“SALAMAT.” Kinsay dili ganahang makadungog nianang pulonga tungod sa maayong nahimo o sa kinasingkasing nga gasa? Gusto natong tanan nga pabilhan sa uban ang atong paningkamot, ilabina niadtong atong gimahal. Siyempre, gihigugma nato labaw sa tanan si Jehova nga Diyos. Pabilhan ba niya ang atong mga paningkamot sa pag-alagad kaniya? Atong susihon ang iyang pakiglabot kang Ebed-melek, usa ka tawong nagpameligro sa iyang kinabuhi aron maluwas ang usa ka propeta sa Diyos.—Basaha ang Jeremias 38:7-13 ug 39:16-18.

Kinsa si Ebed-melek? Dayag nga siya usa ka opisyal sa palasyo ni Haring Zedekias sa Juda. * Si Ebed-melek katalirongan ni Jeremias, kinsa gipadala sa Diyos aron pasidan-an ang dili-matinumanong Juda sa nagsingabot nga kalaglagan niini. Bisag gilibotan sa dili-diyosnong mga prinsipe, si Ebed-melek may kahadlok sa Diyos ug dakog pagtahod kang Jeremias. Ang iyang diyosnong mga hiyas nasulayan sa dihang ang daotang mga prinsipe nag-akusar kang Jeremias ug sedisyon ug gitambog kini sa atabayng lapokon aron mamatay. (Jeremias 38:4-6) Unsay gibuhat ni Ebed-melek?

Si Ebed-melek nagmaisogon ug wala mag-ukon-ukon, nga wala mahadlok nga silotan siya sa mga prinsipe. Sa dayag, siya miduol kang Zedekias ug mireklamo sa dili maayong pagtratar kang Jeremias. Lagmit iyang gitudlo ang mga naghimo niana sa dihang iyang giingnan ang hari: “Kining mga tawhana nakahimo ug daotan . . . kang Jeremias.” (Jeremias 38:9) Si Ebed-melek milampos, ug sa sugo ni Zedekias, siya nagdalag 30 ka tawo sa pagluwas kang Jeremias.

Dayon, si Ebed-melek nagpakitag laing maayong hiyas: kalulot. Siya mikuhag “dunot nga mga nuog ug dunot nga mga panapton ug gitunton kini ngadto kang Jeremias . . . pinaagi sa mga pisi.” Para unsa ang nuog ug panapton? Gihapin kana ni Jeremias sa iyang ilok aron dili siya masamad samtang gibitad pagawas sa lapokong atabay.—Jeremias 38:11-13.

Nakita ni Jehova ang gibuhat ni Ebed-melek. Giapresyar ba Niya kana? Pinaagi kang Jeremias, giingnan sa Diyos si Ebed-melek nga hapit nang laglagon ang Juda. Dayon mihatag siya kang Ebed-melek sa gitawag sa usa ka eskolar nga “lima ka garantiya sa kaluwasan.” Si Jehova miingon: “Luwason ko ikaw . . . Dili ka itugyan ngadto sa kamot sa mga tawo . . . Ako sa walay pakyas magtagana kanimo ug kaikyasan . . . Dili ka mapukan sa espada . . . Tino nga mabatonan mo ang imong kalag ingon nga inagaw.” Nganong misaad man si Jehova nga luwason si Ebed-melek? “Tungod kay ikaw misalig kanako,” miingon si Jehova. (Jeremias 39:16-18) Siya nahibalong si Ebed-melek milihok dili lang tungod sa iyang kahingawa kang Jeremias kondili tungod usab sa iyang pagsalig ug pagtuo sa Diyos.

Tin-aw ang leksiyon: Pabilhan ni Jehova ang atong ginahimo sa pag-alagad kaniya. Ang Bibliya nagpasalig nga siya mahinumdom bisan sa kinagamyang buhat sa pagsimba nga tinukmod sa kasingkasing nga punog pagtuo. (Marcos 12:41-44) Natukmod ka bang mas makigsuod pa niining mapabilhong Diyos? Kon mao, makasalig kang tumanon niya ang pagtawag sa Bibliya kaniya: “[Ang] tigganti sa mga matinuorong nagapangita kaniya.”—Hebreohanon 11:6.

Sugyot nga pagbasa sa Bibliya sa Mayo:

▪ Jeremias 32-50

[Footnote]