1 Met ou konfyans dan Labib

“Tou Lekritir i enspire par Bondye e i itil pour ansennyen, pour koriz lerer, pour remet drwat.”—2 Timote 3:16.

KI SA DEFI? Bokou dimoun i ensiste pour dir ki Labib i ranpli zis avek lasazes imen. Serten i krwar ki bann resi istorik dan Labib pa egzakt. Serten i dir ki bann konsey dan Labib pa pratik oubyen ki zot in fini demode.

KI MANNYER OU KAPAB SIRMONT SA DEFI? Souvan, se bann dimoun ki pa’n egzamin Labib pour zot menm ki doute ki Labib i en liv ki nou kapab annan konfyans ladan oubyen en liv ki itil. Zot senpleman repet sa ki lezot i dir. Parkont, Labib i donn sa lavertisman: “Sa ki napa leksperyans i met lafwa dan tou parol, me sa enn ki malen i egzamin son lepa.”—Proverb 14:15.

Olye aksepte tou sa ki lezot i dir san rod okenn laprev, akoz ou pa swiv legzanp bann Kretyen dan premye syek ki ti reste dan lavil Bere, ki ozordi i dan nor Lagres? Zot pa ti zis aksepte sa ki lezot ti dir zot. O kontrer, zot ti annan sa repitasyon konman bann dimoun ki “toulezour . . . ti etidye Lekritir pour war si sa ki Pol ti dir zot ti vre.” (Akt 17:11) Annou egzamin an bref de rezon akoz ou kapab annan konfyans ki Labib i parol Bondye ki’n enspire.

Resi istorik dan Labib i egzakt. Pour plizyer lannen, bann ki doute in kestyonn e pe kontinyen kestyonnen si bann non ek landrwa ki ganny mansyonnen dan Labib i egzakt. Me, a sak fwa levidans in prouve ki sa ki bann dimoun ki doute i dir napa okenn fondman e parkont bann resi dan Labib i diny konfyans.

Par egzanp, a en serten moman bann spesyalis Labib ti dout legzistans Lerwa Asiryen, Sargon, ki ganny mansyonnen dan Izai 20:1. Parkont, dan lannen 1840, bann arkeolog ti dekouver pale sa lerwa. Aprezan Sargon i sa lerwa pli renonmen parmi bann lerwa Asiryen.

Legzistans Pons Pilat, sa gouverner Romen ki ti donn lord pour touy Zezi in ganny kestyonnen. (Matye 27:1, 22-24) Me an 1961 en ros ki ti annan non ek pozisyon Pilat lo la ti ganny dekouver pros avek lavil Sezare an Izrael.

 En rapor dan zournal U.S.News & World Report, date le 25 Oktob 1999, ti dir sa konsernan bann resi istorik dan Labib: “Dan en fason ekstraordiner, arkeolozi modern in konfirmen ki bann parti istorik enportan Ansyen Testaman ek Nouvo Testaman i egzakt. I donn laprev bann parti enportan dan zistwar bann patrias an Izrael, konsernan kan bann Izraelit ti ganny delivre Lezip, Rwayonm David, lavi Zezi ek letan ki i ti viv.” Menm si pour annan lafwa dan Labib pa depan lo bann dekouvert par bann arkeolog, sa bann resi istorik i egzakt. Pa sanmenm ki ou pou ekspekte avek en liv ki’n ganny enspire par Bondye.

Lasazes pratik dan Labib i anmenn byenfe pour dimoun sorti dan diferan lorizin. Bokou letan avan ki mikroorganizm e rol ki zot annan pour propaz maladi ti ganny dekouver, dan Labib ti’n deza annan bann rekomandasyon konsernan pratik lo lizyenn ki ankor itil ozordi. (Levitik 11:32-40; Deterononm 23:12, 13) Bann manm fanmir ki aplik bann konsey ki trouve dan Labib konsernan ki mannyer pour tret kanmarad i vin pli ere. (Efezyen 5:28–6:4) En dimoun ki met an pratik bann prensip Labib dan son lavi i kapab vin en anploye pli konsyansye oubyen en anployer pli rezonnab. (Efezyen 4:28; 6:5-9) Kan nou aplik bann prensip Labib, sa i osi anmenn byenfe emosyonnelman. (Proverb 14:30; Efezyen 4:31, 32; Kolosyen 3:8-10) Sa bann konsey i pratik. Sanmenm ki nou pou ekspekte avek nou Kreater.

KI SA REKONPANS? Lasazes ki trouve dan Labib i kapab menm fer en dimoun ki mank leksperyans vin saz. (Psonm 19:7) Deplis, enn fwa ki nou’n met nou konfyans dan Labib, i kapab ed nou plis ki okenn lezot liv dan sa lot letap pour ganny en lafwa for.

Pour plis lenformasyon, vwar sapit 2 “Labib i en Liv ki sorti kot Bondye,” dan liv Ki Labib i vreman dir? *

[Not anba lo paz]