Usa ka Tibuok Kalibotan Nalaglag!

Tan-awa ang kalibotan sa imong palibot, uban sa mga siyudad niini, kultura, kalamposan sa siyensiya, ug populasyon niini nga binilyon. Makaingon ka gayod nga klarong magpabilin kini hangtod sa hangtod, di ba? Nagtuo ka ba nga moabot ra ang adlaw nga kining kalibotana bug-os nga mawagtang? Morag lisod kanang handurawon. Apan, nahibalo ka ba nga sumala sa kasaligan kaayong tinubdan, dihay usa ka kalibotan una pa niini nga naglungtad kaniadto ug kini bug-os nga nalaglag?

WALA kami maghisgot dinhi bahin sa usa ka kalibotan nga gipuy-an sa karaang mga tribo. Ang kalibotan nga nahanaw maoy sibilisado, nga may mga siyudad, daghag nahimo nga mga buhat sa arte, may siyentipikanhong kahibalo. Apan, ang rekord sa Bibliya nag-asoy kanato nga sa kalit, sa ika-17ng adlaw sa ika-2ng bulan, 352 ka tuig una pa matawo ang patriarkang si Abraham, dihay nahitabong baha nga nagbanlas sa tibuok kalibotan. a

 Tukma ba ang maong rekord? Duna ba gayoy ingon niana nga nahitabo? Diha ba gayoy usa ka karaang kalibotan una pa niining bag-o nga miuswag ug dayon gilaglag? Kon mao, nganong kini natapos? Unsay problema? Ug kita ba may makuhang leksiyon gikan sa pagkahanaw niini?

Gilaglag ba Gayod ang Usa ka Karaang Kalibotan?

Ang ingon niini ka talagsaong katalagman, kon tinuod man nga nahitabo, dili gayod bug-os nga makalimtan. Busa, diha sa daghang kanasoran adunay mga pahinumdom bahin niana nga kalaglagan. Tagda, pananglitan, ang tukmang petsa nga narekord sa Kasulatan. Ang ikaduhang bulan sa karaang kalendaryo modagan gikan nianang atong gitawag karon nga tungatunga sa Oktubre ngadto sa tungatunga sa Nobyembre. Busa ang ika-17ng adlaw motakdo sa mga unang bahin sa Nobyembre. Nan, tingali dili kay nagkaatol lamang nga diha sa daghang kayutaan, ang mga pista sa mga patay ginasaulog nianang panahona sa tuig.

Ang ubang mga ebidensiya sa Baha nagpabilin diha sa mga tradisyon sa mga tawo. Halos ang tanang karaang sibilisasyon dunay karaang sugilanon nga naluwas ang ilang mga kagikan sa usa ka tibuok kalibotan nga lunop. Ang mga Pygmy sa Aprika, mga Celt sa Uropa, mga Inca sa Amerika del Sur—tanan dunay susamang karaang mga sugilanon, maingon man ang mga tawo sa Alaska, mga bahin sa Amerika del Norte, Australia, India, Lithuania, Mexico, Micronesia, New Zealand, ug Tsina, sa paghisgot lamang ug pipila.

Siyempre, sa pagdagan sa panahon ang karaang mga sugilanon nadugangan, apan ang tanan dunay daghang detalye nga nagpaila nga usa ra ang gigikanang sugilanon: Ang Diyos nasuko sa pagkadaotan sa tawo. Siya nagpadala ug dakong lunop. Ang tibuok katawhan nalaglag. Apan, pipila lang ka tawong matarong ang giluwas. Kining mga tawhana nagtukod ug usa ka arka nga diha niana ang mga tawo ug mga hayop naluwas. Sa kadugayan, dihay gipalupad nga mga langgam aron mangitag mala nga yuta. Sa kataposan, ang arka mipondo sa usa ka bukid. Sa dihang mikawas, ang mga nangaluwas nagtanyag ug halad.

Unsay nagpamatuod niini? Imposible nga ang susamang mga asoy nagkaatol lang. Ang tibuok ebidensiya niining karaang mga sugilanon nagpalig-on sa karaang testimonya sa Bibliya nga ang tanang tawo naggikan sa nangaluwas sa usa ka lunop nga naglaglag sa kalibotan sa katawhan. Busa, dili kita kinahanglang magsalig sa karaang mga sugilanon o sugilambong aron mahibalo sa nahitabo. Kita adunay napreserbar gayod nga rekord sa Hebreohanong Kasulatan sa Bibliya.—Genesis, mga kapitulo 6-8.

Ang Bibliya nasudlan ug dinasig nga rekord sa kasaysayan balik pa sa sinugdanan sa kinabuhi. Apan, ang ebidensiya nagpamatuod nga labaw pa  kini kay sa ordinaryong kasaysayan. Ang dili-mapakyas nga tagna ug lalom nga kaalam nagpasundayag nga tinuod kini sama sa gipangangkon niini—ang komunikasyon sa Diyos ngadto sa tawo. Dili sama sa mga sugilambong, ang Bibliya nagpadayag sa mga ngalan ug sa mga petsa maingon man sa mga detalye bahin sa linya sa mga kaliwat ug sa lugar diha sa makasaysayanhong mga asoy niini. Kita gihatagan niini ug hulagway kon sama sa unsa ang kinabuhi sa wala pa ang Lunop ug nagpadayag kon nganong ang usa ka tibuok kalibotan mikalit pagkawagtang.

Unsay nahitabo niadtong wala-pay-baha nga katilingban? Hisgotan sa sunod nga artikulo kanang pangutanaha. Hinungdanon kining maong pangutana alang sa mga tawong nahibulong kon unsa ka lig-on ang umaabot sa atong presenteng sibilisasyon.

[Footnote]

[Chart sa panid 4]

(Alang sa aktuwal nga pagkahan-ay, tan-awa ang publikasyon)

Karaang mga Sugilanon Bahin sa Lunop sa Tibuok Kalibotan

Nasod Mga Katugbang 1 2 3 4 5 6 7 8 9 10

Gresya 7 ◆ ◆ ◆ ◆ ◆ ◆ ◆

Roma 6 ◆ ◆ ◆ ◆ ◆ ◆

Lithuania 6 ◆ ◆ ◆ ◆ ◆ ◆

Asirya 9 ◆ ◆ ◆ ◆ ◆ ◆ ◆ ◆ ◆

Tanzania 7 ◆ ◆ ◆ ◆ ◆ ◆ ◆

India - Hindu 6 ◆ ◆ ◆ ◆ ◆ ◆

New Zealand - Maori 5 ◆ ◆ ◆ ◆ ◆

Micronesia 7 ◆ ◆ ◆ ◆ ◆ ◆ ◆

Washington T.B.A. - Yakima 7 ◆ ◆ ◆ ◆ ◆ ◆ ◆

Mississippi T.B.A. - Choctaw 7 ◆ ◆ ◆ ◆ ◆ ◆ ◆

Mexico - Michoacan 5 ◆ ◆ ◆ ◆ ◆

Amerika del Sur - Quechua 4 ◆ ◆ ◆ ◆

Bolivia - Chiriguano 5 ◆ ◆ ◆ ◆ ◆

Guyana - Arawak 6 ◆ ◆ ◆ ◆ ◆ ◆

1: Ang Diyos nasuko sa pagkadaotan

2: Gilaglag pinaagig lunop

3: Gisugo sa Diyos

4: Gipadayag ang pasidaan nga gikan sa Diyos

5: Pipila ka tawo ang naluwas

6: Naluwas diha sa usa ka arka

7: Mga hayop naluwas

8: Langgam o ubang linalang gipadala

9: Sa kataposan mipondo sa bukid

10: Nagtanyag ug halad