Kan Miyerkules na aga, Setyembre 5, 2012, ipinaisi sa pamilyang Bethel sa Estados Unidos asin Canada na nadagdagan nin sarong bagong miyembro an Namamahalang Grupo kan Mga Saksi ni Jehova. Kan Setyembre 1, 2012, nagpuon na maglingkod si Mark Sanderson sa katungdan na iyan.

Si Brother Sanderson pinadakula kan saiyang Kristiyanong mga magurang sa San Diego, California, E.U.A., asin nabawtismuhan kan Pebrero 9, 1975. Nagpuon siyang maglingkod bilang payunir sa Saskatchewan, Canada, kan Setyembre 1, 1983. Kan Disyembre 1990, naggradwar siya sa ikapitong klase kan Ministerial Training School (inaapod ngunyan na Bible School for Single Brothers) sa Estados Unidos. Kan Abril 1991, inasignaran si Brother Sanderson na maglingkod bilang espesyal payunir sa isla nin Newfoundland, Canada. Pagkatapos na maglingkod bilang kasalihid na paraataman nin sirkito, inimbitaran siya na magin miyembro kan pamilyang Bethel sa Canada kan Pebrero 1997. Kan Nobyembre 2000, ibinalyo siya sa sangay sa Estados Unidos, kun sain siya naglingkod sa Hospital Information Services dangan paghaloy-haloy sa Service Department.

Kan Setyembre 2008, nag-adal si Brother Sanderson sa School for Branch Committee Members asin pagkatapos kaiyan ninombrahan bilang miyembro kan Komite kan Sangay sa Pilipinas. Kan Setyembre 2010, inimbitaran siyang bumalik sa Estados Unidos, kun sain naglingkod siya bilang katabang sa Komite sa Paglilingkod kan Namamahalang Grupo.