Ro Se Ahwo Rom 12:1-21
12 Fikiere, inievo, mẹ be lẹ owhai fiki ọdawẹ nọ Ọghẹnẹ o wo inọ wha rehọ ugboma rai dhe idhe+ nọ e rrọ uzuazọ, ọrẹri,+ onọ Ọghẹnẹ ọ rẹ jẹrehọ, re wha rọ ẹgba iroro rai ru iruo ọrẹri kẹe.*+
2 Wha gbẹ kuvẹ re uyero-akpọ* nana o kpọ* owhai hi, rekọ wha nwene oghẹrẹ ohwo nọ wha rrọ ẹkwoma iroro rai nọ wha re nwene,+ re wha sai ru omarai wo imuẹro+ kpahe oware nọ o rrọ oreva Ọghẹnẹ nọ u woma, nọ ọ rẹ jẹrehọ, jẹ rrọ gbagba.
3 Keme fiki uwowou ulogbo nọ a dhesẹ kẹ omẹ, mẹ be ta kẹ owhai kpobi inọ ajọ ohwo ọvo o roro omariẹ kpehru vi epanọ u fo ho,+ rekọ wha roro evaọ oghẹrẹ nọ u re dhesẹ nọ wha wo iroro nọ e gba, wọhọ epaọ utho ẹrọwọ nọ Ọghẹnẹ ọ kẹ* omomọvo.+
4 Keme wọhọ epanọ ma wo ekwakwa sa-sa evaọ ugboma ovona,+ rekọ aikpobi a wo iruo evona ha na,
5 ere ọvona, dede nọ ma rrọ buobu, mai yọ ugboma ọvo evaọ usu kugbe Kristi, rekọ mai omomọvo yọ ekwakwa nọ e jẹhọ* ohwohwo.+
6 Nọ orọnọ ma wo ekẹ sa-sa wọhọ epaọ uwowou ulogbo nọ a dhesẹ kẹ omai na,+ o tẹ rrọ orọ eruẹaruẹ, joma ruẹaro wọhọ epanọ ẹrọwọ mai o te;
7 hayo o tẹ rrọ odibọgba, joma ruabọhọ odibọgba na; hayo ọnọ o re wuhrẹ, jọ ọ ruabọhọ ewuhrẹ riẹ;+
8 hayo ọnọ ọ rẹ tuduhọ ahwo awọ,* jọ ọ kẹ uduotahawọ;*+ ọnọ ọ be kẹ,* jọ ọ kẹ buobu;+ ọnọ ọ be sẹro,* jọ ọ romatotọ ru ei avọ ọwhọ;*+ ọnọ ọ rẹ re ohrọ, jọ o ru ei avọ evawere.+
9 Jọ uyoyou rai o jọ ababọ eviẹhọ.+ Wo utuoma kẹ oware uyoma;+ talamu oware uwoma.
10 Wha wo uvi uyoyou-inievo kẹ ohwohwo. Evaọ ọghọ ọrọkẹ ohwohwo, kobaro.*+
11 Wha goma iruo,* wha moyẹlẹ hẹ.*+ Jọ ẹzi na o fi ọwhọ họ owhai oma.+ Ru iruo ọrigbo kẹ Jihova.*+
12 Wha ghọghọ evaọ ẹruore na. Thihakọ evaọ otọ uye.+ Ruabọhọ olẹ.+
13 Wha ghale eware nọ wha wo kugbe erẹri na wọhọ epaọ ẹgwọlọ rai.+ Wo uruemu ọrara-odederehọ.+
14 Wha hae lẹ ẹro eghale kẹ enọ i bi kpokpo owhai;+ wha lẹ ẹro eghale kẹ ahwo, wha duwu ahwo iyei hi.+
15 Lele enọ e be ghọghọ ghọghọ; lele enọ e be viẹ viẹ.
16 Wha ru amọfa epanọ wha bi ru omarai; wha fi iroro rai họ ikpeware he,* rekọ wha romakẹ eware esese.+ Wha rri omarai inọ wha wo areghẹ gaga ha.+
17 Wha rọ eyoma hwosa eyoma kẹ ohwo ọvo ho.+ Wha roro kpahe oware nọ ahwo kpobi a rri nọ u woma.*
18 O tẹ lọhọ, nọ orọnọ obọ rai o rrọ na, wha lele ahwo kpobi rria dhedhẹ.+
19 Iyoyou, wha kioja kẹ omobọ rai hi, rekọ wha kuvẹ kẹ ofu Ọghẹnẹ;+ keme a kere nọ: “‘Orukele ọmẹ; mẹ te hwa zihe,’ ere Jihova* ọ ta.”+
20 Rekọ “ohọo u te bi kpe ọwegrẹ ra, kẹe emu re; uruame u te bi kpei, kẹe oware nọ ọ rẹ da; keme ẹkwoma enẹ oruo, who ti koko iwowo-erae fihọ iẹe uzou.”*+
21 Whọ kuvẹ re eyoma o fi owhẹ kparobọ họ, rekọ hae rehọ ewoma ro fi eyoma kparobọ.+
Eme-Obotọ
^ Hayo “gọe uvi ẹgọ.”
^ Hayo “ma.”
^ Hayo “ghale kẹ.”
^ Hayo “nọ e rrọ kẹ.”
^ Hayo “kẹ ohrẹ.”
^ Hayo “ohrẹ.”
^ Hayo “zọhọ fihọ.”
^ Hayo “kobaro.”
^ Hayo “jọ o ru ei avọ osegboja.”
^ Hayo “mu ei họ.”
^ Hayo “romatotọ ru iruo; wo ajọwha.”
^ Hayo “wha fi oma hotọ yọlọ evaọ iruo rai hi; wha raha oke evaọ iruo rai hi.”
^ Rri Ẹme-Ofiba A5.
^ Hayo “wo okpiroro ho.”
^ Hayo “nọ u woma evaọ aro ahwo kpobi.”
^ Rri Ẹme-Ofiba A5.
^ Koyehọ, re u ru udu ohwo na lọhọ jẹ ghra evega riẹ no.
