Ecclesiastes 12:1-14
12 Hinumdomi, karon, ang imong Dakong Maglalalang+ sa mga adlaw sa imong pagkabatan-on,+ sa dili pa moabot ang malisod nga mga adlaw,+ o modangat ang mga tuig sa dihang ikaw moingon: “Ako walay kalipay niini”;+
2 sa dili pa ang adlaw ug ang kahayag ug ang bulan ug ang mga bituon mongitngit,+ ug ang mga panganod mobalik, ug human niana ang pagbundak sa ulan;
3 sa adlaw sa dihang ang mga magbalantay sa balay+ mangurog, ug ang mga lalaking kusgan mangapiko,+ ug ang mga babayeng naggaling+ manghunong sa pagtrabaho tungod kay sila diyutay na, ug ang mga babayeng nanambo sa mga bentana+ mangitngitan;
4 ug ang mga pultahan didto sa kadalanan masirhan na,+ sa dihang ang tingog sa galingan mohinay,+ ug mobangon ang usa ka tawo tungod sa tingog sa usa ka langgam, ug mohinay ang tingog sa tanang anak nga babaye sa honi.+
5 Dugang pa, sila mangahadlok lamang gani sa kon unsay hataas, ug adunay mga kalisang sa dalan. Ug ang kahoyng almendras mamulak,+ ug ang apan-apan magsaguyod, ug ang bunga sa alkapara mobusikad, tungod kay ang tawo maglakaw ngadto sa iyang dumalayong pinuy-anan+ ug ang mga nagminatay maglakaw libot sa dalan;+
6 sa dili pa mabugto ang pisi nga plata, ug mabuak ang panaksang bulawan,+ ug magupok ang banga sa tubod, ug madugmok ang moton sa atabay.
7 Unya ang abog mobalik sa yuta+ ingon sa kaniadto ug ang espiritu+ mobalik sa matuod nga Diyos+ nga maoy naghatag niini.+
8 “Pagkadakong kakawangan!” miingon ang magtitigom,+ “Ang tanan kakawangan.”+
9 Ug gawas pa nga ang magtitigom nahimong maalamon,+ siya nagpadayon usab sa pagtudlo sa katawhan ug kahibalo,+ ug siya namalandong ug naghimog bug-os nga pagsusi,+ aron iyang mahan-ay ang daghang panultihon.+
10 Gitinguha sa magtitigom nga makaplagan ang makapahimuot nga mga pulong+ ug ang pagsulat sa hustong mga pulong sa kamatuoran.+
11 Ang mga pulong sa mga maalamon sama sa mga igtutugsok sa baka,+ ug ingon sa mga lansang nga gipadulot+ kadtong mga nagtigom sa mga tudling-pulong; kini sila gihatag gikan sa usa ka magbalantay.+
12 Mahitungod sa bisan unsang butang gawas niini, anak ko, tagda ang pasidaan: Sa paghimog daghang basahon walay kataposan, ug ang hilabihan nga kasibot alang niini makapabudlay sa unod.+
13 Kini ang kataposan sa butang, ang tanan nadungog na: Kahadloki ang matuod nga Diyos+ ug tumana ang iyang mga sugo.+ Kay kini mao ang tibuok nga obligasyon sa tawo.
14 Kay pagadad-on sa matuod nga Diyos ang tanang matang sa buhat ngadto sa paghukom maylabot sa tagsatagsa ka tinagong butang, maayo man kini o daotan.+
