Magdiretso sa kaundan

Magdiretso sa listahan sang kaundan

Kon Ngaa Nagakadto Sila sa Simbahan

Kon Ngaa Nagakadto Sila sa Simbahan

 Kon Ngaa Nagakadto Sila sa Simbahan

“HALOS apat ka pilo karon kadamo ang mga Presbiteryano sa Republika sang Korea subong sa Amerika.” Ini nga pahayag sa magasin nga Newsweek mahimo nagpakibot sa madamo nga bumalasa, kay ang kalabanan nga tawo nagahunahuna nga ang nagapanguna nga relihion sa Korea amo ang Confucianismo ukon Budhismo. Karon, masapwan didto sang isa ka dumuluaw ang madamong “Cristiano” nga mga simbahan, nga masami makilal-an paagi sa nagakilas nga pula nga mga krus. Kon Domingo, kinaandan na nga makita ang tigduha ukon tigtatlo ka tawo, nga nagabitbit sing mga Biblia, pakadto sa simbahan. Suno sa isa ka surbe sang 1998, halos 30 porsiento sang mga Koreano ang katapo sang isa ka Katoliko ukon isa ka Protestante nga simbahan, nga mas madamo sangsa nagapangangkon nga mga Budhista.

Sa karon, indi kinaandan nga makakita sing subong kataas nga porsiento sang mga tawo bisan diin nga nagakadto sa simbahan sing tayuyon. Apang indi lamang ini sa Korea nagakatabo kundi sa iban man nga mga pungsod sa Asia, subong man sa Aprika kag Latin Amerika. Ngaa tuman kadamo gihapon ang nagapangangkon nga nagapati sa Dios bisan pa nga ang di-pagsapak kag pagkawalay interes sa relihion daw lapnag gid sa duta? Ngaa nagakadto sila sa simbahan?

Ginpakita sang isa ka surbe sang Gallup nga sobra sa katunga sang mga nagakadto sa simbahan sa Korea ang nagapangita sing kalinong sa hunahuna; mga ikatlo nga bahin ang nagalaum nga mabuhi sing dayon sa tapos sang kamatayon; kag 1 sa 10 ang nagahingamo sing mapagros nga lawas, manggad, kag kadalag-an.

Madamo nga tawo sa Tsina ang nagadugok sa mga simbahan sa paglaum nga mahimun-an ang espirituwal nga kakulangan nga resulta sang amat-amat nga pagbulos sang kapitalista nga mga paninguha sa Komunista nga ideolohiya. Kada tuig, minilyon ka kopya sang Biblia ang ginaimprinta kag ginapanagtag sa Tsina, kag daw ginabasa ini sang mga tawo sing subong kaukod sa pagbasa nila sa pula nga diutay nga libro ni Mao.

Ang pila ka Katoliko sa Brazil, ilabi na ang mga pamatan-on, indi kontento sa saad nga kalipay sa palaabuton nga kabuhi​​—⁠luyag nila maagom ang kalipay sa kabuhi karon mismo. Ang pamantalaan nga Tudo nagsiling: “Kon ang nagpahulag sa mga tawo sadtong dekada ’70 amo ang kahublagan sa relihion agod mahilway ang tawo sa pagpamigos, ang  nagapahulag karon sa ila amo ang panudlo sang relihion nga maagom nila ang kahamungayaan sa kabuhi.” Ang isa ka surbe sa Britanya nagpamangkot sa mga nagakadto sa simbahan didto kon ano ang isa ka butang nga ila naluyagan sa ila simbahan. Ang rason nga ginsambit sang kalabanan sa ila amo ang pagpakig-upod.

Tanan ini nagapakita nga samtang madamodamo nga tawo ang nagapati gihapon sa Dios, ang kalabanan mas nabalaka sa kon ano ang maagom nila sa karon sangsa maagom nila sa palaabuton​​—⁠nga labi pa gani sa pagkabalaka nila sa Dios mismo. Ano sa banta mo ang husto nga rason sa pagpati sa Dios? Ano ang masiling sang Biblia sa sini nga butang? Mahibaluan mo ang sabat sa masunod nga artikulo.