Obe Pita Avọ Ivẹ 1:1-21
1 Saemọn Pita, ọrigbo gbe ukọ Jesu Kristi, ro se enọ i wo ẹrọwọ ọghaghae ọvona nọ ma wo na,* fiki ẹrẹreokie Ọghẹnẹ mai gbe ọrọ Osiwi na Jesu Kristi:
2 Jọ Ọghẹnẹ o dhesẹ uwowou ulogbo riẹ kẹ owhai je ru owhai wo udhedhẹ vi epaọ anwẹdẹ ẹkwoma eriariẹ egbagba+ kpahe Ọghẹnẹ gbe Jesu Olori mai,
3 keme ogaga riẹ o kẹ omai eware kpobi* nọ i re fiobọhọ kẹ omai evaọ uzuazọ je ru omai romakẹ Ọghẹnẹ ẹkwoma eriariẹ egbagba kpahe Ọnọ o se omai+ fiki oruaro gbe ewoma riẹ.
4 Ọ rọ ẹkwoma eware nana ya obọdẹ eyaa eghaghae na kẹ omai,*+ re wha rọ ẹkwoma eware nana wo oma ẹzi wọhọ Ọghẹnẹ,+ keme wha vabọ no ogbekuo nọ ọ rrọ akpọ na no, onọ isiuru iyoma* e rẹ wha ze.
5 Fiki ugogo ẹjiroro nana, wha dawo ẹgba rai kpobi+ re wha fi ewoma ba ẹrọwọ rai,+ wha fi eriariẹ ba ewoma rai,+
6 wha fi oma-onyẹ ba eriariẹ rai, wha fi ithihakọ ba oma-onyẹ rai,+ wha fi omarọkẹ Ọghẹnẹ ba ithihakọ rai,+
7 wha fi uyoyou-inievo ba omarọkẹ Ọghẹnẹ rai, wha fi uyoyou ba uyoyou-inievo rai.+
8 Keme otẹrọnọ eware nana e tẹ rrọ owhai oma jẹ da owhai oma fia, u ti ru nọ wha gbẹ te rọ jọ enọ e siọ iruo ba no ho hayo enọ e be mọ ibi hi+ evaọ eriariẹ egbagba kpahe Olori mai Jesu Kristi.
9 Keme ohwo kpobi nọ eware nana e rrọ oma ha o tuaro, ọ fare aro riẹ re ọ siọ elo ba ẹruẹ,*+ yọ o thọrọ e riẹ ẹro no nọ a ru rie fo no izieraha riẹ+ nọ ọ raha evaọ oke krẹkri nọ u kpemu.
10 Fikiere inievo, wha romatotọ ru eware avọ ọwhọ vi epaọ anwẹdẹ re wha ru use+ gbe ẹsalọ rai muẹro kẹ omarai, keme otẹrọnọ wha tẹ ruabọhọ bi ru eware nana wha ti kie vievie he.+
11 Uzẹme riẹ họ, enẹ a te rọ kẹ owhai uvẹ obọdẹ* nọ wha te rọ ruọ Uvie ebẹdẹ bẹdẹ+ Olori gbe Osiwi mai, Jesu Kristi.+
12 Fiki ẹjiroro nana, o rrọ omẹ iroro ẹsikpobi nọ mẹ rẹ kareghẹhọ owhai eware nana dede nọ wha riẹ rai jẹ rrọ gaga evaọ uzẹme nọ wha wuhrẹ na.
13 Rekọ mẹ rehọ e riẹ nọ u kiehọ, nọ mẹ gbẹ rrọ uwou-udhu* nana na,+ re mẹ rọ ekareghẹhọ fi ọwhọ họ owhai oma,+
14 keme mẹ riẹ nọ a ti si uwou-udhu mẹ na no kẹle wọhọ epanọ Olori mai Jesu Kristi o dhesẹ vevẹ kẹ omẹ.+
15 Me ti ru utho ẹgba mẹ ẹsikpobi, re nọ mẹ tẹ nyavrẹ no, whai ọvo wha vẹ sae kareghẹhọ omarai* eware nana.
16 Orọnikọ iku erue nọ a nabe ma te ma lele ro ru owhai riẹ kpahe ogaga gbe ọzino* Olori mai Jesu Kristi hi, rekọ ma rọ ẹro ruẹ oruaro ulogbo riẹ.+
17 Keme Ọghẹnẹ Ọsẹ na ọ kẹ riẹ ọghọ gbe oruaro. Onana o via okenọ ọnọ o wo oruaro ulogbo na ọ ta eme nana kẹe* nọ: “Ọnana họ Ọmọzae mẹ, oyoyou mẹ na, ọnọ mẹ omamẹ ọ jẹrehọ.”+
18 Ẹhẹ, ma yo eme nana nọ i do no obọ odhiwu ze okenọ ma jọ kugbei evaọ obọ ugbehru ọrẹri na.
19 Onana u ru ẹme eruẹaruẹ na mu omai ẹro vi epaọ ọsosuọ, yọ wha be riẹ ru nọ wha be rọ tẹrovi ei wọhọ ukpẹ+ nọ o be jọ oria ebi lo evaọ udu rai (bẹsenọ oke o rẹ ke, esi ohiohiẹ+ ọ vẹ va ze).
20 Keme wha riẹ onana vẹre inọ eruẹaruẹ Ikereakere na ọvuọvo i no iroro obọ ohwo jọ ze he.
21 Keme a rọ ẹkwoma oreva ohwo-akpọ ruẹ eruẹaruẹ evaọ oke ọvo ho,+ rekọ ahwo a ta eme nọ i no obọ Ọghẹnẹ ze wọhọ epanọ ẹzi ọfuafo na ọ kpọ* rai.+
Eme-Obotọ
^ Hayo “enọ ẹrọwọ rai avọ ọmai o rrọ ẹrẹrẹe.”
^ Hayo “eware kpobi ọvọvẹ.”
^ Hayo “kẹ omai ọvọvẹ.”
^ Hayo “isiuru nọ e vrẹta.”
^ Hayo o sae jọ nọ, “ọ be ruẹ ude tere he.”
^ Hayo “uvẹ ziezi.”
^ Koyehọ, “oma uwo riẹ.”
^ Hayo “fodẹ.”
^ Evaọ Griki, “rọ uvou otiọna ta kẹe.”
^ Evaọ Griki, “wọ.”
