KUN igwa, may saro pang hapot: May epekto daw sa pagmate nin Dios an satong paggawe? An boot sabihon, puede daw na an satong mga ginigibo makapaogma o makapamondo sa Dios? An nagkapirang pilosopo kan suanoy na panahon nagsabing dai. Nangatanosan sinda na mayo nin siisay man na makakaimpluwensia sa Dios kaya mayong pagmate an Dios. Alagad laen man an itinotokdo sa sato kan Biblia—na si Jehova may mamomoton na pagmate asin nagmamakolog na marhay sa ginigibo niato. Estudyare an mga tataramon sa Salmo 78:40, 41.

Isinasaysay kan Salmo 78 an pagtratar nin Dios sa suanoy na Israel. Pagkatapos iligtas an nasyon sa pagkaoripon sa Egipto, nag-alok si Jehova na magkaigwa nin espesyal na relasyon sa sainda. Nanuga sia na kun padagos nindang kukuyogon an saiyang mga ley, sinda magigin saiyang “piniling kayamanan,” o espesyal na rogaring, asin gagamiton sa ekstraordinaryong paagi tanganing otobon an saiyang katuyohan. An banwaan nag-oyon asin naglaog sa tipan na Ley. Namuhay daw sinda segun sa napagkaoyonan?—Exodo 19:3-8.

An salmista nagsabi: “Pirang beses sindang nagrebelde tumang saiya sa desyerto!” (Bersikulo 40, BPV) * An sunod na bersikulo nagsabi pa: “Dakul na beses binalo ninda an Dios.” (Bersikulo 41, BPV) Mangnoha na ilinaladawan kan kagsurat an paorootrong pagrebelde. An maraot na ugaleng ini nagpoon kaidto pa—sa kaawagan dai nahaloy pagkaligtas ninda sa Egipto. An banwaan nagpoon na maggumodgumod tumang sa Dios, na kinukuestion kun baga kaya asin gusto nia na atamanon sinda. (Bilang 14:1-4) An sarong reperensia para sa mga paratradusir nin Biblia nagsasabi na an pananaram na ‘sinda nagrebelde tumang saiya’ puedeng “itradusir na ‘pinatagas ninda an saindang puso tumang sa Dios’ o ‘sinabi ninda sa Dios na “Dai.”’” Pero, huli sa pagkaherak ni Jehova, pinapatawad nia an banwaan kun nagsosolsol sinda. Alagad minabalik sinda sa dating pamumuhay saka nagrerebelde giraray, asin paorootro nindang ginibo iyan.—Salmo 78:10-19, 38.

Ano an namamatean ni Jehova kada magrebelde an saiyang pabarobagong banwaan? ‘Pinapamondo ninda sia,’ an sabi sa bersikulo 40 (BPV). Sinasabi sa saro pang traduksion na ‘kinokolgan ninda sia.’ An sarong reperensia sa Biblia nagpaliwanag: “An kahulogan kaini iyo na an paggawe kan mga Hebreo nagtao nin kakologan—arog kan sa masinuway asin rebeldeng aki.” Kun paanong an masinuway na aki nakakatao nin grabeng kolog nin boot sa saiyang mga magurang, an rebeldeng mga Israelita “pinaanggot an Banal na Dios nin Israel.”—Bersikulo 41, BPV.

Ano an manonodan niato sa salmong ini? Nakakapakosog na maheling na padangat na marhay ni Jehova an mga nagsasamba sa saiya asin dai nia tolos sinda binabayaan. Nakakapaisip man na maaraman na may pagmate si Jehova asin may epekto sa saiya an satong paggawe. Ano an epekto sa saimo kan pakaaram na iyan? Napapahiro ka daw kaiyan na gibohon an tama?

Imbes na mamuhay nin maraot asin kolgan an boot ni Jehova, puede niatong pilion na mamuhay nin tanos asin paogmahon an saiyang puso. Asin iyan mismo an hinahagad nia sa mga nagsasamba sa saiya: “Mag madonong ka, aki ko asin paogmaha an sakuyang puso.” (Talinhaga 27:11) Mayo na nin mas mahalagang bagay na ikakatao niato ki Jehova kisa sa mamuhay kita sa paagi na nagpapagayagaya sa puso nia.