Magdiretso sa kaundan

Magdiretso sa listahan sang kaundan

Pagbantay sa Kalibutan

Pagbantay sa Kalibutan

 Pagbantay sa Kalibutan

Ginhiwat ang una nga divorce fair sa Italya. Ang mga nagtambong nakig-istorya sa mga marriage agencies para mangita sing bag-o nga partner; sa mga travel agencies para mag-organisar sing bakasyon sa mga singgol; kag sa divorce-planning agencies para mangita sing abogado, accountant, psychologist, kag family mediators.—CORRIERE DELLA SERA, ITALY.

Ang “pagkadula sing pagsalig” bangod sa mga “pag-abuso sa sekso sang mga klero” nagtuga sing “pinakadaku nga kinagamo sa tagdumalahan sang simbahan.”—NATIONAL CATHOLIC REPORTER, U.S.A.

Paagi sa DNA sang iya buhok nga nagtig-a sa yelo, natukiban sang mga sientipiko nga ang taga-Greenland nga napatay mga 4,000 na ka tuig ang nagligad “mahimo naghalin sa Siberia.”—REUTERS NEWS SERVICE, U.S.A.

Pagsalig sa Simbahan—Nadula

“Ang kalabanan nga tawo wala na sing pagsalig sa [Katoliko nga] Simbahan,” siling sang headline sang The Irish Times. Ang Katoliko nga Simbahan pareho man sa iban nga institusyon—gobierno kag mga bangko—nga nadula ang pagsalig sang kalabanan nga mga taga-Ireland. Sa pungsod kon diin grabe gid ang pagsunod sa simbahan, sobra katunga sa mga gin-interbyu ang nagasiling nga “wala na gid” (32 porsiento) ukon “wala” (21 porsiento) sila nagasalig sa simbahan. Ang mga iskandalo sa simbahan nga nabalahuba amo ang rason sang pagkadula sing pagsalig sang mga tawo sa simbahan.

Gradweyt sa Kolehiyo, Wala Obra

Garantiya bala nga makaobra ang mga nakatungtong sa kolehiyo? Ang kalabanan indi, siling sang Manila Bulletin. Ginsambit sini si Herbert Bautista, mayor sang Quezon City nga nagsiling: “Kada tuig, minilyon ang nagagradweyt sa aton mga kolehiyo kag unibersidad nga indi man makaobra kay ang ila kurso indi man santo sa obra nga available.” Madamo ang nagamantiner sang manubo nga posisyon ukon nagaobra na lang sa restawran. Ginapalig-on sang gobierno ang mga hayskul gradweyt nga magkuha sing vocational ukon teknikal nga mga kurso kay mas mahapos pa diri makakita sing obra.

Dupla sa Taytay

Bangod sa dupla, delikado na ang 457 metros nga Howrah Bridge ukon taytay sa Calcutta, India. Ngaa? Ang Gutkha—buyo, bunga, kag apog nga ginamama kag ginadupla sang mga tawo—daw pareho lang sang asido. Suno sa isa ka pamantalaan sa Calcutta nga The Telegraph, “ang steel hood nga seis milimetros, nga nagaputos sa haligi [sang taytay], nagnipis sa tres milimetros bangod sa dupla sang mga nagaalagi halin sang 2007.” Mga tunga sa milyon ka tawo kag 100,000 ka salakyan ang nagaagi diri kada adlaw.