда те: «Гәло әме баԝәрийа хԝә ве ԛәлпийе биньн?» Һәрге әм Йаһоԝа һʹьз дькьн у дӧдьли ниньн кӧ әԝ ԛәнщ ә у кӧ тʹәне әԝ ә Сәрԝере гәрдуне, әме тʹӧ щар дәрәԝе ӧса баԝәр нәкьн. Әме  бьхԝазьн тʹәне бьн пʹәʹре Йаһоԝада бьжин, демәк бьн сәрԝертийа ԝийә һәԛда.

13. Диса ча әм дькарьн нишан кьн кӧ әм сәрԝертийа Хԝәде ԛәбул дькьн?

¹³ Ча мә ида шеԝьр кьр, тʹәне Йаһоԝа хԝәйиһʹӧкӧм ә у сәрԝертийа ԝи йа һәрә баш ә. Бешьк, Йаһоԝа һежа йә, ԝәки әм пьштгьрийа сәрԝертийа ԝи бькьн. Чахе әм жерʹа хьзмәт дькьн, амьн дьминьн у чʹәʹв дьдьнә ԝи, ӧса әм нишан дькьн кӧ пьштгьрийа сәрԝертийа ԝи дькьн. Чахе әм һәр тьштида ньһерʹандьна Йаһоԝа һьлдьдьнә һʹәсаб, әм избат дькьн кӧ ԝи һʹьз дькьн у сәрԝертийа ԝи ԛәбул дькьн. (Бьхунә Әфәси 5:1, 2.)

14. Рʹуспи у малхед мале ча дькарьн чʹәʹв бьдьнә Йаһоԝа?

¹⁴ Әм жь Кʹьтеба Пироз пеһʹәсийан кӧ Йаһоԝа бь һʹьзкьрьн сәрԝертийе дькә. Рʹуспи у малхед мале, йед кӧ сәрԝертийа Йаһоԝа һʹьз дькьн, ве йәкеда ԝе чʹәʹв бьдьнә Йаһоԝа. Әԝана ԝе тʹӧ щар сәрт нибьн у йед майин контрол нәкьн. Паԝлосе шанди тʹьме чʹәʹв дьда Хԝәде у Кӧрʹе ԝи (1 Корн. 11:1). Әԝи тʹӧ кәс беһӧрмәт нәдькьр у нә жи зоре ԝан дькьр ԝәки тьштед рʹаст бькьн. Дәԝсе, әԝи ԝана һелан дькьр у жь ԝан һиви дькьр (Рʹом. 12:1; Әфәс. 4:1; Фьльмн. 8-10). Ӧса әԝи чʹәʹв дьда Йаһоԝа. Бәле, һәр кәс жь мә йе кӧ сәрԝертийа Йаһоԝа һʹьз дькә, гәрәке һьндава мәрьвада ӧса бә.

15. Гава әм ԛәдьре ԝан дьгьрьн кʹерʹа Йаһоԝа һʹӧкӧм дайә, бь ве йәке ча әм һʹьзкьрьна хԝә Йаһоԝарʹа нишан дькьн?

¹⁵ Әм гәрәке һәвкʹарийе бькьн тʹәви ԝан, кʹерʹа Йаһоԝа һʹӧкӧм дайә. Ԝи щурʹәйи әме нишан кьн кӧ пьштгьрийа сәрԝертийа Йаһоԝа дькьн. Һәрге жи әм бь тʹәмами фәʹм накьн йан жи ԛайил ниньн тʹәви сафикьрьнәкә ԝан, әме диса жи пьштгьрийа ԝан бькьн. Ве дьнйайеда ӧса нинә, ле һәрге әм  дьхԝазьн бьн сәрԝертийа Йаһоԝада бьжин, әм гәрәке ӧса бькьн (Әфәс. 5:22, 23; 6:1-3; Ибрн. 13:17). Хԝәде мәрʹа ԛәнщийе дьхԝазә, ләма жи чь кӧ әԝ дьбежә, тʹьме бона кʹара мә йә.

16. Әм чаԝа гәрәке сафикьрьна бькьн?

¹⁶ Чахе әм сафикьрьна дькьн, һьнге жи әм дькарьн нишан кьн кӧ пьштгьрийа сәрԝертийа Хԝәде дькьн. Йаһоԝа бона һәр дәрәща мәрʹа тʹәмийед конкрет надә. Ле әԝ мәрʹа нишан дькә кӧ ньһерʹандьна ԝи ча нә. Бәʹса хәбәре, әԝи мәрʹа ԛанун нәдайә кӧ әм чь кʹьнща гәрәке хԝә кьн у чь на. Ле әԝи мәрʹа әʹйан кьрийә кӧ әԝ дьхԝазә ԝәки әм бь мьлукти хԝә кьн у хԝә бьхәмьлиньн, ча лайиԛи хьзмәткʹаред Хԝәде йә (1 Тимтʹ. 2:9, 10). Әԝ ӧса жи дьхԝазә ԝәки әм бь кьред хԝә у сафикьрьнед хԝә мәрьва нәлькʹуминьн (1 Корн. 10:31-33). Чахе әм һәр гавед хԝәда фькьред Йаһоԝа һьлдьдьнә һʹәсаб, әм жерʹа нишан дькьн кӧ ԝи һʹьз дькьн у сәрԝертийа ԝи ԛәбул дькьн.

17, 18. Жьн-мер ча дькарьн нишан кьн ԝәки пьштгьрийа сәрԝертийа Йаһоԝа дькьн?

¹⁷ Ԝәрә шеԝьр кьн, кӧ жьн у мер ча дькарьн пьштгьрийа сәрԝертийа Йаһоԝа бькьн щурʹә-щурʹә дәрәщада. Мәсәлә, чахе жьн у мер зәԝащеда гәләк чәтьнайа дьвиньн, ле һивийа ве йәке нибун. Йан жи әԝана гәләк дьлтәнг дьбьн кӧ зәԝаща ԝан ӧса нинә чаԝа ԝана дьхԝәст. Һьнге ԝе гәләк керһати бә һәрге жьн у мер бьфькьрьн кӧ Йаһоԝа ча бу һьндава Исраеле. Йаһоԝа хԝә нав кьр ча мере ви мьләти (Иша. 54:5; 62:4). Һәләԛәтийа Йаһоԝа тʹәви ви мьләти мина «зәԝащәке» чәтьн бу, чьмки ԝана гәләк щар дьле ԝи дешандьн! Ле йәкә Йаһоԝа ләз нәкʹәт тʹәрка ԝан бьдә. Әԝи диса у диса рʹәʹма хԝә дьда кʹьфше һьндава ԝан у пәймана хԝә тʹәви ԝан хԝәй дькьр. (Бьхунә Зәбур 106:43-45.) Әԝ һʹьзкьрьна Йаһоԝайә ӧса мәзьн, рʹасти жи дьле мә дьгьрә!

¹⁸ Һәрге жьн у мер Йаһоԝа һʹьз дькьн, әԝана ԝе чʹәʹв бьдьнә ԝи. Һәрге зәԝащеда чәтьнайед ԝан һәнә, әԝана ԝе мәʹнийа нәгәрʹьн сәва кӧ жь һәв бьԛәтьн. Әԝана рʹьнд фәʹм дькьн кӧ Йаһоԝа ԝана кьрийә йәк у әԝ дьхԝазә ԝәки әԝана хԝә ль һәвдӧ бьгьрьн. Кʹьтеба Пироз дьбежә кӧ тʹәне мәʹник һәйә, жь бо чь жи жьн-мер дькарьн жь һәв бьԛәтьн, әԝ һәйә ԛави (Мәт. 19:5, 6, 9). Гава мер у жьн алийе хԝәда һәр тьшти дькьн сәва зәԝаща хԝә хԝәй кьн, бь ве йәке әԝана избат дькьн кӧ пьштгьрийа сәрԝертийа Йаһоԝа дькьн.

19. Әм гәрәке чь бькьн чахе шашийа дькьн?

¹⁹ Әм гьшк щара шашийа дькьн у дьле Йаһоԝа дешиньн, чьмки әм гӧнәкʹар ьн. Әԝ занә әԝе йәке у бона ве йәке Кӧрʹе хԝә кьрә ԛӧрбан. Ләма чахе әм шашийа дькьн, әм гәрәке жь Йаһоԝа бахшандьне бьхԝазьн (1 Йуһʹн. 2:1, 2). У жь ԝан шашийа әм гәрәке хԝәрʹа дәрсе һьлдьн, нә кӧ тʹьме хԝә нәһәԛ кьн у бьчәрчьриньн. Һәрге әм диса жи хԝә ль Йаһоԝа бьгьрьн, әԝ ԝе мә бьбахшинә у бьринед дьле мә ԛәнщ кә у ахьрийеда әме бьзаньбьн ча ԝан дәрәщада хԝә бьдьнә кʹьфше (Зәб. 103:3).

20. Чьрʹа әм гәрәке ньһа пьштгьрийа сәрԝертийа Йаһоԝа бькьн?

²⁰ Дьнйа тʹәзәда, һәр кәс ԝе бьн сәрԝертийа Йаһоԝада бьжи у дәрһәԛа нет-мәрәмед ԝи һе зедә пебьһʹәсә (Иша. 11:9). Ле ньһа жи әм дькарьн дәрһәԛа ԝи һе зедә пебьһʹәсьн. У зутьрәке ԝе бе избаткьрьне кӧ тʹәне изьна Йаһоԝа һәйә сәрԝерти сәр дьнйайе бькә. Һʹәта әԝ рʹож бе, ԝәрә әм пьштгьрийа сәрԝертийа Йаһоԝа бькьн, демәк гӧрʹа ԝи бькьн, жерʹа хьзмәт кьн, у чьԛас дькарьн һәр тьштида чʹәʹв бьдьнә ԝи.