Mga Magmamantala sa Gingharian Nagtaho

Pag-abot Niadtong Lisod Aboton

ANG mga Saksi ni Jehova naningkamot sa pagkontak sa tanan kutob sa ilang maarangan dala ang mensahe sa Gingharian. Usahay, nagkinahanglag talagsaong paningkamot aron maabot kadtong talagsa rang makaplagan sa balay. (Marcos 13:10) Niining bahina, ang espesyal nga payunir nga ministro sa usa ka nasod sa Amerika del Sur nag-asoy sa mosunod nga eksperyensiya.

“Usa ka adlaw niana akong nahibaloan nga ang gobernador sa estado moduaw sa teritoryo nga kaming magtiayon naasayn. Tungod kay tataw nga siya maoy usa niadtong talagsa rang makaplagan sa balay, ako siyang gisulatan ug gipasukipan kini ug pipila ka publikasyon sa Bibliya, lakip ang brosyur nga Unsay Gikinahanglan sa Diyos Kanato? ug ang mga librong Pagpangita sa Katawhan sa Diyos ug Kahibalo nga Motultol sa Kinabuhing Walay Kataposan. Ang akong sulat nagsaysay sa katuyoan sa matag usa niini nga mga publikasyon.

“Tungod kay buot kong mahibaloan ang iyang reaksiyon sa literatura, mihangyo ako nga makigkita kaniya. Pipila ka semana sa ulahi gitugotan ako nga makigkita kaniya, ug nagdala ako ug kopya sa video nga Jehovah’s Witnesses—The Organization Behind the Name. Ang panagkita mikabat ug halos duha ka oras. Human sa pagtan-aw sa video uban sa gobernador, akong gipangutana siya kon unsay iyang hunahuna bahin niana. Siya mitubag: ‘Walay laing organisasyon dinhi sa yuta nga sama sa inyoha. Maayo untag makabaton akog mga tawo nga sama kaninyo nga makatabang kanako sa pagtapos sa akong mga proyekto sa gobyerno!’ Dayon gipangutana niya ako kon nakaadto na ba ako sa tibuok-kalibotang hedkuwarter sa among organisasyon. Ako siyang gisultihan nga bisan kon kana na ang akong tumong sukad nga ako 14 anyos, wala pa gayod ako makabaton ug kahigayonan nga makaduaw sa among tibuok-kalibotang hedkuwarter sa Brooklyn, New York. Kana maoy usa niadtong mga tumong nga lisod kab-oton. Gitutokan niya ako sulod sa usa ka gutlo. Dayon miingon siya nga buot niyang mabatonan ko ang maong kahigayonan. Giseguro niya nga mabatonan namo ang legal nga mga permiso ug gihatagan kami ug mga tiket sa ayroplano ingong gasa!

“Karon ang gobernador regular na nga nagadawat sa mga magasing Bantayanang Torre ug Pagmata! Kami naglaom nga sa dili madugay masugdan namo ang usa ka pagtuon sa Bibliya uban kaniya.”