Tensiyon​—Ang Epekto Niini Kanato

Unsay mahitabo sa dihang magdali-dali ka sa pagsakayg bus o tren? Seguradong imong bation ang pagtaas sa imong presyon ug pagkusog sa pagpitik sa imong kasingkasing. Makasakay ka man o dili, ang pinitik sa imong kasingkasing ug pagginhawa mobalik ra sa normal.

APAN lahi tingali ang kahimtang kon matensiyon ka sulod sa taas nga panahon. Ang kabalaka, pagpanggahi sa kaunoran, pagtaas sa presyon, ug pagdaot sa tiyan dugayng maulian. Nagkadaghan ang mibati nga daw wala nay kataposan ang ilang tensiyon. Pananglitan, daghan ang wala nay gana sa ilang trabaho nga daw wala nay purohan nga moasenso. Unsay epekto sa tensiyon diha sa imong lawas ug sa imong kahimsog?

Reaksiyon sa Imong Lawas sa Tensiyon

Si Dr. Arien van der Merwe, nga eksperto bahin sa tensiyon, misaysay kon unsay reaksiyon sa imong lawas sa tensiyon. Kini mopagawas dayon ug “mga neurochemical ug mga hormone nga mosugwak diha sa imong tibuok lawas nga magpaalerto sa tanang organo ug sistema sa lawas panahon sa emerhensiya.”

Ikaw maandam dihadiha sa paghimog imposibleng mga buhat. Ang imong tanang igbalati—lakip na ang panan-aw, pangdungog, ug panghikap—nalangkit. Molihok dayon ang imong utok, ug ang imong mga adrenal gland mopatunghag mga hormone nga mopabaskog sa imong kaunoran, kasingkasing, baga, ug uban pang organo aron sa pagsagubang sa emerhensiya.

Busa panahon sa emerhensiya, ang reaksiyon sa imong lawas sa tensiyon makaluwas sa imong kinabuhi. Pananglitan, makalikay ka dayon kon dunay sakyanan nga nagpadulong kanimo. Apan lahi ang reaksiyon sa imong lawas kon matensiyon ka sa taas nga panahon.

Sa Dihang ang Tensiyon Mahimong Kaaway

Komosta kon kanunayng matensiyon ang imong lawas? Mogahi ang imong kaunoran, mokusog pagpitik ang imong kasingkasing ug motaas ang imong presyon, motaas usab ang imong kolesterol, fats, blood sugar, mga hormone ug uban pang substansiya diha sa dugo. Kon magpabiling taas kini nga mga substansiya—nga ipatungha lang sa lawas para sa kalit, grabe, ug wala damhang  mga situwasyon—sa ngadto-ngadto daoton niana ang pangunang mga organo sa lawas. Ug unsa ang mga resulta?

Manakit ang imong ulo ug likod, manggahi ang imong liog ug ang imong kaunoran. Sumala sa mga doktor, ang grabeng tensiyon maoy kasagarang hinungdan niini nga mga simtoma. Kon tensiyonado ka pirme, limitado ang imong mahimo, maluya ka, ug madaot ang imong relasyon sa uban. Moresulta usab kinig irritable bowel syndrome, kalibanga, ug pagpanghugot sa tutonlan.  Ang epekto sa kanunay nga pagka-tensiyonado mahimong mas grabe pa. Kini mahimong makapasamot o maoy hinungdan sa estrok, atake sa kasingkasing, pagkadaot sa kidney, ubang mga sakit sa kasingkasing, ug sa diabetes.

Si Van der Merwe misulat: “Ang pagka-tensiyonado sa taas nga panahon makapatunghag hormone nga cortisol nga tungod niini ang fats mapondo diha sa tiyan ug sa likod.” Ang tensiyon sagad maoy hinungdan—o makapasamot—sa mga sakit sa panit sama sa alipunga ug psoriasis. Ang grabeng tensiyon mahimong maoy hinungdan usab sa depresyon, pagkaputong, ug grabeng kakapoy. Makahatag usab kinig permanenteng kadaot sa memorya ug sa konsentrasyon. Kon ang sistema sa imyunidad madaot tungod sa pagka-tensiyonado kanunay, ang usa daling mataptan ug lainlaing sakit gikan sa ordinaryong ubo ug sip-on ngadto sa kanser ug mga sakit sa sistema sa imyunidad.

Ang tensiyon makaapektar sa atong panglawas—sa mental, pisikal, emosyonal, ug sa espiritu- wal—busa kinahanglang mahibalo kita kon unsaon kana pagkontrolar. Apan dili nato gusto nga bug-os nga mawala ang reaksiyon sa atong lawas sa tensiyon. Ngano man?

Mahimong ipakasama ang tensiyon sa usa ka lagsik nga kabayo. Makalingaw ug makapaukyab ang pagsakay niana. Apan kon dili kana makontrolar, makapameligro kana sa atong kinabuhi. Sa susama, ang tensiyon nga makontrolar ra makapahimo sa kinabuhi nga malipayon ug makapaukyab, ug matukmod kita niana sa paghunahunag daghang ideya, pagkahimong mabungahon, madasigon, ug himsog.

Busa unsaon nato pagkontrolar ang tensiyon aron magmalipayon ug magmabungahon ang atong kinabuhi? Hisgotan sa sunod nga artikulo ang epektibong mga paagi sa pagkontrolar sa tensiyon ug ang atong reaksiyon niini.

[Hulagway sa panid 5]

“KATINGALAHAN NGA PAGKABUHAT” SA USA KA MAALAMON, MAHIGUGMAONG MAGLALALANG

Sukwahi sa popular nga teoriya, ang reaksiyon sa atong lawas sa tensiyon dili maoy nahibiling reaksiyon sa karaang mga tawo tungod sa kuyaw nga mga higanteng elepante ug mga bangkilan nga tigre. Ang tinuod, ang reaksiyon sa atong lawas sa tensiyon maayong pagkadisenyo sa usa ka batid nga Maglalalang. Pananglitan, ang katingalahang pagtang-on sa dugo dihang masamad—pagsukol sa impeksiyon ug sa pag-alim sa samad—maingon man ang talagsaong reaksiyon sa lawas sa tensiyon nagpamatuod nga dunay usa ka maalamon ug mahigugmaong Tigdisenyo.

Kini nga mga sistema sa lawas nagpamatuod nga kita “katingalahan nga pagkabuhat.” (Salmo 139:13-16) Ang mahigugmaong mga tagana sa Diyos sa espirituwal ug pisikal, maingon man ang katingalahang paagi sa iyang paglalang sa tawo aron magmalipayon, naggarantiya nga wala na gayoy kasakit, kaguol, o kamatayon sa umaabot nga Paraisong yuta.—Pinadayag 21:3-5.

[Diagram/Hulagway sa panid 5]

(Alang sa aktuwal nga porma, tan-awa ang publikasyon)

DAOTANG EPEKTO SA PAGKA-TENSIYONADO KANUNAY

Sakit sa ulo

Pagkagot sa ngipon

Panakit sa liog

Sakit sa kasingkasing

Ulser

Panakit sa likod

Pagpanggahi sa kaunoran