Klɛŋklɛŋ Wolo Ni Akɛmaje Tesalonikabii Lɛ 1:1-10
1 Paulo, kɛ Silvano,*+ kɛ Timoteo+ kɛ wolo nɛɛ miimaje Tesalonikabii asafo ni kɛ Nyɔŋmɔ, ni ji Tsɛ lɛ, kɛ Nuŋtsɔ Yesu Kristo efee ekome lɛ:
Dromɔ kɛ toiŋjɔlɛ ahã nyɛ.
2 Be fɛɛ be ni wɔtsĩɔ nyɛ fɛɛ nyɛtã yɛ wɔsɔlemɔi amli lɛ, wɔdaa Nyɔŋmɔ shi,+
3 ejaakɛ wɔyaa nɔ wɔkaiɔ nyɛhemɔkɛyeli nitsumɔ, kɛ nyɛsuɔmɔ mli ni nyɛjɛɔ nyɛtsuɔ nii waa, kɛ nyɛshifimɔ yɛ hiɛnɔkamɔ ni nyɛyɔɔ+ yɛ wɔ-Nuŋtsɔ Yesu Kristo mli lɛ, yɛ wɔ-Nyɔŋmɔ kɛ wɔ-Tsɛ lɛ hiɛ.
4 Ejaakɛ, nyɛmimɛi ni Nyɔŋmɔ sumɔɔ, wɔle halamɔ ni ehala nyɛ lɛ,
5 ejaakɛ sane kpakpa ni wɔshiɛɔ lɛ baaa nyɛŋɔɔ yɛ wiemɔ mli kɛkɛ, shi moŋ yɛ hewalɛ kɛ mumɔ krɔŋkrɔŋ, kɛ nɔmimaa ni mli wa mli, tamɔ bɔ ni nyɛle nɔ gbɔmɛi ni wɔtsɔmɔ yɛ nyɛteŋ yɛ nyɛhewɔ lɛ.
6 Ni nyɛtsɔmɔ mɛi ni kaseɔ wɔ+ kɛ Nuŋtsɔ lɛ,+ ejaakɛ nyɛmɔ wiemɔ lɛ mli yɛ amanehulu babaoo mli+ kɛ miishɛɛ ni jɛɔ mumɔ krɔŋkrɔŋ lɛ dɛŋ,
7 ni no hewɔ lɛ, nyɛtsɔmɔ nɔkwɛmɔnɔ kɛhã mɛi fɛɛ ni heɔ Nuŋtsɔ lɛ nɔ amɛyeɔ ni yɔɔ Makedonia kɛ Akaia lɛ.
8 Anɔkwa sane ji akɛ, jeee akɛ Yehowa* wiemɔ lɛ jɛ nyɛŋɔɔ ejije yɛ Makedonia kɛ Akaia kɛkɛ, shi moŋ hemɔkɛyeli ni nyɛyɔɔ yɛ Nyɔŋmɔ mli lɛ egbɛ eshwã he fɛɛ he,+ ni no hewɔ lɛ, ehe ehiaaa ni wɔwie nɔ ko po.
9 Ejaakɛ amɛ diɛŋtsɛ amɛyaa nɔ amɛgbaa be ni wɔkɛ nyɛ kpe klɛŋklɛŋ lɛ he sane, kɛ bɔ ni nyɛshi nyɛmagai lɛ kɛba Nyɔŋmɔ ŋɔɔ+ koni nyɛbasɔmɔ anɔkwa Nyɔŋmɔ ni hiɛ kã lɛ akɛ nyɔji,
10 koni nyɛmɛ e-Bi lɛ kɛjɛ ŋwɛi,+ mɔ ni etee lɛ shi kɛjɛ gbohii ateŋ ni jieɔ wɔ kɛjɛɔ mlifu ni baa lɛ mli, ni atsɛɔ lɛ Yesu lɛ.+
