Talaga daw na Nagmamakolog sa Saimo an Dios?

NAMAMATEAN mo daw na ika namomotan? O kun beses naiisip mo daw na mayo nin nagmamakolog sa saimo? Sa kinaban na ini na an mga tawo sibot-sibot asin sadiri sana an iniintindi, garo baga madaling maniwala na ika bako nanggad importante tanganing tawan nin atension. Arog kan paglaladawan kan Biblia dapit sa satong panahon, dakol ngonyan an sadiri sana nanggad an iniintindi kaya lakop an kawaran nin pagmakolog sa iba.—2 Timoteo 3:1, 2.

Ano man an edad, kultura, lenguahe, o rasa, hararom na nakagamot sa gabos na tawo an pangangaipo na mamoot asin mamotan. Segun sa nagkapirang report, espesipikong dinisenyo an satong nervous system tanganing makamate nin pagkamoot asin pagpadangat. Orog kisa siisay man, si Jehova Dios na naglalang sa sato, an nakakasabot kan satong pangangaipo na mamotan asin pahalagahan. Ano an mamamatean mo kun siertohon nia sa saimo na mahalaga ka sa saiya? Sa gabos na pagmidbid na puede mong makamit, siertong iyan an pinakamamahalon mo. Talaga daw na makakasierto kita na interesado si Jehova sa bakong perpektong mga tawo? Interesado daw sia sa sato bilang mga indibiduwal? Kun iyo, paano an saro puedeng magin kawiliwili sa saiya?

Talagang Nagmamakolog si Jehova

Mga 3,000 na taon na an nakaagi, an sarong salmista na matatakton sa Dios napano nin may pagkangirhat na paggalang kan maheling nia an kahangahangang mabitoon na langit kun banggi. Mayo nin pagduda sa saiyang isip na nakakalabing marhay an kamahalan kan Saro na naglalang kan dai mabilang na mga bitoon. Sa paghorophorop sa kadakulaan ni Jehova asin sa pagigin saditon kan tawo, ipinahayag kan salmista an saiyang pagngalas sa mamomoton na interes ni Jehova: “Kun naheheling ko an saimong kalangitan, an mga gibo kan saimong mga moro, an bulan asin mga bitoon na saimong hinaman, ano an magagadanon na tawo ta sia ginigirumdom mo, asin an aki nin daganon na tawo ta sia inaataman mo?” (Salmo 8:3, 4) Madali sanang isipon na harayoon o sibot-sibot an Kaharohalangkawe tanganing tawan nin atension an bakong perpektong mga tawo. Pero, aram kan salmista na dawa kita garo baga mayong halaga asin halipot an buhay, an tawo talagang mahalaga sa Dios.

Ipinahayag nin saro pang salmista an pagsiertong ini: “Ikinawiwili ni Jehova an mga natatakot sa saiya, an mga naghahalat sa saiyang mamomoton na kabootan.” (Salmo 147:11) Parehong nakakapukaw sa boot an sinasabi sa mga salmong ini. Minsan ngani halangkawon si Jehova, dai sana nia naririsa an mga tawo. Imbes, ‘inaataman nia sinda’ asin ‘nawiwili sia sa sainda.’

 An katunayan na ini orog na idinoon nin sarong hula sa Biblia na naglaladawan sa mga mangyayari sa satong panahon. Paagi ki propeta Haggeo, ipinarisa ni Jehova na ihuhulit an maogmang bareta kan Kahadean nin Dios sa bilog na kinaban. Na may anong resulta? Mangnohon an saro sa mga epekto: “An kawiliwiling mga bagay kan gabos na nasyon dapat na lumaog; asin papanoon ko nin kamurawayan an harong na ini.”—Haggeo 2:7.

Ano an “kawiliwiling mga bagay” na ini na tinitipon hale sa gabos na nasyon? Ini dai puedeng materyal na mga kayamanan. (Haggeo 2:8) Bakong plata asin bulawan an talagang nakakapagayagaya sa puso ni Jehova. Naoogma sia sa mga tawo na, sa ibong kan saindang pagigin bakong perpekto, sinasamba sia huli sa pagkamoot. (Talinhaga 27:11) Sinda an “kawiliwiling mga bagay” na nagtatao sa saiya nin kamurawayan, asin pinapahalagahan nia an saindang lubos na debosyon asin maigot na paglilingkod. Kabilang ka daw sa sainda?

Garo baga masakit paniwalaan na puedeng magin kawiliwili sa Dakulang Kaglalang kan uniberso an bakong perpektong mga linalang na tawo. Pero an totoo, dapat na mapahiro kita kan katotoohan na ini na akoon an mamomoton na pangagda na rumani sa saiya.—Isaias 55:6; Santiago 4:8.

“Ika Saro na Kawiliwiling Marhay”

Sarong amay na banggi, kan an propetang si Daniel gurangon na, may makangangalas na bagay na nangyari sa saiya. Mantang namimibi si Daniel, sarong kagalang-galang na bisita an biglang nag-abot. An ngaran nia Gabriel. Namidbid na ini dati ni Daniel asin naaraman nia na ini anghel ni Jehova. Ipinaliwanag ni Gabriel an dahelan kan bigla niang pag-abot: “O Daniel, ngonyan nagluwas ako tangani na ika magkaigwa nin pakarorop na may pakasabot . . . huli ta ika saro na kawiliwiling marhay.”—Daniel 9:21-23.

Sa saro pang pagkakataon, kinaolay si Daniel kan saro sa mga anghel ni Jehova asin nagsabi: “O Daniel, ika na tawong kawiliwiling marhay.” Dangan, tanganing pakosogon si Daniel, an anghel nagsabi: “Dai ka matakot, O tawo na kawiliwiling marhay. Mapasaimo logod an katoninongan.” (Daniel 10:11, 19) Sa siring, si Daniel tolong beses na ilinadawan na “kawiliwiling marhay.” An pananaram na iyan puede man mangahulogan na “namomotan na marhay,” “pinapahalagahan na marhay,” asin “paborito” pa ngani.

Siertong si Daniel dayupot na sa saiyang Dios asin daing duda na aram niang inooyonan ni Jehova an saiyang may debosyon na paglilingkod. Alagad an kapahayagan na iyan nin dakulang kapadangatan nin Dios na ipinaabot nia paagi sa saiyang mga mensaherong anghel siertong nakaparigon nanggad. Bakong makangangalas, si Daniel nagsabi: “Pinakosog mo ako.”—Daniel 10:19.

An nakakaogmang pagkasaysay dapit sa mamomoton na pagmate ni Jehova sa saiyang maimbod na propeta isinurat sa Tataramon nin Dios para sa kapakinabangan niato. (Roma 15:4) An paghorophorop sa halimbawa ni Daniel makakatabang sa sato na masabotan kun paano an  saro magigin kawiliwili sa satong mamomoton na Ama sa langit.

Regular na Pag-adalan an Tataramon nin Dios

Si Daniel mahigos na paraadal kan Kasuratan. Aram niato ini huli ta isinurat nia mismo: ‘Namansayan ko paagi sa mga libro an bilang kan mga taon para sa kaotoban kan grabeng mga pagkadestroso kan Jerusalem.’ (Daniel 9:2) Posibleng marhay na kaiba sa mga libro na makukua nia kan panahon na idto an ipinasabong na mga isinurat ni Moises, David, Salomon, Isaias, Jeremias, Ezequiel, asin iba pang propeta. Maiimahinar niato na napapalibotan si Daniel nin dakol na rolyo, na biyong nakakonsentrar sa pagbasa asin pagkomparar kan makahulang mga kapahayagan na may koneksion sa pagbabalik kan tunay na pagsamba sa Jerusalem. Mantang dai nadidisturbo asin posibleng marhay na nasa saiyang kuarto sa atop, daing duda na hinorophorop nia nin hararom an kahulogan kan siring na mga teksto. An saiyang determinadong pag-adal nagpakosog kan saiyang pagtubod asin nagpadayupot sa saiya ki Jehova.

An pag-adal sa Tataramon nin Dios nakaimpluwensia man sa personalidad ni Daniel asin nagkaigwa nin epekto sa saiyang bilog na pamumuhay. An sono sa Kasuratan na pagtotokdo sa saiya kan sia aki pa daing duda na nagin dahelan na sia magin determinado bilang hoben na sunodon an mga regulasyon kan Ley nin Dios dapit sa pagkakan na aplikado kan panahon na idto. (Daniel 1:8) Paghaloyhaloy, daing takot na ipinahayag nia an mensahe nin Dios sa mga namamahala sa Babilonya. (Talinhaga 29:25; Daniel 4:19-25; 5:22-28) An saiyang pagigin mahigos, onesto, asin mapagtitiwalaan bantog na marhay. (Daniel 6:4) Orog sa gabos, imbes na magkompromiso tanganing iligtas an saiyang buhay, si Daniel lubos na nagtiwala ki Jehova. (Talinhaga 3:5, 6; Daniel 6:23) Bakong makangangalas na sia nagin “kawiliwiling marhay” sa pagheling nin Dios!

Sa nagkapirang paagi, an pag-adal sa Biblia mas madali para sa sato ngonyan kisa kan ki Daniel kaidto. Mayo na nin darakulang rolyo kundi mga libro na madaling gamiton. Igwa na kita ngonyan kan kompletong Biblia, kaiba an nakasurat na rekord kun paano naotob an nagkapira sa mga hula ni Daniel. Asin igwa kita nin kadakol na pantabang sa pag-adal asin pagsiyasat sa Biblia. * Ginagamit mo daw na marhay an siring na mga pantabang? Nag-iiskedyul ka daw nin regular na oras sa pagbasa kan Biblia asin paghorophorop? Kun siring, an epekto kan paggibo mo kaiyan magigin kapareho kan ki Daniel. Ika makakapatalubo nin marigon na pagtubod asin mapapararom mo an saimong relasyon ki Jehova. An Tataramon nin Dios magigin masasarigan na giya sa saimong buhay, na masierto sa saimo kan saiyang mamomoton na pagmakolog.

Magmaigot sa Pamimibi

Si Daniel sarong tawo na ugale na an pamimibi. Naghagad sia nin mga bagay na inooyonan nin Dios. Kan sia hoben pa, sia nameligrong gadanon kun dai nia ikakatao an kahulogan kan pangatorogan kan Hade nin Babilonya na si Nabucodonosor. Daing pag-alangan na nakimaherak si Daniel ki Jehova na suportaran asin protehiran sia. (Daniel 2:17, 18) Pakalihis nin dakol na taon, huling mapakumbabang minidbid kan maimbod na propetang ini an saiyang pagkabakong perpekto bilang tawo, itinuga nia an kasalan nia asin kan saiyang banwaan saka nakimaherak ki Jehova para sa kapatawadan. (Daniel 9:3-6, 20) Kan dai nia masabotan an dapit sa mga bagay na ipinasabong sa saiya, naghagad si Daniel nin tabang sa Dios. Sa sarong pangyayari, an anghel na nagbisita ki Daniel tanganing magtao sa saiya nin dugang pang pakasabot nagsabi: “Dinangog na an saimong mga tataramon.”—Daniel 10:12.

Pero, bako sanang mga kahagadan an ipinamibi sa Dios kan maimbod na si Daniel. An Daniel 6:10 nagsasabi: “Tolong beses kada aldaw sia . . . namimibi patin nagdodolot nin pag-omaw sa atubangan kan saiyang Dios, arog kan dayaday niang ginigibo.” Dakol an dahelan ni Daniel na magpasalamat asin mag-omaw ki Jehova. Asin regular niang ginibo iyan. Iyo, an pamibi mahalagang marhay na kabtang kan saiyang pagsamba kaya  dai nia iyan kayang pondohon dawa pa mameligro an buhay nia. Tunay nanggad, namotan sia ni Jehova huli sa saiyang karigonan.

Sarong marahayon nanggad na regalo an pribilehio nin pamibi! Nungkang palihison an sarong aldaw na dai mo kinakaolay an saimong Ama sa langit. Dai paglingawan na pasalamatan asin omawon sia huli sa gabos na karahayan na ipinapaheling nia. Dai mag-alangan na ipahayag an saimong mga kahaditan asin problema. Isip-isipa kun paano nasimbag an saimong mga kahagadan o pagngayongayo, asin ipahayag an saimong pagpasalamat. Dai paghidalion an saimong pamibi. Sa siring, kun binubukasan niato an satong puso ki Jehova sa pamibi, personal nanggad niatong mamamatean an saiyang pagkamoot. Dakulang dahelan nanggad iyan na ‘magtiaga sa pamimibi’!—Roma 12:12.

Pamurawayon an Ngaran ni Jehova

Dai magigin mapanggana an pagkakatood kun sadiri sana an iniintindi kan sarong lado. Totoo man iyan sa satong relasyon ki Jehova. Aram ni Daniel an katunayan na ini. Helinga kun gurano nanggad sia kainteresado sa pagpamuraway sa ngaran ni Jehova.

Kan sinimbag nin Dios an pamibi nia paagi sa paghayag sa saiya kan pangatorogan ni Nabucodonosor asin kan kahulogan kaiyan, si Daniel nagsabi: “Omawon logod an ngaran nin Dios poon sa panahon na daing talaan sagkod sa panahon na daing talaan, huli sa kadonongan asin kakosogan—huli ta an mga iyan sadiri nia.” Pagkatapos kaiyan, kan ipinapaaram nia ki Nabucodonosor an pangatorogan asin kahulogan kaiyan, paorootrong itinao ni Daniel an onra ki Jehova, na idinodoon na Sia sana an “Parahayag nin mga hilom.” Kaagid kaiyan, kan si Daniel nakikimaherak para sa kapatawadan asin pagliligtas, sia namibi: “O Dios ko, . . . an saimong sadiring ngaran iinapod sa saimong siudad asin sa saimong banwaan.”—Daniel 2:20, 28; 9:19.

Dakol an oportunidad niato na arogon si Daniel sa bagay na ini. Kun namimibi, puede niatong ipahayag an satong interes na ‘mapakangbanal an ngaran’ nin Dios. (Mateo 6:9, 10) Nungka niatong gugustohon na an satong paggawe magtao nin katuyawan sa banal na ngaran ni Jehova. Imbes, pirme logod niatong pamurawayon si Jehova paagi sa pagsabi sa iba kan nanodan niato manongod sa maogmang bareta kan saiyang Kahadean.

Totoo, an kinaban sa palibot niato kulang sa pagkamoot asin pagmakolog sa iba. Minsan siring, nararanga nanggad kita sa pakaaram na talagang nagmamakolog si Jehova sa mga nagsasamba sa saiya bilang mga indibiduwal. Arog kan sinabi kan salmista: “Si Jehova nawiwili sa saiyang banwaan. Pinapagayon nia an mga mahoyo paagi sa kaligtasan.”—Salmo 149:4.

[Nota sa Ibaba]

[Blurb sa pahina 21]

Ipinahayag nin Dios an kapadangatan nia ki Daniel paagi sa pagsugo ki anghel Gabriel na pakosogon sia

[Blurb sa pahina 23]

Huli sa kahigosan ni Daniel sa pag-adal asin pagpamibi, napaoswag nia an saiyang personalidad asin namotan sia nin Dios