Non parski napa okenn par dan Labib oubyen dan bann liv listwar ki dir ki bann Kretyen ti ganny batize pour bann dimoun ki’n mor.

Lafason ki sa verse i ganny tradwir dan plizyer Labib i fer serten dimoun krwar ki bann Kretyen dan premye syek ti ganny batize pour bann dimoun ki’n mor. Par egzanp, Labib an Kreol Seselwa i dir: “Si i vre ki napa rezireksyon bann ki’n mor, akoz eski zot fer zot ganny batize pour sa bann ki’n mor?”

Me annou vwar sa ki de spesyalis Labib i dir. Premyerman, Dr. Gregory Lockwood ti dir ki i napa okenn laprev dan Labib oubyen dan listwar ki dimoun ti ganny batize pour en dimoun ki’n mor. Profeser Gordon D. Fee ti dakor avek sa ki i ti dir. Profeser Gordon ti ekri ki i napa nanryen dan Labib oubyen listwar ki montre ki sa kalite batenm ti ganny fer. I ti osi dir ki sa pa ganny mansyonnen dan Nouvo Testaman e ki i napa okenn laprev ki bann Kretyen dan premye syek ti fer sa oubyen ki bann legliz ki ti ganny formen pa bokou letan apre lanmor bann zapot ti fer sa.

Labib i dir ki bann disip Zezi ti bezwen “al kot bann dimoun dan tou nasyon e fer zot vin [son] disip, batiz zot . . . , ansenny zot pour obei tou” sa ki i’n donn zot lord pour fer. (Mat. 28:19, 20) Avan en dimoun i kapab batize, i bezwen aprann konn, krwar e obei Zeova ek Son Garson. En dimoun ki’n mor e ki dan latonm pa kapab fer sa e en Kretyen ki ankor vivan pa kapab fer sa pour en dimoun ki’n mor.​—Ekle. 9:5, 10; Zan 4:1; 1 Kor. 1:14-16.

Alor, ki Pol ti pe esey dir?

Serten Kretyen ti dir ki bann mor pa pou ganny resisite. (1 Kor. 15:12) Pol ti montre zot ki sa ti en move pwennvi. Ki mannyer i ti fer sa? I ti eksplike ki tou le zour i fer fas avek lanmor me ki i ti asire ki apre son lanmor i ti pou ganny resisite pour al dan lesyel, parey Zezi.​—1 Kor. 15:30-32, 42-44.

Bann Kretyen dan lavil Korent ti bezwen konpran ki vi ki zot ti bann Kretyen swazir, zot ti bezwen fer fas avek problenm tou le zour e zot ti pou bezwen mor avan ki zot ganny resisite. Alor ler zot ti ganny “batize dan Kris Zezi,” zot ti osi “ganny batize dan son lanmor.” (Rom. 6:3) Sa i vedir ki parey Zezi, zot pou fer fas avek problenm e zot pou bezwen mor pour zot kapab ganny resisite pour al dan lesyel.

Plis ki de-z-an apre ki Zezi ti’n batize dan delo, i ti dir de son bann zapot: “Zot pou ganny batize dan sa menm fason ki mon pe al ganny batize.” (Mark 10:38, 39) Zezi pa ti pe dir ki i ti pe al ganny batize dan delo ankor. Dan sa verse, Zezi ti pe dir ki i ti pou mor akoz son fidelite anver Bondye. Pol ti dir ki bann Kretyen swazir ti pou “soufer ansanm avek [Zezi] pour ki [zot] osi kapab ganny glorifye avek li.” (Rom. 8:16, 17; 2 Kor. 4:17) Alor, zot osi zot pou bezwen mor pour zot kapab ganny resisite pour al dan lesyel.

Alor, sa ki Pol ti dir i kapab ganny tradwir koumsa: “Si bann mor pa pou ganny resisite ditou, ki pou arive avek bann ki ganny batize dan lanmor? Si bann mor pa pou ganny resisite, akoz zot pe ganny sa batenm?”