Nganong Nahugno?

“Ang mga Pariseo miduol [kang Jesus], nga may tuyo sa pagtental kaniya ug nag-ingon: ‘Subay ba sa balaod nga ang usa ka lalaki makigdiborsiyo sa iyang asawa sa bisan unsang matang sa pasikaranan?’”—Mateo 19:3.

ANG pipila ka tawo sa panahon ni Jesus nangutana kon ang kaminyoon mahimo bang molungtad. Sila giingnan ni Jesus: “Wala ba ninyo mabasa nga siya nga naglalang kanila sukad sa sinugdan nagbuhat kanila nga lalaki ug babaye ug nag-ingon, ‘Tungod niini ang usa ka lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod’? Mao nga dili na sila duha, kondili usa ka unod. Busa, kon unsay gihiusa pagyugo sa Diyos ayaw ipabulag ni bisan kinsang tawo.” * (Mateo 19:4-6) Dayag, buot sa Diyos nga molungtad ang kaminyoon.

Sa daghang kayutaan karon, mga 40 porsiyento o kapin pa sa tanang kaminyoon ang misangko sa diborsiyo. Dili na ba aplikado karon ang tambag sa Bibliya bahin sa kaminyoon? Dili ba kaha nahugno ang kaminyoon tungod kay sayop ang mismong gambalay niini?

Tagda kini nga ilustrasyon: Duha ka magtiayon ang nagpalit ug parehong bag-o nga kotse. Ang usa ka magtiayon nagmentinar pag-ayo sa ilang sakyanan ug nag-amping sa pagmaneho niini. Wala kini madaot. Ang lain wala magmentinar sa ilang sakyanan ug danghag sa pagmaneho niini. Ang maong sakyanan nadaot ug giabandonar. Kinsay angayng basolon—ang sakyanan o ang tag-iya? Siyempre ang tag-iya.

Sa susama, kon nahugno ang daghang kaminyoon wala kini magpasabot nga sayop ang pagkamugna niini. Ngani, minilyong kaminyoon ang nagmalamposon. Kini nakahatag ug kalipay ug kalinaw sa mga indibiduwal, pamilya, ug mga komunidad. Apan ang kaminyoon, sama sa kotse, nagkinahanglag maayong pag-atiman ug regular nga pagmentinar aron kini molungtad.

Bag-o man o dugay na ang inyong kaminyoon, mapuslanon gayod ang tambag sa Bibliya kon unsaon kini sa pagmentinar ug pagpalig-on. Sa mosunod nga mga panid, matikdi ang pipila ka pananglitan.

[Footnote]