Nabilanggo, Apan Gawasnon!

Tinampo sa magsusulat sa Pagmata! sa Mexico

ANG Islas Marías nahimutang mga 60 milyas gikan sa sentro sa kasadpang baybayon sa Mexico. a Usa niining mga isla sa Pasipiko, ang María Madre, nagsilbing pederal nga kolonya sa mga binilanggo sa Mexico sukad pa sa 1905. Kaniadto, gikalisangan kaayo nga silot ang pagkabalhog niining dapita, apan karon ang mga binilanggo nga maayog panggawi mao pay mohangyo sa pagbalhin dinhi!

Ang usa ka katarongan niini mao nga ang ubang mga binilanggo gitugotan sa pagpapuyo sa ilang pamilya dinhi. Inay nga nakulong sa mga selda nga may rehas, ang mga kriminal nagpuyo sa gagmayng mga balay. Ang mga balangay adunay mga pasilidad sa publiko sama nianang nabatonan sa gagmayng mga lungsod. Ang mga binilanggo makakomunikar sa gawas pinaagi sa telepono, telegrapo, telebisyon, ug sistema sa koreyo. Ang mga bata makaeskuyla sa tunghaang elementarya didto, apan kinahanglan silang moadto sa mainland inigtungha sa hayskul. Ug bisan tuod estriktong gilimitehan ang pag-adto sa maong isla, adunay barko sa navy nga moabot kas-a sa usa ka semana aron sa pagdala sa mga suplay ug mga bisita.

Komosta ang bahin sa rehabilitasyon? Ang mga binilanggo​—nga nagtawag sa ilang kaugalingon nga mga colono, o mga pumoluyo​—kinahanglang motrabaho sulod sa pipila ka oras kada adlaw. Kini dili lang makatabang kanila sa pagpasibo unya sa kinabuhi sa gawas sa bilanggoan kondili makatabang usab sa pagtapal sa galastohan sa pagpapuyo kanila didto. Ang mga colono libre usab sa paghimog personal nga mga buluhaton, sama sa pagpananom ug paggamag mga produktong gama sa kamot aron sila makasapi. Wala kini magpasabot nga wala na silay sundon nga regulasyon diha sa bilanggoan. Ang mga binilanggo kinahanglang moreport kada buntag alang sa pagpanawag sa ngalan ug sa pagtuman sa kurpiyo inigka-alas 9:00 sa gabii.

Espirituwal nga Kagawasan Miabot sa Marías

Niadtong mga 1985, usa ka colono, kansang pamilya mga Saksi ni Jehova, nangayog espirituwal nga tabang. Usa ka pagtuon sa Bibliya ang gisugdan pinaagig koreyo. Sa wala madugay, usa ka grupo sa mga estudyante sa Bibliya ang natukod, ug sila nagsugod sa paghikay ug Kristohanong mga tigom. Human makakuhag permiso gikan sa gobyerno, ang mga Saksi ni Jehova nagsugod sa pagduaw sa isla nga regular, nga 13 oras nga biyaheon sa gabii gikan sa Mazatlán, sa mainland. Sulod sa katuigan, mga 40 ka binilanggo na ang nakakat-on sa kamatuoran sa Pulong sa Diyos, nabawtismohan, ug human makasilbi sa ilang sentensiya, gibuhian. Sa panahon nga gisulat kini,  aduna pay 6 ka bawtismadong Saksi sa isla, ug may aberids nga 25 ka tawo ang nagatambong sa Kristohanong mga tigom.

Ang mga awtoridad nakadayeg sa mga Saksi ni Jehova tungod sa ilang mga paningkamot, ug ang mga binilanggo nga nahimong mga Saksi gitahod sa tanan. Ning bag-o lang, ang luyoluyong direktor sa bilanggoan miingon ngadto sa usa ka miduaw nga Saksi: “Maayo gayod kaayo nga managsama ang atong kaikag alang sa pisikal ug moral nga kaayohan sa mga binilanggo, nga kamo nahingawa usab kanila! Andam kami sa pagtabang kaninyo kutob sa among maarangan.” Mitanyag siya sa pag-ayo sa tinukod diin ang mga igsoon gitugotan sa pagtigom.

Usa ka bawtismadong Saksi​—nga binilanggo sulod na sa napulo ka tuig​—miingon: “Sa dihang mangutana kanako ang mga igsoong moduaw kanamo kon buot ba akong mobiya, ako silang sultihan nga buot nakong magpadayon sa pag-alagad dinhi; giisip nako kining teritoryoha ingong akong asaynment, kay dako ang panginahanglan dinhi. Siyempre, buot kong makatambong sa mga asembliya ug makatagamtam sa Kristohanong panag-ubanay.” Nakatakda na siya nga buhian sa sunod tuig tungod sa maayong panggawi.

Ang sistema sa bilanggoan sa Islas Marías gikataho nga adunay maayong kalamposan sa pagreporma sa mga binilanggo. Apan, ang mensahe sa Gingharian mao ang nakahatag ug tinuod nga espirituwal nga kagawasan ug reporma, usa ka ‘kagawasan sa mga binihag’ ug ‘pagpabuka pag-ayo sa mga mata sa mga binilanggo.’​—Lucas 4:18; Isaias 61:1.

[Footnote]

[Kahon/Mga hulagway sa panid 21]

Gikan sa Pagkagiyanon sa Droga Ngadto sa Pagkahimong Kristohanong Ansiyano

Si Guillermo gibilanggo tungod sa pagbaligya ug paggamit ug droga. Human gibalhog sa Islas Marías, siya giyanon gihapon sa droga. Apan namatikdan niya nga ang pipila ka binilanggo nga gipahamtangan ug taas nga mga sentensiya tungod sa krimen nga sama sa pagbaligyag droga hapsay ug panagway, may malipayon nga panglantaw, ug sulondan nga mga binilanggo. Sa dihang nasayran niya nga sila nagtuon ug Bibliya uban sa mga Saksi ni Jehova, gidawat niya ang imbitasyon sa pagtambong sa ilang mga tigom. Sa ulahi, siya regular nga gitun-an sa Bibliya.

Si Guillermo mihimog dagkong mga kausaban sa iyang kinabuhi ug gibuhian wala madugay human niadto. Gipangita dayon niya ang mga Saksi ni Jehova aron ipadayon ang iyang pagtuon. Siya karon nag-alagad ingong ansiyano sa Kristohanong kongregasyon, ug 17 ka membro sa iyang pamilya nahimo nang mga Saksi ni Jehova. Siya miingon: “Nalipay gayod ako nga nakaila kang Jehova ug nakabiya sa tanan nakong mga bisyo. Daghan sa akong mga higala kanhi patay na tungod sa droga. Ang droga nakadaot sa akong utok, mao nga limtanon na ako. Apan ang paagi sa pagtuon nga ginahimo sa mga Saksi nakatabang sa pagpauswag sa akong panumdoman. Ang mga doktor nahingangha tungod kay nagtuo sila nga dili na gayod ako maulian. Dako gayod kaayo ang kalainan nga nahimo sa kamatuoran sa Bibliya kanako ug sa akong pamilya. Wala gayod kami magpakitag gugma sa usag usa kaniadto, apan karon kami nagkahiusa.”

[Mga mapa sa panid 20]

(Alang sa aktuwal nga pagkahan-ay, tan-awa ang publikasyon)

Mazatlán

Islas Marías

María Madre

[Hulagway sa panid 20]

Ang mga “colono” ug ang ilang mga pamilya nagtambong ug mga tigom sa Kingdom Hall sa María Madre