Magdiretso sa kaundan

Magdiretso sa listahan sang kaundan

Paagi 1—Husto nga Pagkaon

Paagi 1—Husto nga Pagkaon

 Paagi 1—Husto nga Pagkaon

“Magkaon. Indi magpatama. Dapat may utan pirme.” Ining simple nga laygay sang awtor nga si Michael Pollan napamatud-an gid nga epektibo. Ano ang iya buot silingon?

Magkaon sing preska nga mga pagkaon. Magkaon sing masustansia kag preska nga pagkaon sa baylo sang ginproseso. Ang mga prepackaged kag ang ginabaligya sa mga fast food nga restawran madamo sing kalamay, asin, kag tambok. Ginahalinan ini sang sakit sa tagipusuon, istrok, kanser, kag iban pa malala nga balatian. Mas maayo nga sugbahon, i-steam, kag i-bake ang pagkaon sa baylo nga prituhon. Maggamit sing madamo nga herb kag lamas para mabuhinan ang asin. Siguraduha nga naluto sing maayo ang karne kag indi gid magkaon sing pan-os.

Indi magpatama. Suno sa World Health Organization, nagadamo na gid ang mga tawo nga tama katambok bangod sa sobra nga pagkaon. Suno sa isa ka pagtuon, “mas madamo nga kabataan ang tama katambok sangsa malnourished” sa pila ka lugar sa Aprika. Ang tama katambok nga kabataan mahimo magmasakit sing diabetes kag sang iban nga balatian. Ang mga ginikanan dapat mangin maayo nga halimbawa sa pagkontrol sang ila ginakaon.

Magkaon pirme sing utan. Magkaon sing lainlain nga prutas, utan, kag mga uyas sa baylo sang karne kag starch. Magkaon man sing isda, isa ukon duha ka beses kada semana. Buhinbuhini ang pagkonsumo sing ginproseso nga mga pagkaon pareho sang pasta, puti nga tinapay kag kan-on kay halos wala na ini sing sustansia. Likawi man ang uso nga mga dieta. Dapat paanaron sang mga ginikanan ang ila kabataan sa masustansia nga pagkaon. Halimbawa kon merienda, hatagi sila sing mani kag preska nga prutas kag utan nga nahugasan sing maayo imbes nga chips ukon dulse.

Mag-inom pirme. Dapat adlaw-adlaw kita mag-inom sing madamo nga tubig kag wala sing kalamay nga mga ilimnon, ilabi na kon tig-ilinit kag kon nagaehersisyo ukon nagahimo sing mabug-at nga obra. Nagatinlo ini sa lawas, nagapanami sang panit, nagapaniwang, kag nagabulig sa maayo nga panunaw. Nagabulig man ini nga magnami ang imo pamatyag kag hitsura. Indi magpatama inom sing alkohol kag matam-is nga ilimnon. Ang isa ka soft drink kada adlaw makapabug-at sa imo sing mga 7 ka kilo kada tuig.

Sa iban nga lugar, mahal kag mabudlay magkuha sing matinlo nga tubig. Pero importante ini. Gani kon indi matinlo ang tubig, pabukali ini ukon butangi sing kemikal. Ginasiling nga mas madamo pa ang nagakapatay sa mahigko nga tubig sangsa mga inaway ukon linog. Suno sa isa ka report, 4,000 ka kabataan ang nagakapatay kada adlaw bangod sini. Nagsiling ang World Health Organization nga patition sang iloy ang iya lapsag sa una nga anom ka bulan, dayon updan sang iban nga pagkaon asta magduha ka tuig.