Magdiretso sa kaundan

Magdiretso sa listahan sang kaundan

Nahibaluan Mo Bala?

Nahibaluan Mo Bala?

 Nahibaluan Mo Bala?

Para sa ano ang sensus nga nangin rason kon ngaa nabun-ag si Jesus sa Betlehem?

Suno sa Ebanghelyo ni Lucas, sang nagsugo si Cesar Augusto nga magpasensus sa bilog nga Emperyo sang Roma, “ang tanan nga tawo naglakbay agod magparehistro, ang tagsatagsa sa iya kaugalingon nga siudad.” (Lucas 2:1-3) Ginsugo ini nga pagparehistro para makasukot sing buhis kag malista ang dapat magsoldado. Si Jose nga amay-amay ni Jesus natawo sa Betlehem. Gani, kinahanglan nga magpauli sila didto ni Maria para magparehistro. Amo ini ang rason kon ngaa natawo si Jesus sa Betlehem.

Sang masakop sang mga Romano ang Egipto sang 30 B.C.E., madugay na nga ginahimo sang mga Egiptohanon ang pagpasensus. Nagapati ang mga iskolar nga ginsunod man ini sang mga Romano sa bug-os nila nga emperyo.

Ang isa ka pamatuod sini amo ang ginpagua nga sugo sang Romano nga gobernador sa Egipto sang 104 C.E. Ang kopya sini nga sugo, nga makita sa British Library, nagasiling: “Gaius Vibius Maximus, Manugdumala sang Egipto (nagsiling): Bangod malapit na ang pagsensus sa mga pamalay, dapat pabalikon ang tanan nga nagaistar sa gua nga mga distrito para makapalista sila kag maatipan ang ila kadutaan.”

Ngaa naghunahuna si Jose nga hatagan si Maria sing sertipiko sang diborsio kay kalaslon pa lang sila?

Suno sa Ebanghelyo ni Mateo, “kalaslon” pa lang sila sang nahibaluan ni Jose nga nagabusong si Maria. Mahimo nga naghunahuna si Jose nga ginluiban sia ni Maria kay wala sia nakahibalo nga nagbusong si Maria “paagi sa balaan nga espiritu.” Gani, nagdesisyon si Jose nga diborsiohan sia.—Mateo 1:18-20.

Sa mga Judiyo, ang kalaslon ginakabig na nga mag-asawa. Pero, makaupdanay lang sila subong mag-asawa kon makasal na sila. Ang ila kaangtanan serioso gid nga butang kay kon ang nobyo magdesisyon nga indi sia magpakasal bangod sa pila ka rason, ang nobya makapakasal lang sa iban kon makabaton sia sang sertipiko sang diborsio. Kon ang nobyo sang kalaslon nga babayi mapatay antes sila makasal, ginakabig sia nga balo. Kon ang nobya naman nagpakighilawas sa iban antes sang ila kasal, ginakabig sia nga makihilahion kag dapat patyon.—Deuteronomio 22:23, 24.

Mahimo nga ginpanumdom man ni Jose ang kahuy-anan kag ang madangatan ni Maria. Bisan pa nakahibalo sia nga dapat niya ini isugid sa mga may awtoridad, luyag niya nga proteksionan si Maria kag indi mahuy-an. Gani, nagdesisyon sia nga diborsiohan si Maria sing tago. Kon ang isa ka babayi nga may bata may sertipiko sang diborsio, pamatuod ini nga nakasal sia.

[Retrato sa pahina 16]

Ang sugo nga pagsensus sang Romano nga Gobernador sa Egipto sang 104 C.E.

[Credit Line]

© The British Library Board, all rights reserved (P.904)