Ang Ebidensia sang Gugma, Pagtuo, kag Pagkamatinumanon

SANG Mayo 16, 2005, mabulubugnaw ang aga kag nagasilak ang adlaw sa Watchtower Farms sa Wallkill, sa New York. Nag-ulan sang nagligad nga gab-i, gani ang nakortehan nga mga kahilamnan kag matahom nga kabulakan nagauluinggat sa silak sang adlaw. Ang isa ka pato nga may walo ka boto nagalangoylangoy sa higad sang isa ka linawlinaw. Nagdayaw gid ang mga bisita sa katahom sang palibot. Mahinay ang ila paghambalanay, nga daw subong bala nga indi nila luyag nga matublag ang kalinong sang aga.

Ang mga bisita mga Saksi ni Jehova nga naghalin sa 48 ka pungsod sa bug-os nga kalibutan. Apang, wala sila magkari agod makita ang matahom nga talan-awon. Luyag nila makita ang nagakatabo sa sulod sang malapad, duag-pula nga tisa nga bilding, nga amo ang pinakabag-o nga tinukod sa United States Bethel sa Wallkill. Pagsulod nila sa bilding, nadula ang kalinong, apang labi sila nga nagdayaw sa ila nakita.

Gikan sa mezzanine, ang mga bisita nagtamwa sa masibod kag nagkalainlain nga mga makinaryas. Ang lima ka daw higante nga mga makina sa pag-imprinta naplastar sa mahining nga semento nga salog nga mas malapad pa sa siam ka football field. Diri ginaimprinta ang mga Biblia, mga libro, kag mga magasin. Ang dalagku nga mga rolyo sang papel nga nagabug-at sing 1,700 kilos ang kada isa, madasig nga nagatiyog kaangay sang mga ruweda sang isa ka nagadalagan sing madasig nga trak. Ang kada isa sining rolyo nga nagalaba sing 23 kilometros nagaagi sa makina sa sulod sang 25 minutos lang. Sa amo man nga tion, ginapamala na sang makina ang tinta kag ginapabugnaw ang papel agod nga puede na ini mapilo nga mga magasin nga madasig nga nagaagi sa lampas-ulo nga mga conveyor agod nga isulod sa mga karton kag ipadala sa mga kongregasyon. Ang iban naman nga mga imprintahan nagaimprinta  sang mga signatura sang libro, nga ginatangkastangkas lang anay sa mga bulutangan nga asta sa kisame samtang wala pa ini mapadala sa bindery. Ining mahim-ong kag nagahilituhog nga sistema ginapaandar sang mga kompyuter.

Pagkatapos sa imprintahan, ang mga bisita nag-tour sa bindery. Ang mga makina diri nagahimo sing may matig-a sing panghapin nga mga libro kag deluxe nga mga Biblia sa kadasigon nga mga 50,000 ka kopya kada adlaw. Ang mga signatura sang libro ginapasunod, gina-bind, kag ginatabasan. Nian, ginabutangan ini sing panghapin. Ang nahuman na nga mga libro ginasulod sa mga karton. Ang mga karton awtomatiko nga ginasira, ginangalanan, kag ginatangkas sa isa ka paleta. Dugang pa, ang linya para sa mahumok-sing-panghapin nga mga libro makataud kag makaempake sing mga 100,000 ka libro kada adlaw. Madamo man nga makinarya ang nadalahig sa sini nga sistema​—⁠indi maisip nga mga makina, mga conveyor, mga engranahe, mga ariring, kag malapad nga mga kuriya​—⁠tanan nagahulag sa makadalayaw nga kadasigon agod magpatubas sing mga literatura sa Biblia.

Subong kasibu sa pag-andar sang isa ka de-kalidad nga relo, ang tuman kadasig kag ginbag-o nga mga makinarya sa pag-imprinta isa ka kalatingalahan sang modernong teknolohiya. Subong makita pa naton, ebidensia man ini sang gugma, pagtuo, kag pagkamatinumanon sang katawhan sang Dios. Apang, ngaa ginsaylo ang imprintahan halin sa Brooklyn, New York, pakadto sa Wallkill?

Ang panguna nga rason amo ang pagpasimple sang pag-imprinta kag shipping paagi sa paghimo sini tanan sa isa ka lugar lamang. Sa sulod sang mga dekada, ang mga libro ginaimprinta kag ginapadala halin sa Brooklyn, samtang ang mga magasin naman nagahalin sa Wallkill. Diutay lang nga mga manugpangabudlay ang kinahanglan kag magamit sing maayo ang pundo kon tingubon ini nga mga hilikuton. Subong man, sanglit daan na ang mga makina sa Brooklyn, duha ka bag-o nga MAN Roland Lithoman nga makina ang gin-order sa Alemanya. Ining bag-o nga mga makina indi makaigo sa imprintahan sa Brooklyn.

Ginasakdag ni Jehova ang Hilikuton

Katuyuan sang pag-imprinta nga mapalapnag pa gid ang maayong balita sang Ginharian sang Dios. Napamatud-an na nga ginapakamaayo gid ni Jehova ang pag-imprinta halin pa sa umpisa. Sugod sang 1879 tubtob sang 1922, ang mga libro ginapaimprinta sa komersial nga mga imprintahan. Sang 1922, gin-arkilahan ang anom ka panalgan nga bilding sa 18 Concord Street, sa Brooklyn kag may ginbakal nga mga kagamitan para sa pag-imprinta sing mga libro. Madamo sadto ang nagpangduhaduha nga masarangan sang mga utod ang hilikuton.

Ang isa sa mga nagpangduhaduha amo ang presidente sang kompanya nga nag-imprinta sang kalabanan naton nga mga libro. Sang nagduaw sia sa Concord Street, sia nagsiling: “May yara kamo primera-klase nga imprintahan, pero wala sing isa sa inyo ang nakahibalo kon paano ini gamiton. Anom ka bulan sugod karon, maguba lang ini; kag makita ninyo nga ang makasarang lang mag-imprinta para sa inyo amo ang mga eksperto nga manug-imprinta.”

Ang manugtatap sang imprintahan sadto, nga si Robert J. Martin nagsiling: “Daw may punto ang iya ginsiling, apang wala niya ginlakip ang Ginuo; kag bisan san-o wala gid niya kami ginpabay-an. . . . Wala magdugay nagaimprinta na kami sing mga libro.” Sa nagsunod nga 80 ka tuig, ang mga Saksi ni Jehova nakaimprinta sing binilyon ka mga literatura sa ila mismo imprintahan.

Nian, sang Oktubre 5, 2002, ginpahibalo sa tuigan nga miting sang Watchtower Bible and Tract Society of Pennsylvania, nga gin-aprobahan na sang Nagadumala nga Hubon ang pagsaylo sang pag-imprinta sang sanga sa Estados Unidos pakadto sa Wallkill. Duha ka bag-o nga makina sa pag-imprinta ang gin-order, nga magaabot sa Pebrero 2004. Sa sulod sang 15 ka bulan dapat madesinyo kag mapasangkad kag mahanda  sang mga utod ang imprintahan antes mag-abot ang mga makinaryas. Nian, dapat matapos ang pag-instalar sang bag-o nga bindery kag shipping sa masunod nga siam ka bulan. Ang iban mahimo nagpangduhaduha sang nahisayran nila ang iskedyul​—⁠daw imposible nga mahimo ini tanan. Apang, nahibaluan sang mga utod nga sa bulig ni Jehova, masarangan ini.

“Malipayon nga Espiritu sang Pagbinuligay”

Nagasalig nga magatanyag sang ila kaugalingon sing kinabubut-on ang katawhan ni Jehova, ginsugdan sang mga utod ang proyekto. (Salmo 110:3) Bangod sang kadakuon sang proyekto, kulang ang mga boluntaryo gikan sa tanan nga departamento sang konstruksion sa Bethel. Halin sa Estados Unidos kag Canada, kapin sa 1,000 ka utod nga lalaki kag babayi nga may kalantip sa pagtukod ang nagboluntaryo sa pag-alagad sing isa ka semana tubtob tatlo ka bulan subong bahin sang temporaryo nga programa sang pagboluntaryo. Gin-agda man ang iban nga mga boluntaryo kag internasyonal nga mga alagad nga makigbahin sa sini nga proyekto. Daku man ang nabulig sang mga Regional Building Committee.

Madamo sa mga nagboluntaryo ang naggasto sing daku sa ila plete kag nag-leave sa ila trabaho agod nga makaboluntaryo sa Wallkill. Apang, malipayon sila nga nagsakripisyo. Ang pag-aman sing dalayunan kag pagkaon sa sining dugang pa nga mga boluntaryo naghatag sing kahigayunan sa panimalay Bethel nga manikasog gid agod nga masuportahan ang proyekto. Kapin sa 535 ka katapo sang panimalay Bethel sa Brooklyn, sa Patterson, kag sa Wallkill ang nagboluntaryo sa proyekto kon Sabado, luwas pa sa ila matag-adlaw nga mga asaynment. Ining dalayawon gid nga pagsuporta sang katawhan sang Dios sa sining maragtason nga panikasog nangin posible lamang bangod ginasakdag ni Jehova ang proyekto.

Ang iban naghatag sing pinansial nga bulig. Halimbawa, ang mga utod nakabaton sing isa ka sulat gikan sa nuebe anyos nga si Abby. Sia nagsulat: “Mapinasalamaton gid ako sa tanan ninyo nga hilikuton​—⁠paghimo sing matahom nga mga libro. Mahimo nga sa indi madugay maduaw ako dira. Siling ni Tatay makadto kami dira sa masunod nga tuig! Magasuksok ako sing badge agod nga makilala ninyo ako. Ari ang 20 dolyares para sa bag-o nga imprintahan! Allowance ko ini, pero luyag ko nga ihatag sa inyo.”

Ang isa ka utod nga babayi nagsulat: “Palihug batuna ang regalo ko nga ginansilyo nga mga kalo nga akon ginhimo. Luyag ko nga ihatag ini nga mga kalo sa mga nagaboluntaryo sa proyekto sa Wallkill. Suno sa almanake magagrabe gid ang tigtulugnaw. Indi ako sigurado kon husto sila. Apang, nahibaluan ko nga ang kalabanan sang mga hilikuton sa Wallkill, pagahimuon sa wayang, kag luyag ko nga may panabon sa ulo ang aton mga utod nga lalaki kag babayi. Wala ako sing kalantip sa konstruksion, apang makagansilyo ako, gani gingamit ko ini nga ikasarang agod makabulig.” Nalakip sa sulat ang 106 ka ginansilyo nga mga kalo!

Ang imprintahan natapos suno sa iskedyul. Ang manugtatap sa imprintahan nga si John Larson, nagsiling: “May malipayon gid nga espiritu sang pagbinuligay. Sin-o ang makapangduhaduha sa  pagsakdag ni Jehova sa hilikuton? Ang proyekto madasig nga natapos. Nadumduman ko pa nga nagatindog ako sa lunang sang Mayo 2003 nga nagalantaw sa mga utod nga nagapasad sang pundasyon sang bilding. Wala pa isa ka tuig sugod sadto, nagatindog ako sa amo man nga duog nga nagalantaw sa nagapanghikot nga imprintahan.”

Programa sang Dedikasyon

Ang programa sa pagdedikar sining bag-o nga imprintahan, upod sa tatlo pa ka bilding sa Wallkill ginhiwat sang Lunes, Mayo 16, 2005. Ang programa ginkonektar man sa mga puluy-an Bethel sa Patterson kag Brooklyn, subong man sa Canada Bethel paagi sa video. Sa kabug-usan, 6,049 ang nagtambong sa programa. Si Theodore Jaracz nga isa ka miembro sang Nagadumala nga Hubon sang mga Saksi ni Jehova, amo ang tsirman kag naghatag sia sing malip-ot nga sumaryo sang maragtas sang pag-imprinta nga hilikuton. Paagi sa mga interbyu kag mga presentasyon sa video, ginrepaso sang mga miembro sang Komite sang Sanga nga sanday John Larson kag John Kikot ang maragtas sang proyekto nga konstruksion kag mga pag-imprinta sa Estados Unidos. Ginhatag ni John Barr nga katapo sang Nagadumala nga Hubon ang katapusan nga pamulongpulong, nga nagadedikar sang bag-o nga imprintahan kag tatlo ka puluy-an nga bilding kay Jehova nga Dios.

Pagkadason nga semana, ginpa-tour sa bag-o nga mga pasilidad ang mga Bethelite gikan sa Patterson kag Brooklyn. Sa kabug-usan, 5,920 ang mga bisita sadto.

Paano Naton Ginatamod ang Imprintahan?

Sa pamulongpulong sang dedikasyon, ginpahanumdom ni Utod Barr ang iya mga tagpalamati nga ang imprintahan wala ginapabaloran bangod sang mga makinaryas sini. Ginapabaloran ini bangod sa mga tawo. Ang mga literatura nga ginabalhag naton may daku nga epekto sa kabuhi sang mga tawo.

Ang tagsa sining bag-o nga makina sa pag-imprinta makaimprinta sing isa ka milyon ka tract sing kapin lang sa isa ka oras! Apang, ang isa lang ka tract may daku kaayo nga epekto sa  kabuhi sang isa ka tawo. Halimbawa, sang 1921, sa isa ka riles sang tren sa South Africa, nagatrabaho ang isa ka grupo nga nagamentenar sini. Natalupangdan ni Christiaan, nga isa sa mga trabahador, ang isa ka papel nga naliklik sa idalom sang riles. Isa yadto sa aton mga tract. May kalangkag nga ginbasa ini ni Christiaan. Nian, nagdalidali sia pakadto sa iya umagad nga lalaki kag makunyagon nga nagsiling: “Nasapwan ko na ang kamatuoran!” Wala magdugay, nagsulat sila para sa dugang pa nga impormasyon. Ginpadal-an sila sang sanga talatapan sa South Africa sing dugang pa nga mga literatura sa Biblia. Ining duha ka lalaki nagtuon, nabawtismuhan, kag nagpaambit sang kamatuoran sa Biblia sa iban. Subong resulta, madamo ang nagbaton sang kamatuoran. Ang matuod, sang maaga nga bahin sang katuigan 1990, kapin sa isa ka gatos ka miembro sang ila pamilya ang mga Saksi ni Jehova​—⁠tanan resulta sang isa ka tract nga napulutan sa isa ka riles!

Ang literatura nga aton ginabalhag, siling ni Utod Barr, nagapasulod sa mga tawo sa kamatuoran, nagabulig sa ila nga magpabilin sa kamatuoran, nagapahulag sa ila nga mangin makugihon pa gid, kag nagapahiusa sang paghiliutod. Labaw sa tanan, ining mga literatura, nga ginapanagtag naton tanan, nagadayaw sa aton Dios, nga si Jehova!

Paano Ginatamod ni Jehova ang Imprintahan?

Ginpangabay ni Utod Barr ang mga tumalambong nga binagbinagon kon paano ginatamod ni Jehova ang imprintahan. Wala sia nagasandig sa sini. Mahimo niya suguon nga magbantala ang mga bato! (Lucas 19:40) Dugang pa, wala sia nahayanghag sa kasibod, kadakuon, ukon ikasarang sang mga makinaryas. Kay man, sia ang nagtuga sang bug-os nga uniberso! (Salmo 147:​10, 11) Nakahibalo si Jehova sang mas moderno nga paagi sang paghimo sing mga literatura, nga wala pa madiskobrehan ukon mahanduraw sang mga tawo. Gani, ano ang makita ni Jehova nga ginapabaloran gid niya? Sigurado gid nga makita niya ang hamili nga mga kinaiya sang iya katawhan​—⁠ang ila gugma, pagtuo, kag pagkamatinumanon.

Gin-ilustrar ni Utod Barr kon ano ang labot sang gugma. Ang isa ka bata nga babayi nagluto sing keyk para sa iya mga ginikanan. Sigurado nga malipay gid sila sa sini. Huo, bisan ano man ang hitsura ukon sabor sang keyk, natandog gid ang mga ginikanan sang gugma sang ila anak, nga ginpakita sa iya maalwan nga buhat. Sa kaanggid nga paagi, kon magtulok si Jehova sa sining bag-o nga imprintahan, makita niya indi ang bilding kag ang mga makinaryas. Labaw sa tanan, ginatan-aw niya ini subong ekspresyon sang gugma para sa iya ngalan.​—⁠Hebreo 6:10.

Dugang pa, subong nga gintamod ni Jehova ang arka nga ekspresyon sang pagtuo ni Noe, ginatamod man niya ang imprintahan subong ebidensia sang aton pagtuo. Pagtuo sa ano? Si Noe nagtuo nga magamatuod ang ginsiling ni Jehova. Nagatuo man kita nga nagakabuhi kita sa katapusan nga mga adlaw, nga ang maayong balita amo ang labing importante nga mensahe nga ginapahibalo sa kalibutan, kag nga kinahanglan gid nga mabatian ini sang mga tawo. Nahibaluan naton nga ang mensahe sang Biblia makaluwas sang kabuhi.​—⁠Roma 10:​13, 14.

Walay duhaduha, makita man ni Jehova sa sini nga imprintahan ang ekspresyon sang aton pagkamatinumanon. Subong aton nahibaluan, kabubut-on niya nga ang maayong balita mabantala sa bug-os nga kalibutan antes mag-abot ang katapusan. (Mateo 24:14) Ini nga imprintahan, lakip ang iban pa sa lainlain nga mga duog sa kalibutan, may papel para sa katumanan sina nga komisyon.

Huo, ang gugma, pagtuo, kag pagkamatinumanon nga makita sa pagtipon sang kinahanglanon nga pundo, konstruksion, kag pagdumala sini nga mga pasilidad makita man sa makugi nga pagpanghikot sang katawhan ni Jehova bisan diin samtang nagapadayon sila sa pagpahayag sang kamatuoran sa tanan nga magapamati.

[Kahon/Mga retrato sa pahina 11]

Pagpasangkad sang Pag-imprinta sa Estados Unidos

1920: Ang mga magasin gin-imprinta sa una nga rotary press, sa 35 Myrtle Avenue, sa Brooklyn.

1922: Ginsaylo ang imprintahan sa anom ka panalgan nga bilding sa 18 Concord Street. Ginsugdan man ang pag-imprinta sing mga libro.

1927: Ginsaylo ang imprintahan sa bag-o natukod nga bilding sa 117 Adams Street.

1949: Nagdoble ang kadakuon sang imprintahan sang gindugangan ini sing siam ka panalgan nga bilding.

1956: Ang imprintahan sa Adams Street nagdoble pa gid ang kadakuon sang matukod ang bag-o nga bilding sa 77 Sands Street.

1967: Gintukod ang napulo ka panalgan nga bilding, nga may kumpleto na nga imprintahan nga napulo ka beses ang kadakuon sangsa orihinal nga bilding.

1973: Gintukod ang isa pa ka imprintahan para sa mga magasin sa Wallkill.

2004: Ang tanan nga mga pag-imprinta, binding, kag shipping sa Estados Unidos ginahimo na tanan sa Wallkill.