Ileta Jud 1:1-25

  • Uyere (1, 2)

  • U muẹro nọ a ti bruoziẹ kpe otu-iwuhrẹ erue (3-16)

    • Maekẹl avọ Ẹdhọ a jẹ vro avro (9)

    • Eruẹaruẹ Enọk (14, 15)

  • Wha hai ru eware nọ Ọghẹnẹ o re ro you owhai (17-23)

  • Ọ rehọ oruaro kẹ Ọghẹnẹ (24, 25)

 Jud, ọrigbo Jesu Kristi, rekọ nọ ọ rrọ oniọvo Jemis,+ ro se enọ a se na+ nọ Ọghẹnẹ Ọsẹ na o you jẹ be sẹro kẹ Jesu Kristi:+  Jọ Ọghẹnẹ o dhesẹ ohrọ-oriọ gbe uyoyou kẹ owhai je ru owhai wo udhedhẹ vi epaọ anwẹdẹ.  Iyoyou, dede nọ mẹ jẹ daoma kpobi re me kere se owhai kpahe esiwo nọ ọ rrọ rọkẹ omai kpobi,+ mẹ ruẹ nọ u fo re me kere se owhai rọ tuduhọ owhai awọ nọ wha họre gaga rọkẹ ẹrọwọ na,+ onọ a rọ kẹ erẹri na ẹsiẹvo rọkẹ oke kpobi.  Ẹjiroro nọ me bi ro kere onana họ, ezae jọ a lẹlẹ ruọ udevie rai no, enọ Ikereakere na e ta kpahe ẹdhoguo obrukpe rai no anwẹdẹ; enana yọ ahwo omuomu nọ a be rẹriẹ uwowou ulogbo Ọghẹnẹ mai fihọ uvẹ nọ a bi ro duomahọ uruemu nọ u fo ho nọ a re ru ababọ omovuọ,*+ jẹ be rọ uruemu rai dhesẹ nọ a siọ ọnọ o wo omai* jẹ rrọ Olori mai, Jesu Kristi.+  Dede nọ wha riẹ eware nana kpobi ziezi, mẹ gwọlọ kareghẹhọ owhai nọ, dede nọ Jihova* o siwi ahwo riẹ no ẹkwotọ Ijipti ze,+ ọ raha enọ i je dhesẹ ẹrọwọ họ uwhremu na.+  Yọ ikọ-odhiwu nọ e daji oria rai hi rekọ nọ e nyasiọ oria nọ u fo nọ a rẹ rria ba,+ ọ rehọ egbregba ebẹdẹ bẹdẹ gba ae fihọ ebi ọlala be hẹrẹ ẹdhoguo ẹdẹ ologbo na.+  Epọvo na re, Sọdọm avọ Gomora gbe ikpewho nọ e wariẹ e rai họ a romakẹ ọfariẹ-ogbe* ọgaga gbe isiuru uwo nọ u wo ohẹriẹ no epanọ Ọghẹnẹ ọ ma riẹ no otọ ze.+ A rehọ erae ebẹdẹ bẹdẹ raha ae, fikiere a rrọ oriruo unuovẹvẹ kẹ omai.+  Ghele onana, ezae nana omarai a be wezẹ ewezẹ, a bi gbe oma na ku, rri udu-esuo vo, jẹ be ta eme iyoma kpahe enọ i wo oruaro.+  Rekọ okenọ Maekẹl+ ukọ-odhiwu oride na+ avọ Ẹdhọ a jẹ vro avro kpahe ugboma Mosis,+ ọ dawo e riẹ rehọ eme ekela brukpe+ Ẹdhọ họ, rekọ ọ ta nọ: “Jọ Jihova* ọ whọku owhẹ.”+ 10  Rekọ ezae nana a be ta eme iyoma kpahe eware kpobi nọ a wo otoriẹ rai hi.+ Yọ eware kpobi nọ a wo otoriẹ rai wọhọ epanọ o sa no ai eva ze wọhọ erao nọ i wo iroro ho,+ a bi ru ai ro gbe oma rai ku. 11  U yoma kẹ ae kẹhẹ, keme a lele edhere Keni no,+ a họrọ ruọ edhere ọthọthọ Belam+ nọ ọ jẹ rọ gwọlọ osohwa no, yọ ọraha o te rai no fikinọ a be ta eme ọwọsuọ+ wọhọ Kora.+ 12  Ahwo nana họ itho nọ i dhere obotọ ame evaọ ehaa rai nọ wha bi ro dhesẹ uyoyou nọ a te bi lele owhai re emu,+ ithuru-igodẹ nọ e be kuọ omobọ rai ababọ ozọ;+ ẹgho nọ ọ kare ame nọ ofou ọ be wọ kpenẹ avọ enẹ;+ ire nọ e be mọ ibi hi evaọ ezi rai,* nọ i whu no riẹriẹriẹ* a te je vi ai no otọ no; 13  a wọhọ ẹkporo ọgaga abade nọ ọ be wọ ivuhu erọ iruemu omovuọ rai ze;+ isi obọ ehru nọ e riẹ obonọ a rẹ nya rri hi, enọ a ruẹrẹ ebi nọ ọ mai bi kpaobọ họ kẹ bẹdẹ bẹdẹ.+ 14  Ẹhẹ, Enọk ohwo avọ ihrẹ evaọ uyẹ Adamu+ ọ ruẹaro kpahe ae re nọ ọ ta nọ: “Rri! Jihova* ọ nyaze avọ erẹri riẹ nọ e rrọ buobu gbidi gbidi,*+ 15  re o bruoziẹ ahwo kpobi,+ re o brukpe ahwo omuomu kpobi fiki iruẹru imuomu rai kpobi nọ a ru evaọ edhere omuomu, gbe fiki eme aghọ kpobi nọ erahaizi nọ e be gọ Ọghẹnẹ hẹ na a ta kpahe iẹe.”+ 16  Ezae nana yọ enọ e rẹ go,+ nọ e rẹ go kpahe uyero akpọ rai, nọ i re kie lele isiuru obọrai,+ a rẹ rọ unu rai seha nọ i thesiwa, yọ a bi jiri amọfa ujiro igbenu* fiki erere nọ a re wo noi ze.+ 17  Rọkẹ owhai iyoyou mẹ, jọ wha kareghẹhọ eme nọ ikọ Olori mai Jesu Kristi a ta no vẹre,* 18  nọ a jẹ hae ta kẹ owhai nọ: “Evaọ oke urere na isẹkoko e te jariẹ, nọ i ti kie lele isiuru obọrai bi ru eware imuomu.”+ 19  Enana họ enọ e rẹ wha ohẹriẹ ze,+ ezae nọ e wọhọ erao,* nọ i wo ẹzi Ọghẹnẹ hẹ.* 20  Rekọ whai iyoyou mẹ, wha kru oma ga evaọ ẹrọwọ ọrẹri rai jẹ hae lẹ rọwokugbe ẹzi ọfuafo na,+ 21  re wha ruẹsi gbe ru eware nọ Ọghẹnẹ o re ro you owhai,+ nọ wha be hẹrẹ ohrọ Olori mai Jesu Kristi nọ o te wha uzuazọ ebẹdẹ bẹdẹ ze.+ 22  Ofariẹ, wha hai dhesẹ ohrọ-oriọ+ kẹ enọ i wo avro;+ 23  wha siwi ai+ ẹkwoma erae na nọ wha re fru rai no ze. Rekọ wha hai dhesẹ ohrọ-oriọ kẹ amọfa, wha ru ere avọ ozọ, yọ wha re mukpahe makọ ewu nọ iruo uwo i gbeku no.+ 24  Ajọ ọnọ ọ rẹ sae thọ owhai nọ wha gbe zoruẹ hẹ,+ je ru owhai dikihẹ kare epe evaọ aro oruaro riẹ* avọ oghọghọ ulogbo, 25  Ọghẹnẹ ọvo nọ ọ rrọ Osiwi mai ẹkwoma Jesu Kristi Olori mai na o wo oruaro, adhẹẹ, ogaga gbe udu-esuo anwọ oke nọ u kpemu nọ a rẹ sai kele mu hu, enẹna je rite ebẹdẹ bẹdẹ. Ami.

Eme-Obotọ

Hayo “uruemu otọtọ nọ a re ru odode.” Evaọ Griki, a·selʹgei·a. Rri oria Otofa Eme.
Hayo “ọnọ o wuzou mai.”
Rri oria Otofa Eme.
Hayo “evaọ obọ ekuhọ ivuẹvu; ezi okiewhru.”
Evaọ Griki, “i whu isiava no.”
Hayo “erẹri riẹ nọ i bu te idu ikpe eko buobu.”
Hayo “dhesẹ nọ iruemu ahwo jọ e were rai.”
Hayo “eware nọ ikọ Olori mai Jesu Kristi a ta nọ e te via.”
Hayo “ezae nọ e romakẹ isiuru ohwo-akpọ.”
Evaọ Griki, “nọ i wo ẹzi na ha.”
Hayo “aro riẹ nọ ọ vọ avọ urirẹ.”