Klɛŋklɛŋ Wolo Ni Akɛmaje Tesalonikabii Lɛ 4:1-18

  • Ajwamaŋbɔɔ he kɔkɔbɔɔ (1-8)

  • Nyɛsumɔsumɔa nyɛhe kɛmɔa shi (9-12)

    • ‘Nyɛyea nyɛ diɛŋtsɛ nyɛshĩa sane’ (11)

  • Mɛi ni egboi yɛ Kristo mli lɛ klɛŋklɛŋ baate shi (13-18)

4  Naagbee lɛ, nyɛmimɛi, bɔ ni nyɛnine shɛ gbɛtsɔɔmɔ ni tsɔɔ bɔ ni esa akɛ nyɛnyiɛ koni nyɛsa Nyɔŋmɔ hiɛ+ lɛ nɔ kɛjɛ wɔŋɔɔ lɛ, tamɔ bɔ ni yɛ anɔkwale mli lɛ nyɛnyiɛɔ lɛ, wɔmiibi nyɛ, ni wɔmiikpa nyɛ fai yɛ Nuŋtsɔ Yesu mli akɛ, nyɛyaa nɔ nyɛfea nakai ni eteke nɔ fe tsutsu lɛ.  Ejaakɛ nyɛle gbɛtsɔɔmɔi* ni wɔtsɔ Nuŋtsɔ Yesu nɔ wɔkɛhã nyɛ lɛ.  Ejaakɛ enɛ ji Nyɔŋmɔ suɔmɔnaa nii, akɛ nyɛfee krɔŋkrɔŋ+ ni nyɛtsi nyɛhe kɛje ajwamaŋbɔɔ* he.+  Nyɛteŋ mɔ fɛɛ mɔ ale bɔ ni ebaakudɔ lɛ diɛŋtsɛ egbɔmɔtso*+ yɛ krɔŋkrɔŋfeemɔ+ kɛ woo mli,  jeee yɛ bɔlɛnamɔ he akɔnɔ ni anyɛɛɛ nɔ aye ni akɛ hiɛjoomɔ tiuɔ sɛɛ lɛ mli,+ tamɔ bɔ ni jeŋmaji ni leee Nyɔŋmɔ lɛ feɔ lɛ.+  Esaaa akɛ mɔ ko mɔ ko feɔ nɔ ko ni esaaa ni eyeɔ enyɛmi awui yɛ sane nɛɛ mli, ejaakɛ Yehowa* kɛ nibii nɛɛ fɛɛ ahe toigbalamɔ hãa, tamɔ bɔ ni wɔtsɔ hiɛ wɔkɛɛ nyɛ momo, ni wɔbɔ nyɛ kɔkɔ waa hu yɛ he lɛ.  Ejaakɛ jeee muji nii hewɔ Nyɔŋmɔ tsɛ wɔ, shi moŋ krɔŋkrɔŋfeemɔ hewɔ.+  No hewɔ lɛ, agbɛnɛ, mɔ ni ebuuu tsɔɔmɔ nɛɛ, jeee gbɔmɔ ebuuu lɛ, shi moŋ Nyɔŋmɔ,+ mɔ ni kɛ emumɔ krɔŋkrɔŋ lɛ hãa nyɛ lɛ.+  Shi yɛ nyɛmimɛi asuɔmɔ gbɛfaŋ lɛ,+ ehe ehiaaa ni wɔŋma nyɛ he sane, ejaakɛ nyɛ diɛŋtsɛ lɛ, Nyɔŋmɔ tsɔɔ nyɛ akɛ nyɛsumɔa nyɛhe.+ 10  Anɔkwa, nyɛmiifee nakai yɛ nyɛmimɛi lɛ fɛɛ agbɛfaŋ yɛ Makedonia fɛɛ. Shi nyɛmimɛi, wɔmiiwo nyɛ hewalɛ ni nyɛya nɔ nyɛfee nakai ni eteke nɔ fe tsutsu lɛ. 11  Nyɛkɛfea oti akɛ nyɛbaahi shi diŋŋ,+ ni nyɛye nyɛ diɛŋtsɛ nyɛshĩa sane,+ ni nyɛkɛ nyɛniji atsu nii,+ tamɔ bɔ ni wɔkɛ gbɛtsɔɔmɔ ehã nyɛ lɛ, 12  koni nyɛnyiɛ fɛfɛo yɛ mɛi ni yɔɔ sɛɛ lɛ* ahiɛ,+ ní nɔ ko nɔ ko akahia nyɛ. 13  Agbɛnɛ hu, nyɛmimɛi, wɔmiisumɔ ni nyɛle mɛi ni egboi* lɛ ahe sane,+ koni nyɛkaye awerɛho tamɔ bɔ ni mɛi ni eshwɛ ni bɛ hiɛnɔkamɔ ko kwraa lɛ feɔ lɛ.+ 14  Ejaakɛ kɛ́ wɔyɛ hemɔkɛyeli akɛ Yesu gbo ni ete shi ekoŋŋ lɛ,+ belɛ nakai nɔŋŋ Nyɔŋmɔ kɛ mɛi ni etsɔ Yesu nɔ amɛgboi* lɛ hu baafata Yesu he kɛba.+ 15  Ejaakɛ enɛ ji nɔ ni wɔkɛɔ nyɛ yɛ Yehowa* wiemɔ naa, akɛ wɔ mɛi ni wɔyɔɔ wala mli be ni Nuŋtsɔ lɛ eba lɛ, wɔtsɔŋ mɛi ni egboi* lɛ ahiɛ kɔkɔɔkɔ; 16  ejaakɛ Nuŋtsɔ lɛ diɛŋtsɛ baakpeleke shi kɛjɛ ŋwɛi, ni ekɛ ŋwɛibɔfonukpa+ gbee kɛ Nyɔŋmɔ tɛtɛrɛmantɛrɛ baabo etsɛ, ni mɛi ni kɛ Kristo efee ekome ni egboi lɛ klɛŋklɛŋ baate shi.+ 17  No sɛɛ lɛ, abaashá wɔ mɛi ni wɔyɔɔ wala mli lɛ yɛ atatui amli+ kɛyafata amɛhe koni wɔkɛ Nuŋtsɔ lɛ ayakpe+ yɛ kɔɔyɔɔ lɛ mli; ni wɔkɛ Nuŋtsɔ lɛ baahi shi daa.+ 18  No hewɔ lɛ, nyɛyaa nɔ nyɛkɛ wiemɔi nɛɛ ashɛjea nyɛmii.

Shishigbɛ Niŋmaa

Loo “famɔi.”
Greek mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
Greek sht. ŋm., “egbɛ́; ekukwɛi.”
Loo “mɛi ni bɛ Kristofoi asafo lɛ mli lɛ.”
Loo “ewɔ.”
Loo “amɛwɔ.”
Loo “ewɔ.”