Ecclesiastes 3:1-22
3 Adunay tinudlong panahon alang sa tanang butang,+ bisan usa ka panahon alang sa matag kalihokan ilalom sa mga langit:
2 panahon sa pagkatawo+ ug panahon sa pagkamatay;+ panahon sa pagtanom ug panahon sa pag-ibot sa gitanom;+
3 panahon sa pagpatay+ ug panahon sa pag-ayo;+ panahon sa paglumpag ug panahon sa pagtukod;+
4 panahon sa paghilak+ ug panahon sa pagkatawa;+ panahon sa pagminatay+ ug panahon sa paglukso;+
5 panahon sa paglabay ug mga bato+ ug panahon sa pagtigom ug mga bato;+ panahon sa paggakos+ ug panahon sa pagpugong sa paggakos;+
6 panahon sa pagpangita+ ug panahon sa pagdawat sa pagkawala; panahon sa pagtipig ug panahon sa paglabay;+
7 panahon sa paggisi+ ug panahon sa pagtahi;+ panahon sa paghilom+ ug panahon sa pagsulti;+
8 panahon sa paghigugma ug panahon sa pagdumot;+ panahon sa gubat+ ug panahon sa pakigdait.+
9 Unsa may kapuslanan sa nagabuhat nianang iyang gihagoan?+
10 Nakita ko ang buluhaton nga gihatag sa Diyos sa mga anak sa mga tawo aron pagabuhaton.+
11 Ang tanang butang iyang gihimo nga matahom sa panahon niini.+ Bisan ang panahong walay tino iyang gibutang sa ilang kasingkasing,+ aron ang tawo dili makatugkad sa buhat nga nahimo sa matuod nga Diyos sukad sa sinugdan hangtod sa kataposan.+
12 Nasayran ko nga walay mas maayo alang kanila kay sa pagmaya ug sa pagbuhat ug maayo samtang buhi pa;+
13 ug usab nga ang matag tawo mokaon ug moinom ug magpahimulos ug maayo sa tanan niyang kahago.+ Kini ang gasa sa Diyos.+
14 Nasayran ko nga ang tanang butang nga buhaton sa matuod nga Diyos, kini maoy hangtod sa panahong walay tino.+ Niini walay bisan unsa nga idugang ni kini pagakuhaan sa bisan unsa;+ apan kini gihimo sa matuod nga Diyos,+ aron ang katawhan mahadlok tungod kaniya.+
15 Kon unsa ang nahitabo na, kini diha na kanhi, ug unsa ang moabot kini diha na;+ ug ang matuod nga Diyos+ nagpadayon sa pagpangita sa mga ginalutos.+
16 Ug nakita ko pa sa ilalom sa adlaw ang dapit sa hustisya diin dihay pagkadaotan ug ang dapit sa pagkamatarong diin diha ang pagkadaotan.+
17 Ako miingon sa akong kasingkasing:+ “Ang matuod nga Diyos maghukom sa matarong ug sa daotan,+ kay adunay panahon alang sa matag kalihokan ug labot sa matag buluhaton dinha niana.”+
18 Ako mismo miingon sulod sa akong kasingkasing maylabot sa mga anak sa mga tawo nga ang matuod nga Diyos magpili kanila, aron ilang makita nga sila mismo maoy mga mananap.+
19 Kay usa ang dangatan sa mga anak sa tawo ug usa ang dangatan sa mananap, ug sila managsama ang dangatan.+ Ingon nga ang usa mamatay, mao man usab ang lain mamatay;+ ug silang tanan adunay usa lamang ka espiritu,+ mao nga dili labaw ang tawo sa mananap, kay ang tanan kakawangan.
20 Ang tanan mangadto sa usa ka dapit.+ Silang tanan gikan sa abog,+ ug silang tanan mobalik sa abog.+
21 Kinsa bay nasayod sa espiritu sa mga anak sa tawo, kon kini ba mosaka sa itaas; ug ang espiritu sa mananap, kon kini ba manaog sa yuta?+
22 Ug nakita ko nga wala nay mas maayo sa tawo kay sa magmaya sa iyang mga buluhaton,+ kay mao kana ang iyang bahin; tungod kay kinsay modala kaniya pagbalik sa pagtan-aw kon unsay mahitabo sunod kaniya?+
