Trwazyenm krwayans: Tou bon dimoun i al dan lesyel

Kote sa krwayans i sorti? Apre lanmor bann zapot Zezi, ver konmansman dezyenm syek N.L., bann Fondater Legliz ti vin enportan. New Catholic Encyclopedia (2003), Volim 6, paz 687 i dekrir zot lansennyman koumsa: “An zeneral zot ti ansennyen ki lavi dan lesyel i posib ler ou nanm i kit ou lekor deswit apre ki i’n ganny pirifye apre lanmor.”

Ki Labib i dir? “Byennere bann ki dou, akoz zot pou posed later.”—Matye 5:5, nou ki’n met an italik.

Menm si Zezi ti promet son bann disip ki i ti pou “prepar en plas” pour zot dan lesyel, i ti osi montre ki pa tou dimoun drwat ki ti pou al dan lesyel. (Zan 3:13; 14:2, 3) Pa i ti priye pour ki lavolonte Bondye i ganny akonplir “lo later parey dan lesyel”? (Matye 6:9, 10, nou ki’n met an italik.) An realite, lavi ki swa dan lesyel oubyen lo later i posib pour bann dimoun ki drwat. En ptigin dimoun pou al dirize dan lesyel ansanm avek Kris, me lamazorite dimoun pou viv lo later pour touzour.—Revelasyon 5:10.

Apre lanmor bann zapot, legliz ti sanz zot pwennvi konsernan son rol lo later. Avek ki rezilta? The New Encyclopædia Britannica i dir: “Avek letan, Legliz ti kontinyelman ranplas sa Rwayonm Bondye ki zot ti pe ekspekte.” Legliz ti konmans ranforsi son pouvwar par mel li dan politik, e an fezan sa i ti pe inyor sa ki Zezi ti klerman dir son bann disip pour “pa fer parti lemonn.” (Zan 15:19; 17:14-16; 18:36) Anba lenfliyans Lanperer Romen Constantine, legliz ti fer konpromi avek serten son bann lansennyman enkli sa enn ki enplik lafason ki Bondye i vreman ete.

Konpar sa bann verse Labib: Psonm 37:10, 11, 29; Zan 17:2, 3; 2 Timote 2:11, 12

REALITE:

Lamazorite dimoun ki bon pou viv pour touzour lo later, me pa dan lesyel