Akong Gipili ang Mas Maayong Karera

Sumala sa giasoy ni Plamen Kostadinov

HAPIT na mag-udto sa dihang ako nakamata. Nagkatag sa salog ang mga botelya ug nanimahong sigarilyo ang palibot. Kagabii lang, malipayon kaayo ko sa among party, apan karon hain na ang maong kalipay? Mibati kog kapakyasan ug misamot ang akong kaguol. Daw walay kahulogan ang akong kinabuhi! Pasuginla ko kon nganong naingon niini ang akong kahimtang.

Pag-edad nakog 14, gihimo nakong karera ang pagkahimong pintor. Ting-init kadto sa 1980. Gipahibalo ko ni Papa nga nakapasar ko sa College of Arts sa lungsod sa Troyan, Bulgaria. Malipayon kaayo ko. Sa tinghunlak nianang tuiga, gibiyaan nako ang akong lungsod nga natawhan, ang Lovech, ug milarga ko paingon sa Troyan.

Ganahan kaayo kong magpalayo sa akong ginikanan ug himoon ang akong gusto. Nakakat-on ko sa pagpanigarilyo, ug usahay maghubog-hubog ko uban sa akong barkada sa eskuylahan. Gidili sa among eskuylahan ang pagpanigarilyo ug pag-inom-inom, apan lami hinuon kaayong lapason kon unsay gidili.

Misamot ang akong interes sa pagdrowing. Mihanas ako ingong pintor ug nangandoy ko nga mosikat. Human nako makompleto ang akong lima ka tuig nga pagtungha sa Troyan, mipadayon ko pag-eskuyla sa Art Academy didto sa Sofia, ang kaulohan sa Bulgaria. Mao kini ang labing inila nga tunghaan sa Bulgaria. Niadtong 1988, usa ako sa walo ka estudyante sa tibuok nasod nga gipili aron sa pag-eskuyla sa maong akademiya. Magarbohon kaayo ko niana! Usa ka adlaw, akong giingnan ang akong kaugalingon atubangan sa samin, ‘Plamen, mahimo na gyod kang sikat nga pintor!’

Sinugdanan sa Daotang Impluwensiya

Nahilig ko nga magsul-ob ug itom nga sinina ug nagpataas kog buhok ug bangas. Sagad mao kini ang hitsura sa mga pintor. Gisundog usab nako ang ilang paagi sa pagkinabuhi. Nag-abang kog kuwarto sa puy-anan sa mga pintor ug gituyo nako nga kana magkayamukat. Nagbuhi kog iro ug usa ka iring nga may tulo ka kuting. Nagwaldas usab kog kuwarta.

Nagpadayon ang akong hilig sa pagdrowing. Kanunay kong maghimog abstract nga mga hulagway nga bunga sa akong imahinasyon. Punog mga drowing ang bungbong sa akong kuwarto. Nagtuo ko nga mao na kini ang sinugdanan sa akong pagkasikat.

Kanunay ming mag-party sa akong mga isigkaestudyante. Mag-estambayan mi sa akong kuwarto ug didto mi maminawg musika ug mag-inom-inom bisan pag tingtuon para sa eksaminasyon. Mag-estoryahanay mi bahin sa musika, art, ug sa katuyoan sa kinabuhi. Pirme namong hisgotan ang misteryosong mga butang ug mga alien. Busa nakahunahuna ko nga mao kini ang akong sunod nga idrowing. Gusto unta nako nga dili mawala ang kalipay nga akong bation sa dihang kami mag-inom. Galing  lang, mohupas ra ang maong kalipay pagkaugma.

Mga napulo ka tuig nga ingon niini ang akong kinabuhi, ug dili ko malipayon. Sukwahi sa matahom nga mga kolor sa akong mga obra, naglugitom ang kahaw-ang nga akong gibati. Ang akong ambisyon nga mahimong sikat nga pintor nag-anam-anam ug kahanap. Naguol ko pag-ayo ug wala na ko mahibalo kon unsay himoon sa akong kinabuhi. Mao kini ang akong kahimtang nga gihisgotan sa sinugdanan.

Natabangan sa Kamatuoran

Niadtong 1990, akong gieksibit ang akong mga obra sa Lovech. Akong gidapit si Yanita, nga kauban nako sa dihang nag-eskuyla pa ko sa Sofia, aron moapil sa eksibit sanglit taga-Lovech man sab siya. Pagkahuman sa eksibit nangaon mi ni Yanita sa duol nga restawran aron sa pagselebrar sa among kalamposan. Samtang nangaon mi, gipaambit ni Yanita kanako ang iyang nakat-onan sa Bibliya gikan sa mga Saksi ni Jehova. Giestoryahan ko niya bahin sa bag-ong kalibotan nga gitagna sa Bibliya ug nainteres ako niana.

Gipadayon ni Yanita ang iyang pagtuon sa Bibliya sa Sofia, ug usahay dad-an ko niyag mga basahon nga binase sa Bibliya. Wala gayod nako malimti ang akong kaikag sa dihang akong gibasa ang brosyur nga “Tan-awa! Ginabag-o Ko ang Tanang Butang” ug gibasa nako sa pila lang ka adlaw ang librong Ikaw Mabuhing Walay Kataposan sa Paraiso sa Yuta. a Sayon ra kanako ang pagdawat sa kamatuoran nga dunay Diyos, ug gusto dayon kong makakat-on kon unsaon pag-ampo. Nahinumdom ko sa akong unang pag-ampo. Miluhod ko ug kinasingkasing nakong gisulti kang Jehova ang akong gibati. Ang akong kaguol napulihag kalipay ug kalinaw sa hunahuna.

Didto sa Sofia, gipailaila ko ni Yanita sa magtiayong Saksi ni Jehova. Ila kong gitanyagan nga magtuon sa Bibliya ug ila kong gidapit sa ilang mga tigom. Dili nako malimtan ang una nakong pagtambong ug tigom niadtong Hunyo 1991. Miabot ko nga abanteg duha ka oras ug naghulat ko diha sa gamayng parke. Gikulbaan ko, wala ko mahimutang, ug napuno kog pagduhaduha kon ila ba kong abiabihon. Pag-abot nako sa tigomanan wala ko magdahom nga maayo kaayo ang ilang tinagdan kanako bisan pag bangason ko ug taas ug buhok. Sukad niadto, tigtambongan na ko sa mga tigom ug nagtuon ko sa Bibliya kaduha sa usa ka semana.

Nalipay kaayo ko sa dihang nakadawat kog kopya sa Bibliya. Wala pa gyod ko sukad makabasa ug nindot ug makapahinuklog nga tambag sama sa Sermon sa Bukid! Samtang nagpadayon ko sa pagtuon, ang akong pagkatawo gibag-o sa gahom sa Pulong sa Diyos, sama sa giingon sa Efeso 4:23: “Magbag-o kamo diha sa puwersa nga nagpalihok sa inyong kaisipan.” Miundang ko sa pagpanigarilyo ug akong gibag-o ang akong pamostura. Gani, sa dihang gitagbo ko ni Papa sa estasyon sa tren sa Lovech, igo ra ko niya gilabyan kay wala na siya makaila nako.

Ang akong nagkalandrakas nga kuwarto, mga drowing diha sa akong bungbong, ug ang baho sa sigarilyo wala na makahaling sa akong imahinasyon. Buot na nakong hinloan ang tanan. Akong gipinturahag puti ang bungbong aron matabonan ang akong gidrowing nga alien nga may tulo ka mata.

 Sa wala madugay, gibiyaan ko sa akong barkada, apan napulihan sila sa mga tawo nga akong nahimamat didto sa tigom sa mga Saksi, ug sila nahimong akong suod nga mga higala hangtod karon. Tungod niining makapadasig nga mga higala, paspas ang akong pag-uswag. Niadtong Marso 22, 1992, ako gibawtismohan sa unang asembliya sa mga Saksi ni Jehova sa Bulgaria nga gipahigayon sa siyudad sa Plovdiv.

Mibalik Ko sa Lovech

Nahibalo ko nga dili sayon alang sa usa ka pintor ang pagpanginabuhi sa usa ka gamayng lungsod, apan ako midesisyon nga mobalik sa Lovech human sa akong paggraduwar. Akong nakita nga lisod kaayo ang pagkahimong sikat nga pintor ug sa samang higayon nag-una sa Gingharian sa Diyos. Busa nausab ang akong mga plano ug buot nakong magboluntaryo ingong usa ka magtutudlo sa Bibliya. Sa nag-eskuyla pa ko sa Art Academy, si Yanita, nga nauna kanakog graduwar ug tulo ka tuig, madasigon na kaayong nagsangyaw sa mga kamatuoran sa Bibliya didto sa Lovech. Siya lang ang Saksi didto.

Sa dihang mibalik na ko sa Lovech, dihay gamayng grupo sa mga tawo nga nagtuon sa Bibliya uban sa mga Saksi ni Jehova. Ganahan kaayo kong moduaw sa mga tawo diha sa ilang balay ug sa pagpaambit kanila sa paglaom sa umaabot. Ug buot nakong igugol ang tanan nakong panahon sa maong buluhaton.

Apan mitungha ang malisod nga mga kahimtang. Niadtong 1994 gidili ang among relihiyosong kalihokan ug kaylap kaayo ang pagpangdaot sa media kanamo. b Kanunayng ipatawag sa mga polis ang mga Saksi ug gipang-embargo ang among mga basahon. Niadtong malisod nga mga kahimtang, magtago-tago mi aron sa pagtigom. Apan kanunay gihapon ming magtigom diha sa 12 metros kuwadrado nga lawak tapad sa balay ni Yanita. Dihay higayon nga nagdasok ang 42 ka tawo sa maong gamay nga lawak. Aron dili mi makadisturbo sa silingan, manirado mig bentana sa dihang manganta mi ug mga awit sa Gingharian. Usahay, init kaayo ang panahon ug igang kaayo sa sulod, apan malipayon gihapon kami.

Mga Panalangin Gikan Kang Jehova

Nakadayeg kaayo ko sa kadasig ni Yanita sa matuod nga pagsimba, ug sa ngadto-ngadto nahulog ang akong pagbati kaniya. Naminyo kami niadtong Mayo 11, 1996. Bisan tuod ug managlahi ang among personalidad, kami nagtinabangay ingong magtiayon. Siya ang akong kinasuorang higala ug katimbang. Mapasalamaton kaayo ko kang Jehova nga iya kong gihatagag asawa nga ang “bili labaw pa kaayo kay sa mga korales.”—Proverbio 31:10.

Ang pipila sa akong barkada kaniadto nahimong pintor, ang karera nga akong gipangandoy sa una. Apan mapasalamaton ko nga akong gipili ang giisip nako nga mas maayong karera. Daghan ang akong natabangan nga makabatog katuyoan sa kinabuhi, ug sila nahimong akong mga igsoon sa espirituwal nga diwa. Ang bisan unsang kalamposan ug pagdayeg nga ako untang madawat ingong usa ka pintor dili gayod ikatandi sa mga panalangin nga akong natagamtam sa pag-alagad kang Jehova. Dako kaayo ang akong kalipay nga ako nasuod sa labing bantogang Pintor, si Jehova nga Diyos.

[Mga footnote]

[Hulagway sa panid 12]

Ako ug ang akong asawa nga si Yanita