Mga Pamangkot Gikan sa mga Bumalasa

Sa ano nga kahulugan nangin “apa” si Ezequiel sa tion sang paglikop kag paglaglag sa Jerusalem?

Sa kahulugan nga wala na sia sing madugang pa sa matagnaon nga mensahe ni Jehova nga napaalinton na niya.

Nag-umpisa si propeta Ezequiel sang iya hilikuton subong isa ka matutom nga manugbantay para sa mga Israelinhon nga tinapok sa Babilonia sang “ikalima nga tuig sang pagkabihag ni Hari Joaquin,” nga amo ang tuig 613 B.⁠C.⁠E. (Ezequiel 1:​2, 3) Sa ikanapulo nga adlaw sang ikanapulo nga lunar nga bulan sang 609 B.⁠C.⁠E., ginpahibalo sia paagi sa pag-inspirar sang Dios tuhoy sa pagsugod sang paglikop sa Jerusalem sang mga taga-Babilonia. (Ezequiel 24:​1, 2) Ano ang mangin resulta sang paglikop? Makaluwas bala ang Jerusalem kag ang di-matutom nga mga pumuluyo sini? Subong manugbantay, napaalinton na ni Ezequiel ang maathag nga mensahe sang kalaglagan gikan kay Jehova, kag indi na kinahanglan nga dugangan pa ini sing bisan ano ni Ezequiel, agod nga daw mas makapakumbinsi pa ini nga mensahe. Nangin apa si Ezequiel kon tuhoy sa bisan ano nga dugang nga detalye sang paglikop sa Jerusalem.​​—⁠Ezequiel 24:25-​27.

Anom ka bulan pagkatapos nalaglag ang Jerusalem sang 607 B.⁠C.⁠E., ginbalita kay Ezequiel sa Babilonia sang isa nga nakapalagyo ang pagkahapay sang balaan nga siudad. Sang gab-i antes mag-abot ang nakapalagyo, ‘ginbuka ni Jehova ang baba ni Ezequiel, kag indi na sia apa.’ (Ezequiel 33:22) Natapos sa sini ang pagkaapa ni Ezequiel.

Literal bala nga apa si Ezequiel sadto nga tion? Maathag nga indi, kay bisan nga nangin “apa” sia, nagbungat sia sing mga tagna nga panguna nga napatuhoy sa kaingod nga mga pungsod nga nagkasadya sa pagkapukan sang Jerusalem. (Ezequiel, kapitulo 25-​32) Sa una nga bahin sang hilikuton ni Ezequiel bilang propeta kag manugbantay, ginsilingan sia ni Jehova: “Patapikon ko ang imo dila sa imo ngalagngag, kag sigurado nga mangin apa ka, kag indi ka mangin manugsabdong sa ila, kay sila mabinatuon nga panimalay. Kag buksan ko ang imo baba kon ako magapakighambal sa imo.” (Ezequiel 3:​26, 27) Kon wala si Jehova sing mensahe para sa Israel, magapabilin nga apa si Ezequiel kon tuhoy sa sini nga pungsod. Ihambal lamang ni Ezequiel ang ipahambal ni Jehova sa iya sa tion nga luyag ni Jehova nga himuon niya ini. Ang pagkaapa ni Ezequiel nagapahangop nga indi sia makahambal sang mga tinaga nga may matagnaon nga importansia para sa mga Israelinhon.

Ang modernong-adlaw nga manugbantay nga klase, ang hinaplas nga mga Cristiano, madugay na nga nagapaandam tuhoy sa kalaglagan sang Cristiandad, ang antitipiko nga Jerusalem. Kon mag-abot ang “dakung kapipit-an” kag laglagon ang “Babilonia nga Daku,” ang bug-os kalibutan nga emperyo sang butig nga relihion, indi na kinahanglan nga maghambal pa sing dugang ang hinaplas nga Ezequiel nga klase tuhoy sa kalaglagan sang Cristiandad, nga nagahuman sang daku nga bahin sini nga emperyo.​​—⁠Mateo 24:21; Bugna 17:​1, 2, 5.

Huo, magaabot ang adlaw nga ang mga hinaplas nga nagkalabilin kag ang ila mga kaupod mangin apa, nga wala na sing dugang pa nga ipaalinton sa Cristiandad. Matabo ini kon “ang napulo ka sungay” kag ang “sapat nga mapintas” magalaglag kag magahublas sa Babilonia nga Daku. (Bugna 17:16) Siempre, wala ini nagakahulugan nga literal nga mangin apa ang mga Cristiano. Kaangay sa ginahimo nila karon, dayawon nila si Jehova kag sambiton ang iya ngalan sa adlaw-adlaw kag “sa tanan nga nagapakari nga kaliwatan.”​​—⁠Salmo 45:17; 145:2.