Ecclesiastes 11:1-10
11 Ilabay ang imong tinapay+ ibabaw sa katubigan,+ kay sa paglabay sa daghang adlaw kini imong makaplagan pag-usab.+
2 Hatagi ug bahin ang pito, o bisan ang walo,+ kay ikaw wala mahibalo kon unsa nga katalagman ang mahitabo sa yuta.+
3 Kon ang mga panganod mapuno sa tubig, kini magpabundak sa ulan ibabaw sa yuta;+ ug kon ang usa ka kahoy mapukan ngadto sa habagatan o kon ngadto sa amihanan, sa dapit diin ang kahoy+ mapukan didto maatua kini.
4 Siya nga nagapaniid sa hangin dili makapugas ug binhi; ug siya nga nagalantaw sa mga panganod dili makaani.+
5 Ingon nga ikaw wala masayod kon unsa ang dalan sa espiritu diha sa mga bukog sulod sa tiyan sa nagamabdos,+ sa ingon usab ikaw wala mahibalo sa buhat sa matuod nga Diyos, nga nagabuhat sa tanang butang.+
6 Sa buntag ipugas ang imong binhi ug hangtod sa gabii ayaw papahulaya ang imong kamot;+ kay ikaw wala masayod kon diin kini magmalamposon,+ dinhi man o didto, o kon silang duha sama nga mahimong maayo.
7 Ang kahayag usab matam-is, ug maayo alang sa mga mata ang pagtan-aw sa adlaw;+
8 kay kon ang usa ka tawo magkinabuhi bisan sa daghang katuigan, tugoti siya nga magmaya diha nianang tanan.+ Ug pahinumdoma siya sa mga adlaw sa kangitngit,+ bisan tuod daghan kini; ang matag adlaw nga miabot maoy kakawangan.+
9 Pagmaya,+ batan-ong lalaki, sa imong pagkabatan-on, ug tugoti ang imong kasingkasing nga magalipay kanimo sa mga adlaw sa imong pagkabatan-on, ug lakaw sa mga dalan sa imong kasingkasing ug sa mga butang nga makita sa imong mga mata.+ Apan hibaloi nga tungod niining tanan ang matuod nga Diyos magdala kanimo ngadto sa paghukom.+
10 Busa kuhaa ang kagul-anan sa imong kasingkasing, ug ipahilayo ang katalagman sa imong unod;+ kay ang pagkabatan-on ug ang kinabaskogan nga yugto sa kinabuhi kakawangan.+
