Ano nga Bituon ang Naggiya sa “mga Mangin-alamon” Pakadto kay Jesus?

Ginapakita sang bantog nga mga istorya parte sa Krismas nga ang bituon maayo kuno nga tanda halin sa langit. Matuod bala ini?

▪ Ang indi kinaandan nga bituon nga nakita sang “mga mangin-alamon” nga halin sa Sidlangan amo ang naggiya sa ila pakadto sa bata nga si Jesus, siling sang manunulat sang Biblia nga si Mateo. (Mateo 2:1-12, Biblia sang Katilingban sang mga Kristiano) Ginapakita sang bantog nga mga istorya parte sa Krismas nga ang bituon maayo kuno nga tanda halin sa langit. Suno sa isa ka reperensia, ang bituon bahin sang “katuyuan sang Dios sa diin . . . ang bata nga si Jesus ginpadunggan kag ginkilala sang Amay subong iya pinalangga nga Anak.” Ginapadunggan man sang mga ambahanon sa Krismas ini nga bituon. Ano ini nga bituon?

Ang iban nagasiling nga isa lang ini ka natural nga hitabo sa langit. Suno naman sa madamo nga tawo nga nagatuon parte sa sini, isa ini ka hitabo diin nagtalabo ang mga planeta. Pero, suno sa The New Bible Dictionary, “ini nga hitabo indi matawag nga ‘isa ka bituon.’” Kay kon maglapitay ang mga planeta, kitaon gihapon ang kasanag sang tagsa ka planeta. Gani indi ini isa lang ka bituon kon tan-awon. Nagasiling naman ang iban nga isa kuno ini ka kometa ukon isa ka naglupok nga bituon. Pero, wala sing natural nga hitabo sa kalangitan nga makagiya sa sini nga mga tawo pakadto sa isa ka siudad kag magdulog sa isa ka espesipiko nga balay.

Ang pagtuhaw bala sini nga bituon isa lamang ka natural nga hitabo ukon katuyuan ini sang Dios? Binagbinaga ang pila ka katunayan: Ining “mga mangin-alamon” indi mga tawo nga may mataas nga tinun-an; kag indi man sila mga hari. Sa kalabanan nga translation sa Ingles, ginatawag sila nga “mga astrologo.” Ang ila ginahimo ginadumilian gid sang Balaan nga Kasulatan. (Deuteronomio 18:10-12) Talupangda nga ang mga astrologo lamang ang ‘nakakita’ sadto nga bituon. Kon matuod gid man ato nga bituon, dapat madamo ang nakakita sadto. Pero bisan si Hari Herodes namangkot pa sa ila sang mga detalye parte sini. Gingiyahan sini nga bituon ang mga astrologo pakadto kay Herodes sa Jerusalem, ang mortal nga kaaway sang palaabuton nga Mesias. Gusto niya patyon ang bata nga si Jesus. Dayon, nagbaylo ang direksion sang bituon kag gingiyahan sini ang mga astrologo pabagatnan pakadto sa Betlehem, diin nahamtang si Jesus. Gani, nabutang sa katalagman ang kabuhi ni Jesus.

Ini nga mga katunayan nagapamatuod nga ini nga bituon naghalin sa isa nga malaut, nga mahimo amo si Satanas nga Yawa. Ginlaragway sia sang Biblia nga nagagamit sing “butig nga mga tanda kag mga kalatingalahan.” (2 Tesalonica 2:9) Gani nahangpan sang matuod nga mga Cristiano nga mahimo mapadihot ni Satanas nga ang makakita lamang sadtong daw bituon nga butang amo ang mga astrologo kag ginmaniobra ini para giyahan sila pakadto sa Anak sang Dios nga gusto niya patyon. Pero mas gamhanan si Jehova nga Dios. Amo nga indi katingalahan nga napaslawan ang plano sang Yawa nga patyon ang bata nga si Jesus.

Sa pihak nga bahin, talalupangdon nga ginpahibalo ni Jehova ang pagkabun-ag ni Jesus sa milagruso man nga paagi. Sang gab-i nga ginbun-ag si Jesus, ang isa ka anghel nagpakita sa isa ka grupo sang mga manugbantay sang karnero kag nagpahibalo sang pagkabun-ag sang “Manluluwas.” Ginsugiran man sang anghel ang mga manugbantay sang karnero kon diin si Jesus agod maduaw nila ini. Dayon, ang tuman kadamo nga mga anghel nagpakita kag nagdayaw sa Dios. (Lucas 2:8-14) Gingamit sang Dios ini nga mga anghel, kag indi ang bituon, para ipahibalo ang pagkabun-ag ni Jesus.