Ano ang Nagahatag sing Kapuslanan sa Imo Kabuhi?

NAGATRABAHO si Kenny sa isa ka daku nga kompanya nga nagapatigayon sa pagbaligya sing mga propiedad, may malahalon sia nga salakyan, kag nagapuyo sa isa ka malahalon nga puluy-an sa ibabaw sang mataas nga bilding nga nahamtang sa isa ka matin-ad nga siudad. Subong eksperto nga skydiver, nakunyag gid sia sa paglukso gikan sa linibo ka metro nga kataason. Nangin malipayon bala sia? Suno sa The Wall Street Journal, nagsiling sia: “Kuarentay singko anyos na ako karon, kag wala sing pasingadtuan ang akon kabuhi . . . Wala gid sing pulos ang akon kabuhi.”

Nag-ensayo gid sing maayo si Elyn agod mangin madinalag-on nga ice skater. Nangin bantog gid man sia sang ulihi. Natigayon ni Elyn ang kabantugan nga iya ginahandum. Apang nagyamo sia: “Sa diin na ang kalipay nga dapat kuntani mabatyagan ko? Masubo gid ako katama. Sa ulihi magatigulang ako kag, bisan pa madamo ako sing kuarta, wala gid sing pulos ang akon kabuhi kon subong lamang sini ang katuyuan sang akon kabuhi.”

 Bangod lantip gid sia sa paggamit sing mga duag, ginhugod ni Hideo ang iya kabuhi sa taliambong. Wala niya ginbaligya ang iya mga hinimuan bangod nagapati sia nga kon himuon niya ini magapakanubo ini sang iya talaksan sa taliambong. Sang nag-edad na sia sing 98 anyos, gindonar niya ang kalabanan sang iya mga hinimuan sa isa ka museo. Ginhinguyang niya ang iya kabuhi sa taliambong. Apang wala sia magmalipayon, naghunahuna sia nga indi gid niya masarangan nga himuon nga perpekto ang iya taliambong.

Ang iban nga tawo nagahugod gid sa pagbulig sa iban. Binagbinaga ang halimbawa sang isa ka ehekutibo sa industriya sa paghimo sing pelikula sa Hollywood. Subong bise presidente sa isa sang labing daku nga kompanya sa paghimo sing pelikula sa Estados Unidos, nakapakig-upod na sia sa mga artista kag sa iban pa kilala nga mga tawo kag nagaistar sa isa ka eksklusibo kag maluho nga puluy-an. Sang nagbakasyon sia sa Cambodia, isa ka bata nga babayi ang nagpakilimos sa iya samtang nagapanihapon sia sa isa ka kalan-an sa Phnom Penh. Ginhatagan niya ang bata sing kuarta kag soft drink. Nalipay ang bata. Apang, pagkadason nga gab-i, nakita niya liwat ang bata nga nagapakilimos na naman. Nahantop niya nga labaw pa sa paglimos ang ginakinahanglan nga bulig.

Pagligad sang isa ka tuig, nagdesisyon sia nga biyaan ang iya trabaho subong isa ka ehekutibo sa industriya sang kalingawan kag buligan ang mga imol sa Cambodia. Nagpatindog sia sing isa ka eskwelahan nga nagaaman sang puluy-an, pagkaon, kag edukasyon. Apang, may nagasumpakilay pirme sa iya balatyagon, kalipay kag kaayawan bangod sang iya nahimuan kag kahanusbo kag kapaslawan bangod sang mabug-at nga mga problema nga iya ginaatubang.

Abi sining apat ka tawo nahibaluan nila kon ano ang ila tulumuron sa kabuhi. Apang, nasubuan gihapon sila bisan pa nalab-ot na nila ang ila mga tulumuron nga ginpangabudlayan gid nila nga malab-ot. Kamusta ka? Ano ang tulumuron mo sa imo kabuhi? Ano ang imo prioridad sa kabuhi? Makasiguro ka bala nga indi ka maghinulsol sa ulihi sa imo ginahimo subong?