Magdiretso sa kaundan

Magdiretso sa listahan sang kaundan

Ngaa Nagaluntad Kita?

Ngaa Nagaluntad Kita?

 Ngaa Nagaluntad Kita?

SUNO sa Biblia, ang Dios, nga ang iya ngalan amo si Jehova, isa ka persona nga tuman gid kaalam. Sia ang Ginhalinan sang tanan nga puersa sa uniberso kag ang Manunuga sini. (Salmo 83:18; 92:5) Ang una nga kapitulo sang Biblia nagsiling: “Sa ginsuguran gintuga sang Dios ang mga langit kag ang duta.” Pagkatapos sini, gintuga sang Dios ang tawo sa iya “dagway.” Buot silingon, ang tawo may mga kinaiya nga pareho sa Dios. Ginsugo man niya ang tawo nga magmabungahon kag pun-on ang duta.—Genesis 1:1, 26, 28.

Ginapakita bala sini nga gintuga sang Dios ang uniberso, lakip ang duta kag ang mga sapat kag mga tanom sa sini, para lang nga may mapuy-an ang mga tawo? Kag ari bala kita diri para magkabuhi lamang sing pila ka dekada, magkaon, mag-inom, kag magpanganak?

Ngaa Gintuga Kita sang Dios?

Gintuga ni Jehova nga Dios ang mga tawo bilang pamatuod sang iya gugma. Gusto niya nga maeksperiensiahan man sang mga tawo ang kabuhi kag kalipay. Pat-od nga nalipay gid ang Dios sa pagdesinyo sang tanan niya nga tinuga, para ang tawo mapalibutan sang bugana kag matahom nga mga butang. Labaw sa tanan, gusto sang Manunuga nga ang mga tawo may maayo nga kaangtanan sa iya, ginakilala nila sia kag nagakomunikar sa iya. Gintuga sila para magkabuhi sing wala katapusan sa isa ka perpekto kag malinong nga kahimtangan.—Genesis 3:8, 9; Salmo 37:11, 29.

Ginhatagan man ni Jehova nga Dios ang mga tawo sing importante kag makalilipay nga hilikuton. Ang Dios nagsiling sa una nga mga tawo: “Magmabungahon kag magbuad, kag magtugub sang duta kag magpakaagalon sa iya; kag maggahum sang kaisdaan sang dagat kag sang kapispisan sang kahanginan kag sang tagsa ka buhi nga butang nga nagagiho sa duta.” (Genesis 1:28) Huo, ginsugo ang una nga mag-asawa kag ang ila kaanakan nga himuon ang bug-os nga duta nga isa ka matahom nga paraiso.

Bangod sang pila ka hitabo, wala dayon matuman ang mga katuyuan ni Jehova. * Bisan pa sini, pagatumanon gihapon sang Dios ang iya orihinal nga katuyuan para sa katawhan.—Isaias 46:9-11; 55:11.

Samtang wala pa ini matuman, ang handum ukon panginahanglan sang tawo nga makilala ang Dios kag mangin suod sa Iya makita sa iya pagpangita sing sabat sa katuyuan sang kabuhi. Ang tawo isa ka maalam nga tinuga nga may handum nga hibaluon kag hangpon ang mga butang. Kag nagsiling ang Biblia nga padayon nga magapangita ang tawo sing ihibalo parte sa Dios kag sa iya mga tinuga.

Ang isa ka manunulat sa Biblia nagsiling parte sa katuyuan sang tawo: “Nakita ko ang kasakit nga ginhatag sang Dios sa mga anak sang mga tawo nga hanason sa sini. Ang tagsa ka butang ginhimo niya nga matahum sa iya tion; ginbutang man niya ang wala sing katubtuban sa ila tagiposoon, apang agud nga ang tawo indi makatungkad sang binuhatan nga ginhimo sang Dios kutub sa ginsuguran bisan tubtub sa katapusan. Nahibaloan ko nga wala na sing maayo pa sa ila sang sa magkalipay kag maghimo sing maayo tubtub nga nagakabuhi sila; kag nga ang tagsa ka tawo man magkaon kag mag-inum, kag magpangalipay sing kaayohan sa bug-os niya nga kinabudlayan nga amo ang hatag sang Dios.” (Manugwali 3:10-13) Gani may bag-o pirme nga mga butang nga matun-an ang mga tawo parte sa Dios kag sa iya mga tinuga.

Magtuon Parte sa Dios

Makilala mo si Jehova paagi sa pagtuon sa iya  mga tinuga. Ang isa ka manunulat sang Biblia nagsiling nga ang “di-makita nga mga kinaiya [sang Dios], bisan ang iya dayon nga gahom kag pagka-Dios, maathag nga makita kutob sang pagtuga sa kalibutan, bangod mahantop ini sa mga butang nga gintuga.” (Roma 1:20) Huo, makita gid naton ang gugma, kaalam, kag gahom ni Jehova sa iya mga tinuga.

Ang isa pa ka importante nga ginahalinan sang impormasyon parte sa Dios amo ang Biblia. Ini nga libro ginpasulat ni Jehova agod mas madamo pa gid ang aton matun-an parte sa iya pagtamod, kinaiya, kag katuyuan sangsa pagtuon lang sa iya mga tinuga.

Ang Biblia nagsiling parte sa katuyuan sang Dios: “Ang mga langit mga langit sang Ginoo, apang ang duta nahatag niya sa mga anak sang mga tawo.” (Salmo 115:16) Masiling gid nga ang lamang nga lugar sa uniberso nga puede puy-an sang mga tawo amo ang duta, kay ginhimo ini ni Jehova para gid sa sini nga katuyuan.

Kamusta naman ang tuman kasangkad nga uniberso? Ang tanan bala nga bituon ginbutang lang para mangin balanse ang sistema solar, amo nga mangin posible ang kabuhi sa duta? Ginpahamtang lang bala ang mga butang sa kalangitan para mangin matahom ang kagab-ihon? Batunon naton nga madamo pa kita sing wala mahibaluan. Pero maayo kay amo sina! Ngaa?

Bisan ang wala sing katubtuban indi gihapon bastante para mahangpan sang tawo ang tanan nga ginhimo kag katuyuan sang Dios. Gusto niya nga padayon ang aton pagtukib para padayon man kita nga mangin malipayon. Ang wala katapusan kag malipayon nga kabuhi sa duta magahatag sing kahigayunan sa matinumanon nga mga tawo nga tukibon pa gid ang mas madamo nga butang sa uniberso.

[Nota]

^ par. 7 Ang kalautan kag pag-antos amo ang kabangdanan kon ngaa madamo ang wala nagapati nga may isa ka mahigugmaon nga Manunuga. Para sa sini nga topiko, palihug tan-awa ang kapitulo 11 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.

[Blurb sa pahina 9]

Ang tawo isa ka maalam nga tinuga nga may handum nga hibaluon kag hangpon ang mga butang

[Mga retrato sa pahina 10]

Ginapakita sang Biblia nga gintuga ang duta para malipay ang mga tawo