Wala Mag-inusara sa Dihang ang Among Pagtuo Gisulayan

Si Vicky maoy usa ka matahom nga batang babaye—himsog, makalingaw, ug lagsik kaayo. Oo, pagkadako sa among kalipay sa dihang natawo siya sa tingpamulak sa 1993. Nagpuyo kami sa usa ka gamayng lungsod sa habagatang Sweden, ug maayo kaayo ang kinabuhi.

APAN, sa dihang si Vicky usa ka tuig ug tunga na ang panuigon, ang among kalibotan daw nahugno. Siya nagdaot sulod sa taastaas nga panahon, mao nga gidala namo siya sa ospital. Dili gayod kami malimot sa panahong giingnan kami sa doktor nga ang among anak nag-antos sa grabeng lymphoblastic leukemia, usa ka matang sa kanser sa pagkabata nga moapektar sa mga selula sa puting dugo.

Lisod ang pagdawat sa kamatuoran nga ang among gamayng batang babaye gitakboyan niining makalilisang nga sakit. Nagsugod pa lang siya sa pagmatikod sa kalibotan palibot kaniya, ug unya mamatay dayon siya. Naningkamot sa paghupay kanamo, ang doktor miingon nga ang usa ka malamposong paagi sa pagtambal mahimong idapat, nga naglangkit ug chemotherapy duyogan sa ubay-ubayng pag-abono ug dugo. Nakurat na usab kami.

Gisulayan ang Among Pagtuo

Gihigugma gayod namo ang among anak nga babaye ug buot namo ang kinamaayohang pagtambal alang kaniya. Bisan pa niana, ang mga pag-abono ug dugo dili gayod dalawaton. Kami hugot nga nagtuo sa Pulong sa Diyos, ang Bibliya, nga tin-awng nag-ingon nga ang mga Kristohanon kinahanglang ‘magaayad sa dugo.’ (Buhat 15:28, 29) Nahibalo usab kami nga ang pag-abono ug dugo mismo maoy peligroso. Linibo ang natakdan ug mga sakit ug nangamatay gumikan sa mga pag-abono. Ang bugtong kapilian mao ang dekalidad nga pagtambal nga dili mogamit ug mga pag-abono ug dugo.  Niining bahina, nagsugod ang among pakigsangka labot sa pagtuo.

Unsay among mahimo? Mikontak kami sa Hospital Information Services sa sangang buhatan sa mga Saksi ni Jehova sa Sweden aron mangayo ug tabang. a Dihadiha, pinaagig fax gipadalhan ug mga sulat ang lainlaing mga ospital palibot sa Uropa aron sa pagpangita ug ospital ug doktor nga andam modapat ug chemotherapy nga dili moabono ug dugo. Ang kasibot ug gugma nga gipakita sa among Kristohanong mga igsoon sa ilang mga paningkamot sa pagtabang kanamo makapalig-on gayod. Wala kami pasagdi sa among pakigsangka labot sa pagtuo.

Mga oras lang, usa ka ospital ug usa ka doktor ang nakaplagan sa Homburg/Saar, Alemanya. Gihimo ang mga kahikayan aron kami makalarga pagkasunod adlaw para mahiling dayon si Vicky. Sa pag-abot namo, ang among Kristohanong mga igsoon gikan sa lokal nga kongregasyon sa mga Saksi ni Jehova sa Homburg, ingon man usab ang pipila sa among mga paryente, atua didto sa pagsugat kanamo. Ug usa ka hawas sa lokal nga Hospital Liaison Committee ang mainitong miabiabi kanamo. Gikuyogan niya kami sa ospital ug gihatagan kami sa tanang pagpaluyo kutob sa mahimo. Nahupayan kami sa pagkakita nga bisan sa langyawng nasod, kami adunay espirituwal nga mga igsoon nga nagpaluyo kanamo.

Sa dihang nahimamat namo si Dr. Graf sa ospital, kami nahupayan pag-usab. Siya masinabtanon kaayo ug nagpasalig kanamo nga buhaton niya ang tanang mahimo sa pagtambal kang Vicky nga walay mga pag-abono ug dugo. Bisan pag ang lebel sa iyang hemoglobin mous-os sa lima ka gramos matag desilitro, siya andam nga ipadayon ang pagtambal nga walay mga pag-abono ug dugo. Miingon usab siya nga ang sayong pagdayagnos ug ang dinaliang aksiyon sa pagdala kang Vicky didto naghatag kaniyag maayong kahigayonan alang sa malamposong pagtambal. Siya miadmitir nga kini maoy unang higayon nga siya modapat ug chemotherapy nga dili moabonog dugo diha sa kahimtang nga sama kang Vicky. Mapasalamaton kaayo kami ug nakadayeg sa kaisog ug determinasyon ni Dr. Graf nga motabang.

Mga Suliran sa Panalapi

Ang pangutana karon mao, Unsaon namo pagbayad ang mga pagtambal kang Vicky? Nakurat kami sa dihang gipahibalo kami nga ang duha ka tuig nga mga pagtambal mogasto ug mga 150,000 ka deutsche mark (kuwarta sa Alemanya). Wala kamiy bisag bahin man lang nianang kantidara sa salapi, apan gikinahanglan nga masugdan dihadiha ang pagtambal kang Vicky. Kay mibiya sa Sweden aron magpatambal sa Alemanya, kami walay katungod sa bisan unsang publikong insyurans sa panglawas. Busa kami didto uban sa among masakiton kaayong gamayng batang babaye ug sa hanas nga doktor nga andam sa pagtabang, apan kami walay igong salapi.

Ang ospital mitabang kanamo ug gisultihan kami nga ang pagtambal sugdan gilayon kon kami magpatinga ug 20,000 ka mark ug mopirma ug kasulatan ingong garantiya para sa ubang balayran. Aduna kamiy diyutay nga natigom, ug uban sa mahigugmaong tabang sa mga higala ug mga paryente, nakabayad kami sa 20,000 ka mark—apan komosta ang nahibilin pang balayran?

Sa makausa pa kami napahinumdoman nga kami wala mag-inusara sa among pakigsangka labot sa pagtuo. Usa ka igsoong lalaki sa espirituwal, nga dili namo kaila kaniadto, andam nga moabaga sa balanse. Apan, wala na namo dawata ang iyang mahinatagong tanyag, sanglit nakahimo kami ug laing mga kahikayan.

Nagmalamposon ang Hanas nga Pagtambal

Gisugdan na ang chemotherapy. Milabay ang daghang adlaw ug mga semana. May mga panahon nga ang kahimtang lisod kaayo ug hago alang sa among gamayng anak nga babaye ug alang kanamo. Sa laing bahin, natugob kami sa kalipay ug pasalamat sa matag panahon nga magpakita siya ug mga ilhanan nga miarang-arang. Ang chemotherapy gidangtag walo ka bulan. Ang kinaubsan nga lebel sa hemoglobin ni Vicky miabot ug unom ka gramos matag desilitro, ug gituman ni Dr. Graf ang iyang saad.

Kapin sa unom ka tuig na ang milabay, ug ang kataposang paghiling sa pluwido sa iyang taludtod nagpakitang wala nay nahibiling timailhan sa leukemia. Siya karon usa na ka malipayong batang babaye nga wala nay bisan unsang timailhan sa maong sakit. Oo, daw dili katuohan nga si Vicky naulian sa bug-os. Nasayod kami nga daghan sa  kabataan nga naa niining maong balatian namatay bisan pag gidapatan ug chemotherapy ug giabonohag dugo.

Ang among pakigsangka labot sa pagtuo nagmadaogon, apan tinabangan sa among mga paryente, Kristohanong igsoong mga lalaki ug babaye, ug sa medikal nga mga eksperto. Ang Hospital Information Services naghatag kanamo ug bug-os nga pagpaluyo 24 oras kada adlaw. Si Dr. Graf ug iyang mga kauban naggamit sa ilang mga kahanas sa pagtabang kang Vicky nga mamaayo. Tungod niining tanan, kami mapasalamaton gayod.

Napalig-on ang Among Pagtuo

Apan, labaw sa tanan kami mapasalamaton sa among Diyos, si Jehova, tungod sa iyang mahigugmaong pag-atiman ug sa kusog nga among nadawat pinaagi sa iyang Pulong, ang Bibliya. Sa paghinumdom, kami nakaamgo nga dako kaayo ang among nakat-onan ug napalig-on gayod ang among pagtuo tungod niining maong makapasubong kasinatian sa kinabuhi.

Ang kinasingkasing nga tinguha namo karon mao ang pagmentinar sa among suod nga relasyon kang Jehova nga Diyos ug ang pagtudlo sa among anak nga babaye sa kahinungdanon sa pagkinabuhi nga uyon sa iyang mga kinahanglanon. Oo, buot namong hatagan siya ug usa ka maayong espirituwal nga panulondon sa kinabuhing walay kataposan sa umaabot nga Paraiso dinhi sa yuta.—Tinampo.

[Footnote]